Read Diospa Simin Qelqa GÉNESIS 41 Bible Online

GÉNESIS 41 - Diospa Simin Qelqa bible

GÉNESIS 41

¹Iskay wataña pasaqtinmi Faraonqa mosqokurqan, mosqoyninpitaq payqa Nilo mayu patapi hina sayashasqa.

²Mayumantan lloqsimushasqa qanchis wira wakakuna llusk'allaña, hinaspa q'achu-q'achupi mikhushasqaku.

³Chaykuna qhepatataq mayumanta lloqsimushasqa qanchis millay toqti wakakuna, hinaspan sumaq wira wakakunaq qayllanpi mayu patapi sayaykurqanku.

⁴Hinaspanmi millay toqti wakakunaqa oqoykurqanku chay qanchis llusk'a wira wakakunata. Faraontaq rikch'arirqan.

⁵Wakmantan puñuykurqan, hinaspa iskaykaq kutipi mosqokurqan: Qanchis trigo uma rurusapallaña sumaqta wiñasqa ch'ulla tullullapi.

⁶Chaykuna qhepatataq lloqsimushasqa wak qanchis trigo umakuna ch'usukama rupha wayraq naq'echisqan.

⁷Chay qanchis ch'usu trigo umataq oqoykurqan chay qanchis trigo uma sumaqkaq rurusapata. Hinan Faraonqa rikch'arirqan, chayqa mosqoyllataq kasqa.

⁸Tutamantataq hawapi-ukhupi sonqoyoq karqan, hinaspan waqyachimurqan Egiptopi llapan watuqkunata, llapan yachayniyoqkunatawan. Hinaspanmi Faraonqa paykunaman willarqan mosqokusqankunata, ichaqa manan pipas karqanchu Faraonpa mosqokusqanta sut'inchaq.

⁹Hinaqtinmi copa haywaqkunaq umallinqa Faraonta nirqan: — Kunanmi huchaykunata yuyarini.

¹⁰Maypachachus qanqa kamachiykikunapaq phiñakurqanki, guardia umalliq wasinmantaq presota apachiwarqankiku, ñoqata hinallataq t'anta ruwaqkunaq umallintapas.

¹¹Chaypachan paywan ñoqawan kasqan tutalla mosqokurqayku, sapanka mosqoytaq sut'inchanayoqkama karqan.

¹²Chaypin ñoqaykuwan kasharqan huk Hebreo wayna, guardia umalliq kamachin. Paymanmi chayta willarqayku, paytaq mosqokusqaykuta sut'inchapuwarqanku, hinan sapankaman imachus kasqanta willawarqanku.

¹³Chaymi mosqoyniykuta paypa sut'inchasqanman hina karqan: Ñoqan llank'anayman churasqa kapurqani, hukkaqtaq seq'osqa kapurqan, nispa.

¹⁴Chaymi Faraonqa Joseta waqyachimurqan. Hinan usqhaylla carcelmanta horqomurqanku, sunkhantapas k'isukuspataq wak p'achawan p'achakurqan, hinaspa hamurqan.

¹⁵Hinan Faraonqa Joseta nirqan: — Ñoqan mosqokuni, manataq pipas kanchu chayta sut'inchay atiq, chaywanpas qanmanta willakuqtan uyarini: Mosqokusqakunatan uyarin, hinaspan chaykunata sut'inchan, nisqata.

¹⁶Josetaq Faraonta nirqan: — Ñoqaqa manan imapaschu kani, Diosmi mosqokusqaykitaqa willasunki sonqoyki tiyaykunanpaq, nispa.

¹⁷Chaymi Faraonqa Joseman willarqan: — Mosqoyniypin Nilo mayu patapi hina kashasqani,

¹⁸hinan mayumanta lloqsimushasqa qanchis llusk'a wira wakakuna, hinaspan q'achu-q'achupi mikhushasqaku.

¹⁹Chaykuna qhepatataq qanchis millay toqti wakakuna lloqsimushasqa, sinchi tullu, manan chaykuna hina millaytaqa rikurqanichu Egiptontinpipas.

²⁰Chay toqti wakakunan oqoykushasqaku ñawpaqkaq qanchis wira wakakunata.

²¹Chay oqoykusqanku wakakunaqa manan reparakurqanchu, chay toqtikunaqa kasqan millayllapunin ñawpaq hina kasharqanku. Hinaspan rikch'arirqani.

²²Chaymantapas mosqokullarqanitaqmi, hinaspan rikurqani: qanchis trigo uman wiñasqa ch'ulla tullullapi, rurusapataq sumaqtaq kasqa.

²³Hinallataq qanchis trigo uma, ch'usu, ch'akisqa, rupha wayraq naq'echisqan chaykuna qhepata wiñasqa.

²⁴Hinaspanmi ch'usu trigo umaqa oqoykusqa qanchis sumaq umakunata. Chaytan willaniña watuqkunaman, manataq pipas kanchu chayta sut'inchapuwananpaq, nispa.

²⁵Hinaqtinmi Joseqa Faraonta nirqan: — Mosqokusqaykiqa kaqkamallan, Diosmi imatachus ruwananta rikuchirqasunki.

²⁶Qanchis sumaq wakakunaqa qanchis watan, qanchis sumaq trigo umakunapas qanchis watan, mosqoyqa kaqkamallan.

²⁷Qhepankuta lloqsimuq qanchis millay toqti wakakunapas qanchis watan, chay qanchis trigo uma ch'usullaña rupha wayraq naq'echisqanpas, qanchis wata yarqay kananmi.

²⁸Iman kaqllatan qanman willayki, Diosmi imatachus ruwananta rikuchirqasunki.

²⁹Egipto suyupin qanchis wata askhallaña mikhuy kanqa,

³⁰chaykuna qhepatataq qanchis wata yarqay kanqa. Chaymi askhallaña mikhuypa Egipto suyupi kasqanqa qonqasqa kanqa, suyuntintataq yarqayqa hasut'inqa.

³¹Chay askhallaña mikhuypa kasqanqa manan reparakunqachu qhepanta yarqay hamusqanrayku, chay yarqayqa sinchipunin kanqa.

³²Iskay kutita mosqokusqaykiqa willakun Diospa cheqaqtapuni yuyaykusqantan, hinallataq Diosqa usqhayllata chayta hunt'anantawan.

³³Chayraykun kunan yuyaychayki, huk yuyayniyoq yachayniyoq qharita maskhay, hinaspa Egipto suyupi llank'achiqta churay.

³⁴Kaytapas ruwallaytaq, suyuntinpi kamachikuqkunata churay, hinaspa qanchis watantin askha cosechamanta Egipto suyuntinpi phisqa costalmanta hukninta t'aqaspa huñuchunku.

³⁵Hinaspa kay hamuq allin watakunapi llapa mikhuyta huñuchunku, kamachiytaq trigota churanankupaq llaqtakunapipas mikhuna kananpaq, hinaspataq waqaychachunku.

³⁶Chay mikhuytaqa waqaychachunku suyupaq, Egipto suyupi qanchis wata yarqay kanqa chaypaq, chaymi suyuqa yarqaymanta mana wañunqachu, nispa.

³⁷Chay yuyaychaytan Faraonqa allinpaq hap'irqan, hinallataq oficialninkunapas,

³⁸hinaspan Faraonqa paykunata nirqan: — ¿Kay runata hina hukta tarisunmanchu? Diospa Espiritunmi paypiqa kashan, nispa.

³⁹Hinaspanmi Faraonqa Joseta nirqan: — Diosmi lliw chaykunata yachachisunki, manan kanchu qan hina yuyayniyoqpas yachayniyoqpas.

⁴⁰Qanmi palacioypi kamachikunki, kamachikusqaykitan llapa llaqta kasusunki, kamachikuna tiyanallapin ñoqaqa qanmanta kurak kasaq.

⁴¹Qhawariy, ñoqan churayki Egipto suyuntinpi kamachikunaykipaq, nispa.

⁴²Hinaspanmi Faraonqa makinmanta selloyoq anillonta horqokuspa chayta Josepa makinman churaykurqan, sinchi fino lino p'achawantaq p'achachirqan, kunkanmantaq walqaykurqan huk qori walqanata.

⁴³Chaymantataq iskaykaq carretanman wichachirqan, hinaspa ñawpaqenpi waqyakurqanku: ¡Qonqorikuychis! nispa. Chhaynatan Egipto suyuntinpi churarqan.

⁴⁴Chaymantataq Faraonqa Joseta nirqan: — Ñoqan Faraón kani, mana simiykimantaqa manan pipas Egipto suyuntinpi kuyurinqachu, nispa.

⁴⁵Faraonqa Joseta suticharqan Zafnat-paneata,[44] hinaspanmi payta casarachirqan On llaqta sacerdote Potiferaq ususin Asenatwan. Ahinapin Joseqa Egipto suyuntinta purirqan.

⁴⁶Joseqa kinsa chunka watayoqmi karqan Egipto rey Faraonpa qayllanman pusashaqtinku. Joseqa Faraonpa qayllanmanta lloqsispanmi Egipto suyuntinta purirqan.

⁴⁷Chay qanchis allin watakunapin mikhuyqa askhallataña rururqan.

⁴⁸Chaymi payqa huñurqan qanchis watantin mikhuyta, Egipto suyupi ruruqta, hinaspan mikhuyta llaqtakunapi waqaycharqan, muyuriqnin campo mikhuyta sapanka llaqtapi churachispa.

⁴⁹Joseqa trigota huñurqan lamar-qocha aqota hinaraqmi, sinchi askhallataña mana yupay atinakama, manañan yuparqankuñachu.

⁵⁰Josepaqqa nacerqan iskay wawakunan manaraq ñawpaqkaq yarqay wata chayamushaqtin, chaykunatan On llaqta sacerdote Potiferaq ususin Asenat paypaq wachakurqan.

⁵¹Joseqa phiwi churintan suticharqan Manasesta,[45] nirqanmi: Diosmi qonqachipuwan lliw muchuyniyta, taytaypa lliw aylluntapas, nispa.

⁵²Hukkaqtataq suticharqan Efrainta,[46] nirqanmi: Diosmi mirachiwan llakikusqay suyupi, nispa.

⁵³Chay hinatan Egipto suyupi askhallataña mikhuypa rurusqan qanchis wata hunt'akurqan,

⁵⁴hinaspan qanchis wata yarqay qallarirqan, Josepa ñawpaqmantaña willakusqanman hina. Llapa suyukunapin yarqay karqan, Egipto suyuntinpin ichaqa mikhuy karqan.

⁵⁵Egipto runakunaqa mikhunanku tukukapuqtinmi, Faraonman mikhunata mañakuspa qaparirqanku. Faraontaq llapa Egipto runakunata nirqan: — Joseman riychis, hinaspa ruwaychis imatachus pay nisunkichis chayta, nispa.

⁵⁶Yarqaytaq tukuy suyuntinpi karqan, chaymi Joseqa kicharirqan llapa taqe wasikunata, hinaspan trigota Egipto runakunaman venderqan, Egipto suyupiqa sinchipunin yarqayqa karqan.

⁵⁷Hinantinmantan Egiptoman hamurqanku Josemanta rantikuq, hinantin pachapi sinchi yarqay kaqtin.