Read Diospa Simin Qelqa GÉNESIS 49 Bible Online

GÉNESIS 49 - Diospa Simin Qelqa bible

GÉNESIS 49

¹Jacobmi churinkunata waqyaspa nirqan: — Huñukamuychis, qhepa p'unchaykunapi imaynachus kanaykichistan sut'inchasqaykichis:

²— Asuykamuychis, hinaspa uyariwaychis, ñoqa Jacobpa churiykuna, uyariwaychis taytaykichis Israelta.

³Rubén, qanmi phiwiy kanki, kallpay, churiyay qallarisqay, allinnin manchana, qollana atiyniyoq.

⁴Unu hina mana hark'achikuq, manan qollanachu kapunki, taytaykiq tiyaqmasin warmiwan puñukusqaykirayku, chaypachan pisichawarqanki.

⁵Simeonwan Leviwanqa wawqentinmi kanku, mana chanin arman, armankuqa.

⁶Ama paykunawanqa rimanakusaqchu, amataq paykunawanqa huñunakusaqchu. Phiñakuspankun runata wañurqarichirqanku, yanqa qasitaq torokunaq hank'unta kuchurarqanku.

⁷Ñakasqa kachun millayllaña k'arak phiñakuyninku, ñakasqa kachun sinchillaña phiñakuyninku. Ñoqan Jacobpa miraynin ukhupi paykunata t'aqasaq, Israel llaqtapitaq paykunata ch'eqeykachisaq.

⁸Judá, wawqeykikunan hatunchasunki, awqaykikunatan much'unmanta hap'inki, wawqeykikunan k'umuykamusunki.

⁹Uña león hinan Judaqa, mikhusqaykimanta kutimuspaykin, churíy, k'umuykurqanki, león hinan thallaykurqanki, china león hina. ¿Pitaq qanta rikch'arichisunkiman?

¹⁰Manan kamachikuy varaqa Judamanta chinkanqachu, manallataq hap'isqan varaqa chinkanqachu, varayoq hamunankama, paytataqmi runakunaqa kasunqaku.

¹¹Uvas yuraman malta asnota wataspa, sumaq uvas tulluman china asnonpa uñanta wataspa, p'achanta vinopi t'aqsarqan, uvas unupi p'achanta t'aqsarqan.

¹²Ñawinqa vinowan pukayachisqan, kiruntaq lechewan yuraqyachisqa.

¹³Zabulonqa lamar-qocha patapin tiyanqa, barcokunaq chayananmi kanqa, qorpantaq Sidonkama kanqa.

¹⁴Isacarqa kallpasapa asnon, uywa kancha ukhupi samakuq.

¹⁵Rikurqanmi samanaqa allin kasqanta, hallp'apas sumaq kasqanta, chaymi q'epiykachikullarqan, hukpaqmi llank'arqan.

¹⁶Danqa llaqtantan kamachinqa Israelpa huknin ayllun hina.

¹⁷Danmi kanqa ñan pata mach'aqway, ñan pata víbora, caballoq chakinta k'utuq, hinaspa sillakuqta qhepaman urmachiq.

¹⁸¡Qespichiwanaykitan suyakuni, Señor Diosnilláy!

¹⁹Gadtaqa huk ejerciton llat'ananqa, chaypas paymi paykunataqa qhepanmanta llat'ananqa.

²⁰Aserpa t'antanqa sumaqllañan kanqa, paymi reypa mikhunanta hina haywanqa.

²¹Neftaliqa china taruka hina purikuqllan, munay tarukachakunata wachaq.

²²Joseqa llanllashaq sach'a hinan, pukyu patapi rururashaq sach'a hinan, k'allmankunan perqa pataman mast'arikun.

²³Paytaqa wach'iqkunan cheqnikurqanku, wach'irqanku, qatiykachashallarqanku,

²⁴chaypas wach'inanqa qaqatan sayarqan, makintapas Jacobpa kallpayoq Diosninmi kallpacharqan, payqa Israelpa Michiqninmi, Waqaychaqninmi.

²⁵Taytaykiq Diosninmi yanapasunki, Tukuy-atiyniyoq Diosmi saminchasunki hanaq pacha saminchakunawan, lamar-qocha ukhu saminchakunawan, askha wawakunawanpas.

²⁶Taytaykiq saminchankunaqa wiñay-wiñay orqokunamantapas aswanraqmi, wiñay-wiñay orqokunaq qhapaq kaqninkunamantapas aswanraqmi, chaykuna Josepaq kachun, wawqenkunamanta akllasqapaq kachun.

²⁷Benjaminqa qechukuq atoqmi, tutamantan mikhunqa qechusqanta, ch'isiyaykuytataq rakinqa qechusqankunata, nispa.

²⁸Chaykunan chunka iskayniyoq Israel ayllu, paykunatan taytankuqa sapankankuta samincharqan.

²⁹Chaymantataq paykunata kamachirqan: — Wañukapullasaqñan, ñawpa taytaykunaq kasqanpin p'ampampuwankichis, Het runa Efronpa chakranpi kashaq qaqa wasipi,

³⁰Macpela chakrapi kashaq qaqa wasipi. Chaymi Canaán hallp'a Mamreq inti lloqsimuyninpi kashan. Chaytan chay chakratawan kuska Abrahamqa aya p'ampananpaq Het runa Efronmanta rantisqa.

³¹Chaypin p'amparqanku Abrahamtapas warmin Saratapas, chaypin p'amparqayku Isaactapas warmin Rebecatapas, chaypin Leatapas ñoqa p'amparqani.

³²Chakrapas chaypi kaq qaqa wasipas Hetpa churinkunamanta rantisqan, nispa.

³³Churinkunata Jacob kamachiyta tukuqtintaq chakinqa puñunanpi k'unkuykurqan, hinaspan wañukapurqan, ñawpa taytankunamantaq huñukapurqan.