Read Diospa Simin Qelqa GÉNESIS 50 Bible Online

GÉNESIS 50 - Diospa Simin Qelqa bible

GÉNESIS 50

¹Chaymi Joseqa taytanta oqllaykuspa waqaspa, much'aykurqan.

²Chaymantataq Joseqa kamachirqan hampiq kamachinkunata taytanta hampikunawan ch'akichinankupaq, chaymi hampiqkunaqa Israelta ch'akichirqanku.

³Tawa chunka p'unchaymi payta ch'akichirqanku, ahinapin hunt'akuq ch'akichina p'unchaykuna. Egipto runakunataq qanchis chunka p'unchayta Jacobmanta waqarqanku.

⁴Llakikusqan p'unchay qhepatataq Joseqa rimapayarqan Faraonpa wasinpi kaqkunata: — Sumaqta qhawariwankichis chayqa, valekuykichis Faraonta rimapayapuwaychis:

⁵Taytaymi jurachiwarqan: Wañukapusaqñan, Canaán suyupin aya p'ampanata ñoqapaq ruwakurqani, chaypin p'ampawanki, nispa. Valekuykin kunan rispay taytayta p'ampamunaypaq, hinaspataq kutimpusaq, nispa.

⁶Hinan Faraonqa nirqan: — Riy, taytaykita p'ampamuy, paypa jurachisqasuykiman hina, nispa.

⁷Hinan Joseqa taytanta p'ampamuq rirqan, Faraonpa llapa oficialninkuna, wasinpi kaq kurak runakuna, Egipto suyupi llapa kurak runakunapas riysillarqankutaq.

⁸Hinallataq Josepa ayllunpas, wawqenkunapas, taytanpa ayllunpas rirqanku. Gosén hallp'apiqa saqeykurqanku wawakunallatan, ovejankutawan wakankutawan.

⁹Rillarqantaqmi paywanqa carretakunapipas, caballopi sillaykusqakunapas, chay hinapin askhallaña runa karqan.

¹⁰Hinaspanmi chayarqanku Atad erakama, chaymi kashan Jordán chimpapi, chaypin waqarqanku khuyay sonqo nanayta qaparispa, Josetaq taytanmanta lutokurqan qanchis p'unchayta.

¹¹Chayneqpi tiyaq Canaán runakunataq Atad erapi waqaqta rikuspa, nirqanku: — Kayqa Egipto runakunaq aya p'ampayninpi sonqo nanay waqayninkun, nispa. Chaymi chayta suticharqanku Abel-mizraimta,[47] chaymi kashan Jordán chimpapi.

¹²Jacobpa wawankunan ruwarqanku taytankuq kamachisqanman hina.

¹³Canaán suyumanmi aparqanku hinaspan Macpela chakra qaqa wasipi p'ampamurqanku, chaytan chay chakratawan kuska Abrahamqa rantisqa Het runa Efronmanta, aya p'ampanapaq, chaymi Mamreq inti lloqsimuyninpi kashan.

¹⁴Hinaspataqmi p'ampasqanku qhepata Joseqa Egiptoman kutipurqan, paypas, wawqenkunapas, taytanta p'ampamuq paywan llapa riqkunapas.

¹⁵Taytankuq wañukapusqan qhepatataq Josepa wawqenkunaqa ninakurqanku: — Joseqa cheqnikuwasunpaschá, lliw mana chaninta payta ruwasqanchismanta, aynitapaschá kutichiwasun, nispa.

¹⁶Hinaspanmi Joseman kacharqanku: Taytanchismi manaraq wañukapushaspa kamachikurqan:

¹⁷Kay hinatan Joseta ninkichis: Valekuykin, wawqeykikunaq mana chanin ruwasqan huchanta pampachanaykipaq, mana allintan rikurqasunkiku, nispa. Chayraykun kunan valekuykiku, taytanchispa Diosninpa kamachinkunan kayku, mana chanin ruwasqaykuta pampachaykuwayku, nispa, nimunankupaq. Josetaq waqarqan willaqkuna rimashaqtinku.

¹⁸Rillarqankutaq wawqenkunapas, hinaspa ñawpaqenpi pampakama k'umuykukuspa, nirqanku: — Kaypin kashayku kamachiyki kanaykupaq, nispa.

¹⁹Josetaq ichaqa paykunata nirqan: — Ama manchapakuychischu, ñoqaqa manan Dioschu kani.

²⁰Qankunaqa mana allinniypaqmi yuyaykurqankichis, Diosmi ichaqa allinman tukuchirqan kunan rikusqanchista ruwanapaq, askha runata kawsachinapaq.

²¹Chay hinaqa, ama manchapakuychischu, ñoqan uywasqaykichis qankunatapas wawaykichistapas, nispa. Chay hinatan paykunata sonqocharqan, sumaqtataq rimapayarqanpas.

²²Joseqa Egiptopin tiyarqan, paypas, taytanpa ayllunpas. Joseqa kawsarqan pachak chunkayoq watatan.

²³Rikurqantaq Efrainpa wawankunata kinsakaq miraykama, Manasespa churin Maquirpa wawankunapas Josepa moqon patapin uywasqa karqanku.

²⁴Chay qhepatataq Joseqa wawqenkunata nirqan: — Wañukapusaqmi, cheqaqtapunin Diosqa watukamusunkichis, hinaspan kaymanta pusapusunkichis Abrahamman, Isaacman, Jacobmanwan prometesqan hallp'aman, nispa.

²⁵Hinaspan Joseqa Israelpa wawankunata jurachirqan: Cheqaqtapunin Diosqa watukamusunkichis, chaypachan tulluykunata kaymanta apapunkichis, nispa.

²⁶Joseqa wañukapurqan pachak chunka watayoq kashaspan, hinan hampikunawan ch'akichirqanku, Egiptopitaq huk cajonpi churaykusqa karqan.