Read Diospa Simin Qelqa GÉNESIS 7 Bible Online

GÉNESIS 7 - Diospa Simin Qelqa bible

GÉNESIS 7

¹Señor Diosmi Noeta nirqan: — Arcaman haykuy llapa familiaykipiwan, qantan kay wiñay-masiykikuna ukhupi chaninta rikuyki.

²Lliw sacrificana animalmanta qanchis orqota qanchis chinatawan haykuchinki, mana sacrificana animalkunamantataq iskaytakama, orqotawan chinatawan.

³Hinallataq phalaq animalkunamantapas qanchis orqota qanchis chinatawan. Chaytaqa ruwanki kay pachantinpi sapanka t'aqa ama tukukunanpaqmi.

⁴Qanchis p'unchaymantataq ñoqa kay pachaman parachimusaq tawa chunka p'unchayta tawa chunka tutatawan, hinan hayk'an kawsaq ruwasqayta kay pachamanta ch'usaqyachisaq, nispa.

⁵Hinaqtinmi Noeqa Señor Diospa tukuy kamachisqanman hina ruwarqan.

⁶Noé soqta pachak watayoq kashaqtinmi para unuqa kay pachata millp'urqan.

⁷Noetaq arcaman warmintin haykurqan, hinallataq paywan kuska churinkunapas warmintinkama, millp'uq para unumanta ayqenankupaq haykurqanku.

⁸Sacrificana animalkunamanta mana sacrificana animalkunamantapas, phalaq animalkunamantapas lliw pampanta suchuqkunamantapas,

⁹orqontin chinantin, iskay-iskaymanta Noewan kuska arcaman haykurqanku, Noeta Diospa kamachisqanman hina.

¹⁰Qanchis p'unchaymantataq millp'uq para unu kay pachata millp'urqan.

¹¹Soqta pachak watayoq Noé kashaqtinmi, iskaykaq killapi, chunka qanchisniyoq p'unchaypi manchay chinkay-chinkay ukhumanta llapa pukyukuna t'oqyamurqan, hanaq pacha phawchikunapas kicharikamurqan,

¹²hinaqtinmi kay pachapi sinchita pararqan tawa chunka p'unchayta tawa chunka tutatawan.

¹³Chay kikin p'unchaypin Noeqa arcaman haykurqan, hinallataq churinkunapas Sem, Cam, Jafet, Noepa warminpas, churinkunaq kinsantin warminkunapas.

¹⁴Paykunawan llapa salqa animalkuna, uywakuna, pampanta llapa suchuqkuna, llapa phalaq animalkuna, llapa phalaq kurukunapas, t'aqankuman hina haykurqanku.

¹⁵Noepa kasqan arcamantaq llapallan kawsaq animalkuna haykurqanku iskay-iskaymanta.

¹⁶Chinantin orqontinmi tukuy rikch'aq animalkuna haykurqanku Diospa Noeta kamachisqanman hina. Señor Diostaq punkuta wisq'aykapurqan.

¹⁷Millp'uq para unutaq kay pachapi tawa chunka p'unchaynintin paramurqan, unun askhayaspa chay arcata hoqarirqan, hinan unu patapi tuyurqan.

¹⁸Unuqa kay pachapi aswan-aswantan hunt'aykusharqan, hinan unu patapi chay arcaqa tuyusharqan.

¹⁹Unutaq sinchitapuni wichasharqan, kay pachantinpi llapa hatuchachaq alto orqokunapas millp'usqan karqan.

²⁰Orqokunata millp'usqanmantapas qanchis metrotawanraqmi unuqa wicharqan.

²¹Lliw kawsaqmi kay pachapi wañurqan: Phalaq animalkuna, uywakuna, salqa animalkuna, pampanta llapa suchuqkuna, llapa runakunapas.

²²Llapa samayniyoq hayk'an hallp'a pachapi kawsaqmi wañurqan.

²³Ahinatan Diosqa kay pachamanta lliw kawsaqta ch'usaqyachirqan, runatapas, animalkunatapas, pampanta suchuqkunatapas, phalaq animalkunatapas. Noé sapallanmi qheparqan, paywan arcapi kaqkunapiwan.

²⁴Unuqa kay pachapi qocharayarqan pachak phisqa chunka p'unchayta.