Read Diospa Simin Qelqa GÉNESIS 9 Bible Online

GÉNESIS 9 - Diospa Simin Qelqa bible

GÉNESIS 9

¹Diosmi Noeta churinkunatapas saminchaspa nirqan: — Askhata miraychis, kay pachaman hunt'aykuychis.

²Qankunatan anchatapuni manchakusunkichis kay pacha lliw animalkuna, phalaq animalkunapas, hayk'an pampanta suchuqkunapas, lamar-qochapi lliw challwakunapas, chaykunaqa makiykichispiñan.

³Chay animalkunaqa mikhunaykichispaqmi kanqa, hinallataq yuyukunapas q'omer yurakunapas. Lliwtan qoykichis.

⁴Yawarnintin aychatan ichaqa ama mikhunkichischu, yawarpin kawsayqa kashan.

⁵Runa wañuchiqtaqa huchachasaqpunin, animaltapas, runatapas, runamasinta wañuchiqtapas.

⁶Runa wañuchiqtaqa runallataqmi wañuchinqa, Diospa rikch'ayninman hina runaqa ruwasqa kasqanrayku,

⁷qankuna ichaqa askhata miraychis, kay pachaman hunt'aykuychis, nispa.

⁸Diosmi Noeta churinkunatawan nillarqantaq:

⁹— Ñoqan kunan qankunawan mirayniykichiswanpas rimanakuni,

¹⁰hinallataq arcamanta qankunawan lloqsimuq llapa kawsashaqkunawanpas rimanakuni: phalaq animalkunawan, uywakunawan, salqa animalkunawanpas.

¹¹Qankunawanmi rimanakuni, manañan astawan millp'uq para unu kanqachu llapa kawsashaqta p'uchukachinapaq, kay pachatapas p'ampachinapaq.

¹²Kaymi kanqa qankunawan lliw kawsaqwan wiñay-wiñaypaq rimanakusqay señal:

¹³K'uychiytan phuyupi sayachini, kaymi kay pachawan rimanakusqay señal kanqa.

¹⁴Kay pachaman phuyuchimuqtiytaq phuyupi k'uychiqa rikhurinqa.

¹⁵Chaymi yuyarisaq qankunawan lliw kawsaqwanpas rimanakusqayta, manañataq astawan kanqachu millp'uq para unu lliw kawsaqta p'uchukachinanpaq.

¹⁶Phuyupi k'uychi kaqtinmi, ñoqa chayta rikuspay ñoqawan kay pachapi lliw kawsaqwanpas rimanakusqayta yuyarisaq, nispa.

¹⁷Diosmi Noeta nirqan: — Kay k'uychin kay pachapi kaq lliw kawsaqwan rimanakusqay señal churasqay, nispa.

¹⁸Arcamanta lloqsimuq Noepa churinkunan karqan: Sem, Cam, Jafetpiwan. Camtaq Canaanpa taytan karqan.

¹⁹Chay kinsantinmi Noepa churinkuna karqan, paykunaq mirayninmi kay pachantinman mast'arikurqan.

²⁰Noeqa chakra llank'aytan qallarirqan, hinaspan uvas chakrata ruwarqan.

²¹Vinota ukyaspataq macharqapurqan, hinaspan karpan ukhupi q'alalla wikch'urayasharqan.

²²Canaanpa taytan Camtaq taytanpa q'ala-kayninta rikurqan, hinaspan hawapi kashaq iskaynin wawqenkunaman chayta willamurqan.

²³Hinaqtinmi Semqa Jafetpiwan qatanata hoqarirqanku, hinaspanmi iskayninku chayta rikrankuman churaykukuspa, mana qhepankuta qhawaspa qhepanpamanta rispa, taytankuta qataykurqanku, chay hinapin taytankuq q'ala-kayninta mana rikurqankuchu.

²⁴Noetaq ch'aki sonqo kapuspan, sullk'akaq churinpa imachus ruwasqanta yacharqan.

²⁵Chaymi nirqan: — ¡Ñakasqa kachun Canaán! ¡Wawqenkunaq kamachinpa kamachin kachun! nispa.

²⁶Nillarqantaq: — ¡Sempa Diosnin Señorqa saminchasqa kachun, Canaantaq Sempa kamachin kachun!

²⁷¡Jafet-ta Dios hatunchachun, Sempa karpankunapitaq tiyachun, Canaantaq Jafetpa kamachin kachun! nispa.

²⁸Noeqa kawsarqan millp'uq para unu qhepamanta kinsa pachak phisqa chunka watataraqmi,

²⁹hinaspan wañukapurqan isqon pachak phisqa chunka watayoq kashaspa.