Read Diospa Simin Qelqa 2 SAMUEL 12 Bible Online

2 SAMUEL 12 - Diospa Simin Qelqa bible

2 SAMUEL 12

¹Señor Diosmi profeta Natanta Davidman kacharqan. Wasinman haykuspataq Natanqa reyta nirqan: — Huk llaqtapin iskay runakuna karqan, huknin wakcha, huknintaq qhapaq.

²Qhapaq runaqqa askhan ovejanpas wakanpas karqan.

³Wakcha runaqmi ichaqa huk rantikusqan oveja chitallan kapurqan. Chaytan munasqata uywakurqan, wawankunatawan kuska wiñachirqan, mikhunanmanta mikhuchispa, jarronmanta ukyachispa, qhasqonpi puñuchispa. Munakurqanmi ususinta hina.

⁴Huk p'unchaymi qhapaq runaman qorpachakuq chayarqan, hinan qhapaq runaqa ovejankunamanta wakankunamanta mana nak'ayta munarqanchu, aswanpas wakcha runaq ovejachanta suwarqospa nak'arqan qorpachakuqman haywarinanpaq, nispa.

⁵Chayta uyarispataq Davidqa qhapaq runapaq sinchita phiñakuspa Natanta nirqan: — ¡Señor Diospa sutinpin jurani chay hina ruwaq runaqa wañuchisqan kanan!

⁶Tawa ovejatataq pagapunan, mana khuyapayaspa chay hina ruwasqanmanta, nispa.

⁷Hinan Natanqa nirqan: — ¡Qanmi kanki chay runaqa! Israelpa Diosnin Señormi nin: Ñoqan Saulmanta qespichispa aceitewan hawirqayki Israelpi rey kanaykipaq.

⁸Wiraqochayki Saulpa wasinta warminkunatapas munaychakunaykipaq qorqayki, hinallataq Judatapas Israeltapas kamachinaykipaq hap'ichirqayki. Chaykuna pisi kaqtinqa astawanraqmi yapaykiman karqan.

⁹¿Imanaqtintaq simiyta pisichaspa chay mana chaninta ruwarqanki? Qanmi Het runa Uriastaqa Amón runakunawan sipichirqanki, warmintapas warmichakurqanki.

¹⁰Chayraykun aylluykipi qonqaylla sipisqakunaqa kallanqapuni, Uriaspa warminta warmichakuspayki ñoqata pisichawasqaykirayku.

¹¹Kikin aylluykimantan qanpaq mana allinta hatarichisaq, ñawpaqeykipin warmiykikunata huk qhari masiykiman qosaq, paykunawantaq puñunqa lliw runaq rikushasqan.

¹²Qanqa mana piqpa yachasqanmi chayta ruwarqanki, ñoqataq ichaqa llapa Israelpa rikusqan sut'i p'unchaypi kay nisqayta hunt'asaq, nispa.

¹³Hinan Davidqa Natanta nirqan: — ¡Señor Dios contran huchallikuni! nispa. Natantaq nirqan: — Huchaykikunatan Señor Dios pampachasunki, manan wañunkichu.

¹⁴Señor Diosta sinchita pisichasqaykiraykun ichaqa naceq wawayki wañunqa, nispa.

¹⁵Chaykunata nispataq Natanqa wasinta kutipurqan. Señor Diostaqmi Uriaspa warmin Davidpaq wachakusqan wawata sinchi mana allinta onqochirqan.

¹⁶Hinan Davidqa Diosmanta wawapaq mañakurqan, ayunarqantaq. Wasinman kutimpuspataq pampapi puñurqan.

¹⁷Chaymi kurak oficialninkuna sayarichiq rirqanku, Davidtaq mana kasukurqanchu, manallataq paykunawan mikhuytapas munarqanchu.

¹⁸Qanchis p'unchay qhepatataq wawaqa wañupurqan, hinan oficialninkunaqa anchata manchakurqanku wawaq wañupusqanta Davidman willayta. Ninakurqankutaq: Wawa kawsashaqtinraq rimapayasqanchista mana uyariwarqanchischu, nitaq kasuwarqanchischu. Wawan wañupun, nisunman chayqa, ¡imataraqchá ruwanman! nispa.

¹⁹Davidtaq chay chhiwchinakusqankuta uyaripakuspa, wawaq wañupusqanta repararqan, chaymi tapuykurqan: — ¿Wañupunchu wawa? nispa. Paykunataq: — Wañupunmi, nirqanku.

²⁰Chaymi Davidqa pampamanta sayarispa bañakurqan, q'apaq hawinawan hawikurqan, limpio p'achawantaq churakurqan, hinaspan Señor Diospa wasinta yupaychaq rirqan. Chaymanta wasinta kutipuspataq mikhunata mañakuspa mikhurqan.

²¹Chaymi oficialninkunaqa nirqanku: — ¿Imataq kay ruwasqaykiri? Wawayki kawsashaqtinmi waqarqanki ayunarqanki, kunantaq wañupuqtin hatarispayki mikhupushanki, nispa.

²²Paytaq kutichirqan: — Kawsashaqtinqa waqarqani ayunarqani, icha Dios ñoqata khuyapayawaspa wawata kawsachinman, nispaymi.

²³Kunanqa wañupun chayqa, ¿imapaqñataq ayunayman? ¿Kawsarichiyta atiymanchu? Manan payqa ñoqaman kutimunmanñachu, aswanpas ñoqan payman ripusaq, nispa.

²⁴Chay qhepatataq Davidqa warmin Betsabeta sonqocharqan, hinaspan paywan puñurqan. Betsabetaq wiksallikuspa qhari wawata wachakurqan, Salomontataq suticharqanku. Señor Diosqa chay wawata munakurqanmi,

²⁵chayraykun payqa profeta Natanwan Davidman willachirqan Jedidiasta[4] sutichanankupaq.

²⁶Joabmi Rabá llaqtapi Amón runakunawan maqanakurqan, hinaspan reypa tiyanan pukarata munaychakurqan.

²⁷Chaymi payqa Davidman willachimurqan: Rabá llaqtata muyuykuspan llaqtaq ukyanan pukyuta hap'ishani.

²⁸Chhaynaqa, chaypi kashaq qharikunata huñuy, hinaspa hamuy kay llaqtata hap'ikapunaykipaq, mana chayqa, ñoqan haykusaq, hinan sutiywan llaqtata sutichanqaku, nispa.

²⁹Chaymi Davidqa llapa qharikunata huñurqospa Rabá llaqta contra maqanakuq rirqan, atipaspataq llaqtata hap'ikapurqan.

³⁰Hinaspa Amón runakunaq diosnin Milcommanta sumaq umiña rumiyoq qori coronata qechurqan, chay coronan pesarqan kinsa chunka kinsayoq kilo hina, Davidpa umanmantaq churarqanku. Hinallataq askha llat'anasqakunata llaqtamanta aparqan.

³¹Chay llaqta runakunatataq campoman horqospa, llank'achirqan sierrawan, rastrawan, fierro hachawan, wakintataq ladrillo kanana hornopi llank'achirqan. Amón runakunaq llapan llaqtankunapi kaqkunatapas kaqllatataq ruwarqan. Chaymantataq Davidqa llapa ejercitontin Jerusalenman kutipurqan.