Read Diospa Simin Qelqa 2 SAMUEL 19 Bible Online

2 SAMUEL 19 - Diospa Simin Qelqa bible

2 SAMUEL 19

¹Joabmantaq willarqanku Absalonmanta reypa llakikushasqanta waqashasqanta.

²Hinan chay p'unchay llapan ejercitopaq maqanakuypi atipasqankuqa llakikuyman tukupurqan, paykunan uyarirqanku reyqa churin wañusqanmanta anchata llakikusqanta.

³Hinan llapan soldadokunapas ch'inlla sumaqllata llaqtaman haykurqanku, maqanakuymanta ayqekamuq p'enqasqa soldadokuna hina.

⁴Chaykamataq reyqa umanta hap'iykukuspa, alto kunkawan qaparirqan: ¡Churilláy, churiy Absalón! ¡Absalón churíy! nispa.

⁵Hinan Joabqa reypa kasqan wasita haykuspa nirqan: — Kunanmi llapa soldadoykikunata p'enqachispa k'umuykachinki, paykunan kawsayniykita, churiykikunatapas, ususiykikunatapas, warmiykikunatapas, tiyaqmasi warmiykikunatapas kacharichin.

⁶Kayta ruwaspaykiqa sut'inchanki cheqnikuqniykikunata munakusqaykitan, munakuqniykikunatataq cheqnikusqaykita. Hinallataq ejercitoykiq umallinkunatapas soldadoykikunatapas mana valeqpaq hina qhawarinki. Llapaykuña wañuykuman karqan chaypas, Absalontaq kawsanman chayqa, kusikuwaqmi karqan.

⁷Chhaynaqa sayariy, hawaman lloqsiy, hinaspa sumaqta rimaykuy soldadoykikunata, mana chayqa, Señor Diospa sutinpin jurani manan ch'ulla soldadopas kunan tuta qanwan qhepanqachu. Chaymi wayna kasqaykimantapacha kunankama muchusqaykimantapas aswan mana allinraq kanqa, nispa.

⁸Hinan reyqa sayarimuspa llaqta punkupi tiyaykurqan, chayta yachaspataq llapan ejército paypa ñawpaqenman huñukamurqan. Israel runakunaqa wasinkumanmi sapanka ayqekapurqanku.

⁹Hinan llapan Israel ayllukunapi ch'aqwarqanku: Rey Davidqa awqanchiskunamanta Filistea runakunamantapas kacharichiwarqanchismi, kunantaq Absalonmanta karuta ayqekapun.

¹⁰Ñoqanchisqa Absalonta rey kananpaqmi aceitewan hawirqanchis, ichaqa maqanakuypin wañupun. Chhaynaqa, ¿imanaqtintaq mana rimarinchischu reypa kutimpunanpaq? nispa.

¹¹Chayta yachaspataq rey Davidqa sacerdote Sadocman Abiatarmanwan willaqta kacharqan: Judapi kurak runakunata khaynata niychis: ¿Imanaqtintaq hinalla qhepakunkichis, manataq reytaqa wasinman kutichipunkichischu? Israel runakunaqa llapanmi rimarinña reyta kutichipunanpaq.

¹²¿Qankunari yawarniy kashaspachu, qhepallaña kawaqchis? nispa.

¹³Amasatapas nillaychistaq: ¿Qanpas manachu yawarnillaytaq kanki? Señor Dios muchuchiwachun kunanmanta hinaneqman ejercitoypa umallinta Joabpa rantinpi mana qanta churaqtiyqa, nispa.

¹⁴Ahinatan Davidqa llapan Judá runakunata uyachirqan, chaymi ch'ulla qhari hinalla reyman willachimurqanku: Kutimpuy llapan runaykikunapiwan, nispa.

¹⁵Hinan reyqa kutipuspa Jordán mayuman chayarqan. Judá runakunataq Gilgal llaqtaman chayarqanku reyta chaskiq mayu pasayta yanapaq ima.

¹⁶Bahurim llaqtayoq Benjamín ayllumanta Gerarpa churin Simeitaq usqhaylla phawarirqan Judá runakunapiwan reyta chaskinankupaq.

¹⁷Riysillarqankutaq Benjamín ayllumanta waranqa qharikuna. Hinallataq Saulpa ayllunpa kamachin Sibapas chunka phisqayoq churintin iskay chunka uywasqankunapiwan Jordán mayu pataman chayarqanku manaraq rey chayashaqtin.

¹⁸Hinaspan reypa kasqan chimpaman pasarqanku reypa familianta mayu pasayta yanapananpaq, hinallataq ima kamachintapas ruwananpaq. Chaymantataq mayuta rey pasarqoqtin, Simeiqa payman qayllaykuspa k'umuykukurqan,

¹⁹hinan reyta nirqan: — Reyníy, pampachaway Jerusalenmanta lloqsimushaqtiyki mana chanin ruwasqayta, ama huchachawayñachu, amañataq chaytaqa yuyariyñachu.

²⁰Reqsikunin huchayta, chaymi kunan José ayllumanta ñawpaqta hamuni qanta chaskiq, qanqa señorniymi reyniymi kanki, nispa.

²¹Sarviaq churin Abisaitaq chayta uyarispa nirqan: — ¿Manachu Simeiqa wañunman Señor Diospa akllakusqan reyta ñakasqanmanta? nispa.

²²Davidtaq ichaqa nirqan: — Manan imapas qokusunkichischu qankunamanqa. ¿Imanaqtinmi mana allinta yuyaychawankichis? Ñoqan kunan Israelpi rey kani, chayraykun mana ch'ulla Israel runapas kunanqa wañunmanchu, nispa.

²³Simeimantaq jurarqan: — Manan wañunkichu, nispa.

²⁴Saulpa nieton Mefibosetpas hamullarqantaq reyta chaskiq. Paymi chakinta mana mayllikurqanchu, sunkhantapas mana k'isukurqanchu, p'achantapas mana t'aqsakurqanchu, reypa lloqsisqan p'unchaymanta Jerusalenman allillan kutipunankama.

²⁵Jerusalenmanta rey chaskiq hamuqtintaq, reyqa payta nirqan: — ¿Imanaqtintaq mana ñoqawanchu rirqanki? nispa.

²⁶Paytaq kutichirqan: — Señor reyníy, qanqa yachankin wist'u kasqayta, ñoqa kamachiykiqa nirqanin: Asnota caronapuway, sillaykukuspa reywan rinaypaq, nispa, ichaqa kamachiy Siban q'otuwarqan.

²⁷Paymi ñawpaqeykipi yanqa tumpawan. Qanqa, señor reyníy, Diospa angelnin hinan kanki, chayrayku mayqenchá allin rikch'akusunki chayta ruway.

²⁸Taytaypa llapa ayllunqa reypa wañuchinanpaqpunin karqan, chaywanpas reyníy, qanmi mesaykipi mikhunaypaq waqyachiwarqanki. Chhaynaqa, ¿ima nispataq niyta atiykiman? nispa.

²⁹Reytaq nirqan: — ¿Imapaqtaq askhata rimasunman? Ñoqaqa yuyaykuni Sibapiwan hallp'ata t'aqanakunaykichistan, nispa.

³⁰Mefiboset-taq kutichirqan: — Señor reyníy, allillantaq wasiykiman kutipushanki chayqa, llapanta Siba hap'ikapuchun, nispa.

³¹Galaad runa Barzilaipas Rogelim llaqtamanta uraykamullarqantaq. Jordán mayuta pasashaqtin reyta puriysinanpaq.

³²Payqa pusaq chunka watayoq yuyaqñan karqan. Mahanaim llaqtapi rey kashaqtinmi, reyman mikhunata qorqan, qhapaq runa kasqanrayku.

³³Hinan reyqa nirqan: — Haku ñoqawan Jerusalenta, chaypi uywakampusqayki, nispa.

³⁴Barzilaitaq kutichirqan: — Manan unaytañachu kawsayman Jerusalenman rinanchispaqqa.

³⁵Pusaq chunka watayoqñan kani, manan reparaniñachu allintapas mana allintapas. Manan sumaqtañachu mikhunipas ukyanipas. Takiqkunaq kunkantapas manan uyariniñachu. ¿Imapaqñataq sasa uywanaykipaq riyman?

³⁶Aswanpas Jordán mayu haqayneqkama puriysisqayki, amaña imatapas qowayñachu. Valekuykin, kutipullasaq llaqtayman tayta-mamay p'ampana qayllapi wañukapunaypaq.

³⁷Aswanpas, señor reyníy, Quimam churiymi kaypi kashan, pay richun servinasuykipaq, ima munasqaykita payman qoy, nispa.

³⁸Reytaq nirqan: — Arí, richun ñoqawan Quimam churiyki. Imatachus munasqaykitataq paywan ruwasaq, ima mañakusqaykitapas ruwasaqmi, nispa.

³⁹Hinan llapan runakuna reyta pusaspa Jordán mayuta chimpachirqanku. Chaypitaq reyqa Barzilaita saminchaspa much'aykurqan, hinan payqa wasinta kutipurqan.

⁴⁰Reytaq Gilgal llaqtaman rirqan Quimamwan kuska, hinallataq llapan Judá runakunawan Israel kuskan runakunapiwan.

⁴¹Chaymantataq llapan Israel runakunaqa reyman qayllaykuspa nirqanku: — ¿Imanaqtintaq Judamanta wawqeyku qharikunari pakallapi suwaq hina Jordanta pasachimusunki, familiaykita, llapan qanwan kashaqkunatapas? nispa.

⁴²Chayta uyarispan Judá qharikunaqa kutichirqanku: — Aylluyku rey kaqtinmi chaytaqa ruwayku. Chayri, ¿chaymantachu phiñakunkichis? Manan ñoqaykuqa reypa mikhuchisqanchu kayku, manataq ima regalotapas chaskiykuchu, nispa.

⁴³Chaymi Israel runakunaqa kutichillarqantaq: — Qankunaqa ch'ulla ayllullan kankichis, ñoqaykutaq chunka ayllu kayku reypa kamachisqan, chayraykun yanapanayku tupawanku. ¿Imanaqtintaq pisichawankichis khaynata? ¿Manachu ñoqayku ñawpaqta rimarirqayku rey kutimunanpaq? nispa. Judamanta qharikunataq ichaqa sinchi phiña simikunawan kutichirqanku.