Read Diospa Simin Qelqa 2 SAMUEL 21 Bible Online

2 SAMUEL 21 - Diospa Simin Qelqa bible

2 SAMUEL 21

¹Davidpa tiemponpin hatun yarqay karqan kinsa watantin. Hinan Davidqa chay yarqaymanta Señor Diosta tapurqan, paytaq kutichimurqan: — Gabaón llaqta runakunata wañuchisqanku hawan Saulpiwan ayllunpiwan ñakasqa kanku, nispa.

²(Gabaón runakunaqa manan Israel t'aqa runakunachu karqan, aswanpas Amor runakuna miraymanta qhepaqkunan karqan. Paykunawanmi Israel runakunaqa rimanakurqan mana wañuchinanpaq, Saultaq ichaqa wañuchispa tukurqoyta munaq, Israelpaqpas Judapaqpas allin kananta yuyaspa). Hinan Davidqa Gabaón runakunata waqyarispa nirqan:

³— ¿Imanasaqtaq qankunawan? ¿Imatataq ruwasaq allipunananchispaq, Señor Diospa llaqtanta saminchanaykichispaq? nispa.

⁴Gabaón runakunataq kutichirqanku: — Manan ñoqaykuqa qolqewanchu qoriwanchu allipunaykuman Saulwanpas ayllunwanpas, manallataqmi munaykuchu Israelpi hukllapas wañunantaqa, nispa. Hinan Davidqa nirqan: — ¿Ima ruwanaytataq munankichisri? nispa.

⁵Paykunataq kutichirqanku: — Haqay Saulqa sinchitan qatiwarqanku wañuchiwarqanku, llapaykutataq Israel suyumanta ch'usaqyachiyta munarqan.

⁶Payqa Señor Diospa akllakusqanmi karqan, chaywanpas ayllunmanta qanchis qharita qowayku, Saulpa llaqtan Gabaapi Señor Diospa ñawpaqenpi warkuspa seq'omusaqku, nispa. Rey Davidtaq: — Qosqaykichismi, nirqan.

⁷Saulpa nieton Mefiboset-taqa manan wañuyman hap'ichirqanchu, taytan Jonatanwan Señor Diospa ñawpaqenpi rimanakusqankurayku.

⁸Aswanpas hap'ichirqan Saulpa churinkunata Armonitawan Mefiboset-tawan, chaykunatan Ajaq ususin Rizpa sutiyoq Saulpaq wachakurqan. Hinallataq Saulpa ususin Merabpa phisqa churinkunatapas hap'ichirqan, chaykunatan Merabqa Mehola llaqtayoq Barzilaipa churin Adrielpaq wachakurqan.

⁹Hinan chaykunata Gabaón runakunaman qorqan, paykunataq orqopi Señor Diospa ñawpaqenpi warkuspa seq'orqanku, hinan wañurqan qanchisnintin. Chay ruwasqankuqa cosecha hoqariy tiempon karqan, cebada ichhuy qallarishaqtin.

¹⁰Hinan Ajaq ususin Rizpa sutiyoqqa luto p'achanta qaqa pataman mast'arqan, paytaq chaypi karqan cosecha tiempomantapacha para qallariy tiempokama, makillataq qhawaq ayakunaman alton phalaq animalkuna p'unchay chayananmanta, salqa animalkuna tuta qayllananmantapas.

¹¹Saulpa tiyaqmasin Rizpaq ruwasqanta Davidman willaqtinkun,

¹²payqa Galaadpi Jabes llaqtaman rirqan, hinaspa Saulpa Jonatanpa tullunkunata chay llaqta runakunamanta apamurqan (Filistea runakunan Gilboa orqopi Saulta wañuchispa, Betsán llaqta plazaman Saultawan Jonatantawan warkurqanku, chaykunatan Jabes runakuna suwamurqanku).

¹³Hinan chaymantapacha Saulpa Jonatanpa tullunkunata apachirqan, hinallataq qanchis warkusqakunaq tullunkunatapas huñuchirqan.

¹⁴Chaymi Saulpa Jonatanpa tullunkunata Benjamín hallp'a Zela llaqtapi Saulpa taytan Cispa ayan p'ampasqaman p'ampaykapurqanku, hinaspan reypa tukuy kamachikusqanta ruwarqanku. Chaymantataq Diosqa llaqtankumanta mañakusqankuta uyarirqan.

¹⁵Filistea runakunan wakmanta Israel runakunawan maqanakurqan. Hinan Davidqa soldadonkunapiwan rispa, Filistea runakunawan maqanakurqan, Davidtaq sinchita sayk'urqapurqan.

¹⁶Isbi-benobmi Davidta wañurqachiyta munarqan, paymi hatuchaq t'aqa miraymanta karqan, broncemanta lanzanmi pesarqan kinsa kilo kuskanninta, espadanpas mosoqllan karqan.

¹⁷Hinan Sarviaq churin Abisaiqa yanapaq chayarqan, hinaspa chay Filistea runata phawaykuspa wañurqachirqan. Chaymi llapan soldadonkuna Davidta nirqanku: — Amaña kunanmantaqa ñoqaykuwan maqanakuyman lloqsinkiñachu, manan munaykuchu Israelpa k'anchaynin wañunanta, nispa.

¹⁸Chaymantataq Gob llaqtapi Filistea runakunawan maqanakurqanku. Hinan Husaq miraynin Sibecaiqa hatuchachaq t'aqa miraymanta Safta wañurqachirqan.

¹⁹Huktawanmi kikillanpitaq maqanakuspanku, Belén llaqtayoq Jairpa churin Elhanán Gat llaqtayoq Goliat-ta wañurqachirqan. Goliatpa lanzan hap'inanmi karqan telarpi bayeta k'uyuna k'aspi hina sinchi rakhu.

²⁰Huk kutitawanmi Gat llaqtapi Filistea runakunawan maqanakurqanku. Chaypin huk qhari hatun sayayniyoq karqan, hatuchachaq t'aqa miraymanta. Paymi sapanka makinpipas chakinpipas soqta dedoyoqkama karqan, chaymi llapanpiqa iskay chunka tawayoq dedo karqan.

²¹Israelta pay k'amiqtinmi, Davidpa wawqen Simeaq churin Jonatanqa wañurqachirqan.

²²Chay tawantinmi Gat llaqtapi hatuchachaq t'aqa miraymanta karqanku, Davidtaq soldadonkunapiwan paykunata wañuchipurqanku.