Read Diospa Simin Qelqa 2 SAMUEL 22 Bible Online

2 SAMUEL 22 - Diospa Simin Qelqa bible

2 SAMUEL 22

¹Saulmanta llapan awqankunamantawan Señor Dios qespichiqtinmi, Davidqa kay hinata Señor Diosman takirqan:

²— Señor Diosqa hatun Qaqaymi, hark'aykuwaqniymi, qespichiwaqniymi.

³Diosniyqa pakakunay Qaqan, waqaychawaqniymi. Payqa escudo hina hark'aykuwaqniymi, atiyniyoq qespichiwaqniymi, ancha hatun pakakunaymi, payqa maqanakuylla munaq runamanta qespichiwaqniymi.

⁴Señor Diosqa yupaychanapaq hinapunin, waqyakuqtiymi awqaykunamanta qespichiwan.

⁵Wañuymi qocha phoqchiqey hina millp'urqoyta munawarqan, suchuq lloqlla hinan p'ampaykuwarqan.

⁶Wañuymi sinchita mayt'uykuwarqan, wañuymi seq'onantin maskhawarqan.

⁷Llaki phutiyniypin Señor Diosta waqyakurqani, Diosniytan waqyakurqani, ch'uya wasinmantan uyarimuwarqan, waqyakusqaytan uyarirqan.

⁸Señor Diosmi phiñakurqan chaymi kay pachaqa khatatatarqan chhaphchikurqan, chaymi hanaq pachaq teqsinkuna khatatatarqan kuyurirqan.

⁹Senqanmantan q'osñi lloqsimurqan, siminmantan ruphakuq nina qallumurqan, rawrashaq k'illimsakunan phawamurqan.

¹⁰Hanaq pachata kicharqospanmi uraykamurqan, chakinmanmi yanay-yana phuyu phuyuykamurqan.

¹¹Huk querubinpi sillaykukuspan phalamurqan, wayra chawpipin rikuchikurqan.

¹²Muyuykuqnin tutayaqwanmi pakachikurqan, para yana phuyunwanmi p'istuchikurqan.

¹³Ñawpaqenpi lliphllikishaq k'anchaymantan rawrashaq k'illimsakuna lloqsimurqan.

¹⁴Señor Diosmi hanaq pachamanta q'aqyaqemurqan, Ancha Hatun Diospa kunkanmi uyarikurqan.

¹⁵Wach'inankunatan wach'imurqan, awqankunan ch'eqerirqan, manchay lliphllikiyninwanmi ch'usaqyachirqan.

¹⁶Señor Dios phiñariqtinmi, sinchitapuni q'aqchaykuqtinmi, lamar-qochaq ukhunraq rikhurimurqan, kay pachaq teqsinraq rikhurimurqan.

¹⁷Señor Diosmi hanaqmanta hap'iykamuwarqan, manchay ukhu unumantan horqomuwarqan.

¹⁸Atiyniyoq awqaymantan qespichiwarqan, cheqnikuqniykunamantan kacharichiwarqan, paykunaqa ñoqamanta sinchi kallpayoqmi karqanku.

¹⁹Llakiq qatisqan kashaqtiymi phawaykamuwarqanku, Señor Diosmi ichaqa hark'aykuwarqan.

²⁰K'iskichaymantan kacharichimuwarqan, munakuwaspanmi qespichiwarqan.

²¹Señor Diosmi chanin kasqayman hina qhawariwarqan, ch'uya kasqayman hinan saminchawarqan.

²²Señor Diospa ñanninpin purirqani, manan Diosniymanta t'aqarikurqanichu huchallikunaypaq.

²³Kamachikuy siminkunatan yuyallanipuni, unanchay siminkunatan kasullanipuni.

²⁴Ñawpaqenpiqa pay sonqollapunin karqani, huchallikuymantaqa t'aqakurqanin.

²⁵Chaymi Señor Diosqa chanin kasqayman hina qhawariwarqan, ch'uya kasqayman hina saminchawarqan.

²⁶Señor Diosníy, hunt'aqpaqqa hunt'aqllataqmi kanki, chanin runapaqqa chaninllataqmi kanki,

²⁷ch'uyapaqqa ch'uyallataqmi kanki, millay kawsaqpaqqa yuyaysapan kanki.

²⁸Qanmi huch'uyyaykukuqta qespichinki, uma hoqariqtataq k'umuykachinki.

²⁹Señor Diosníy, qanqa k'anchayniymi kanki, qanmi laqhayayniyta k'anchapuwanki.

³⁰Yanapayniykiwanmi llat'anaqkunaman phawaykuni, kallpaykiwanmi llaqta perqaman seqani.

³¹Diospa ñanninqa chaninpunin, Señorpa siminqa cheqaqpunin, payqa escudo hinan pakaykukuqninkunapaq.

³²Señorllapunin Diosqa, Diosnillanchispunin hatun Qaqaqa.

³³Diosmi kallpachawaqniyqa, paymi ñanniyta allichaqqa.

³⁴Paymi tarukata hina phawachiwan, paymi orqokunapi allinta sayachiwan.

³⁵Paymi awqa-tinkuypaq yachachiwan, chaymi bronce p'eqtata chutani.

³⁶Qanmi atipana escudoykita qowanki, llamp'u sonqo kayniykin hatunchawan.

³⁷Purishaqtiymi allinman saruchiwanki, manan chakiyqa llusk'anchu.

³⁸Awqaykunata qatispaymi wañuchirqani, manan kutimunichu tukunaykama.

³⁹Paykunatan sarurqani, ñawpaqeymanmi kumpakamurqanku, manañan sayarimunkuchu.

⁴⁰Qanmi awqa-tinkuypaq kallpachawarqanki, churanakuwaqniykunatan k'umuykachimuwarqanki.

⁴¹Awqaykunatan qayllaymanta qatirirqanki, cheqnipakuwaqniykunatan ñut'urqanki.

⁴²Yanapaykuqpaqmi waqyakurqanku, manataqmi pipas qespichiqninku karqanchu, Señor Diosmanmi waqyakurqanku, paytaq paykunata mana uyarimurqanchu.

⁴³Hallp'ata hinan ñut'uta kutarqani, callekunapi t'uruta hinan sarurqani.

⁴⁴Ch'aqwa sayarichiq llaqtamantan qespichiwarqanki, suyukunaq umallin kanaypaqmi waqaychawarqanki, mana reqsisqay llaqtakunan serviwanku.

⁴⁵Wak llaqtayoqkunan qonqorikuwarqanku, ñoqamanta uyarispanku hinan kasukurqanku,

⁴⁶paykunan pisi kallpayapurqanku, pakakunankumantan khatatataspa lloqsimurqanku.

⁴⁷¡Señor Diosqa kawsachun! ¡Saminchasqa hatun Qaqayqa kachun! ¡Hatunchasqa atiyniyoq qespichiqniy Diosqa kachun!

⁴⁸Diosmi ñoqamanta ayni-kutichiqqa, llaqtakunatapas k'umuykachimuwaqniyqa,

⁴⁹awqaykunamanta horqowaqniyqa. Señor Diosníy, qanmi hatunchawanki contray hatariqkunamanta, maqanakuylla munaq runamantan qespichiwarqanki.

⁵⁰Chayrayku, Señor Diosníy, suyukuna ukhupin yupaychasqayki, sutiykita hatunchaspan takisaq.

⁵¹Qanmi akllakusqayki reyta yanapaspa atipachinki, hawisqayki reytan munakushallankipuni. Davidta miraynintawanmi wiñaypaq khuyakunki, nispa.