Read Diospa Simin Qelqa 2 SAMUEL 23 Bible Online

2 SAMUEL 23 - Diospa Simin Qelqa bible

2 SAMUEL 23

¹Kaykunan Davidpa tukupay rimasqankuna: Isaipa churin Davidmi nirqan, hatunchasqa qharin nirqan, Jacobpa Diosninpa hawisqan, Israelpi misk'i takiq:

²— Señor Diospa Espiritunmi ñoqanta riman, siminkunan simiypi kashan.

³Israelpa Diosninmi nirqan, Israelpa hatun Qaqanmi niwarqan: Pipas runakunata chanin-kaywan kamachiqmi, pipas Diosta manchakuywan kamachiqmi,

⁴pacha illariy k'anchay hina kashan, tutamanta q'ala cielopi inti k'anchay hina kashan, para thaniyta q'achu llanllariy hina kashan, nispa.

⁵Aylluyqa chay hinapunin Diospa ñawpaqenpi, paymi ñoqawan wiñaypaq rimanakurqan, allin wakichisqata cheqaqta rimanakurqan. Payqa yanapallawanqapunin, tukuy yuyaykuyniytapas t'ikarichinqan.

⁶Mana chaninkunan ichaqa wikch'usqa khiska hina, manan pipas makillawan hap'iyta atinmanchu,

⁷hoqariy munaqqa fierrowan lanza hap'inawanmi hap'in, ninapitaq hukpaqkama ruphaykapun, nispa.

⁸Kaykunan Davidpa mentasqa soldadonkunaq sutinkuna: Hacmoni llaqtayoq Joseb-basebetmi kinsantin umallikunaq qollanan karqan, paymi huk maqanakuypi pusaq pachak qharikunata lanzanwan wañurqachirqan.

⁹Kinsantinkumanta iskaykaq Ahoh ayllumanta Dodoq churin Eleazarmi karqan, paymi Davidwan Filistea runakunata pisicharqan, maqanakuypaq huñusqa kashaqtinku. Israel runakuna maqanakuymanta qhepaman kutiriqtinpas,

¹⁰payqa kaqpin qheparqan, chaymi Filistea runakunaman phawaykurqan sayk'unankama, espadapas makinman k'askarqan. Haqay p'unchaymi Señor Diosqa allinta atipachirqan. Hinan Israel runakuna kutimurqanku Eleazarman, ichaqa wañusqakuna llat'anaqllaña.

¹¹Kinsakaqtaq Harar llaqtayoq Ageq churin Sama karqan. Filistea runakuna Lehipi huñukuqtinmi, Israel runakunaqa paykunamanta ayqerqanku. Chaypin chakra hunt'a lenteja wiñasharqan,

¹²Samataq chay chakrapi sayaykuspa Filistea runakunata atiparqan. Ahinapin Señor Diosqa anchata atipachirqan.

¹³Cosecha tiempopin kinsa chunka umallikunamanta kinsa umallikuna Adulam qaqa wasi qayllapi kashaq Davidman uraykurqanku. Filistea soldadokunataq karpakuspa Refaim wayq'opi kasharqanku.

¹⁴Davidqa pukarapin kasharqan, Filistea soldadokuna Belén llaqtapi kashaqtin.

¹⁵Hinan Davidqa anchata ch'akichikuspa nirqan: ¡Ayyha, pillapas ukyaykachiwanman Belén llaqta punku p'uytu unuta! nispa.

¹⁶Chaymi kinsantin qhari soldadokunaqa Filistea soldadokunata tanqarparispa karpa-karpankuman haykurqorqanku, hinaspa Belén llaqta punku p'uytumanta unuta horqomuspanku Davidman aparqanku. Davidtaq ichaqa mana ukyayta munarqanchu, aswanpas Señor Diospaq ofrendata hina hich'arparirqan, nirqantaq:

¹⁷¡Amapuni Señor Diospas munachunchu chayta ukyanayta! Kay qharikunaq yawarnintapas ukyayman hinachá kanman, paykunan wañuyta mana manchakuspa unuta apamuwarqanku, nispa. Chaymi mana ukyayta munarqanchu. Chaytan ruwarqan kinsantin umalli qharikuna.

¹⁸Sarviaq churin Joabpa wawqen Abisaitaq kinsa chunka qharikunaq umallin karqan. Paymi huk kutin kinsa pachak soldadokunata lanzanwan wañuchirqan, chaymi paypas kinsa umalli qharikuna hinallataq mentasqa karqan,

¹⁹ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqa kaspan, paykunaq umallin kapurqan.

²⁰Cabseel llaqtayoq Joiadaq churin Benaian allin qhari kallarqantaq, paymi musphanakunata ruwarqan. Moabmanta maqanakuypi mentasqa iskay qharikunatan wañuchirqan. Hinallataq huk p'unchay rit'ishaqtin, t'oqoman haykuspa huk leonta wañuchirqan.

²¹Hatun sayayniyoq Egipto runatapas wañuchillarqantaq. Chay runaqa lanza hap'intinmi kasharqan, Benaiataq k'aspi hap'intin. Hinaspataq Egipto runaq lanzanta qechurqospa chay kikin lanzanwan wañurqachirqan.

²²Chaytan ruwarqan Joiadaq churin Benaía, chaymi paypas kinsa umalli qharikunawan kuska mentasqallataq karqan,

²³ichaqa manapunin paykunaman ayparqanchu. Chaywanpas kinsa chunka qharikunamanta aswan mentasqan karqan. Hinan Davidqa waqaychaqnin guardiakunaq umallinta churarqan.

²⁴Joabpa wawqen Asaelpas kinsa chunka qharikunamanta hukninmi karqan. Hinallataq Belén llaqtayoq Dodoq churin Elhanán,

²⁵Harod llaqtayoq Sama, Elicapiwan,

²⁶Pelet llaqtayoq Heles, Tecoa llaqtayoq Iquespa churin Ira,

²⁷Anatot llaqtayoq Abiezer, Husa ayllumanta Melbunai,

²⁸Ahoh llaqtayoq Salmón, Netofa llaqtayoq Maharai,

²⁹Netofa llaqtayoq Baanaq churin Helet, Benjamín ayllumanta Gabaa llaqtayoq Ribaipa churin Itai,

³⁰Piratón llaqtayoq Benaía, Gaas k'aha-k'ahamanta Hidai,

³¹Arabá qheswamanta Abi-albón, Bahurim llaqtayoq Azmavet,

³²Saalbón llaqtayoq Eliaba, Gizón llaqtayoq Jasén, Arar llaqtayoq Samaq churin Jonatán,

³³Arar llaqtayoq Sararpa churin Ahiam,

³⁴Maaca llaqtayoq Ahasbaipa churin Elifelet, Giba llaqtayoq Ahitofelpa churin Eliam,

³⁵Carmel llaqtayoq Hezrai, Arab llaqtayoq Paarai,

³⁶Soba llaqtayoq Natanpa churin Igal, Gad ayllu runa Bani,

³⁷Amón suyu runa Selec, Sarviaq churin Joabpa arma apaysiqnin Beerot llaqtayoq Naharai,

³⁸Jatir llaqtayoq Irawan Garebpiwan,

³⁹Het runa Uriaspiwan. Llapankupitaq kinsa chunka qanchisniyoq karqanku.