Read Diospa Simin Qelqa 2 SAMUEL 24 Bible Online

2 SAMUEL 24 - Diospa Simin Qelqa bible

2 SAMUEL 24

¹Wakmantan Señor Diosqa Israel runakuna contra phiñakurqan, chaymi paykuna contra Davidta yuyaykachispa nirqan: — Israel runakunata Judá runakunata yupamuy, nispa.

²Hinan rey Davidqa paywan kashaq ejercitonpa umallin Joabta kamachirqan: — Israelpa llapan ayllunkunata Dan llaqtamanta Beerseba llaqtakama purimuy, hinaspa runakunata yupamuy hayk'achus paykuna kasqanta yachanaypaq, nispa.

³Joabmi ichaqa nirqan: — Señor reyníy, pachak kutitaraq Diosniyki Señor Dios llaqtaykita askhayachichun, chayta rikunaykipaqtaq kawsawaqraq, ichaqa, ¿imanaqtintaq runa yupanata munanki? nispa.

⁴Chaywanpas reyqa mana uyarispan Joabta llapa ejército umallikunatapas kamachishallarqan. Hinan Joabqa ejército umallikunapiwan reypa qayllanmanta lloqsirqan Israel runakunata yupaq.

⁵Jordán mayuta pasarqospataq Aroer llaqtamantawan wayq'opi kashaq llaqtamantawan yupayta qallarirqanku, hinaspa Gad ayllunta Jezer llaqtaman chayarqanku.

⁶Chaymantataq Galaad hap'iyman rirqanku, hinallataq Het runakunaq suyunpi Cades llaqtamanpas. Hinaspan Dan Jaan llaqtaman chayarqanku, chaymantataq Sidón llaqtaman muyuykurqanku.

⁷Tiro llaqta pukaramanpas, llapan Hev runakunaq Canaán runakunaq llaqtankunamanpas chayarqanku, hinaspataq Neguev ch'inneqpi kashaq Beerseba llaqtapi tukupurqanku.

⁸Isqon killa iskay chunka p'unchaymi suyupi llapan llaqtakunata purispa tukurqanku, chaymantataq Jerusalenman kutimpurqanku.

⁹Hinan Joabqa runa yupasqanmanta reyman willarqan, chaymi karqan: Israelmanta pusaq pachak waranqa maqanakuy atiq qharikuna, Judamantataq phisqa pachak waranqa qharikuna.

¹⁰Chaymantataq Davidqa llaqtata yupasqanmanta ñakapakuspa Señor Diosta nirqan: — Sinchitan huchallikuni chayta ruwaspa. Rogakuykin, Señor Diosníy, pampachaykuway huchayta, mana yuyayniyoq hinan ruwarqani, nispa.

¹¹Qhepantin tutamanta Davidpa hatarimunanpaqqa Señor Diosqa Davidpa yuyaychaqnin profeta Gadta nirqanña:

¹²Phaway Davidman, hinaspa nimuy, Señor Diosmi nin: Kinsa muchuchiytan wakichini, kinsantinmanta hukta akllakuy, hinan chaywan muchuchisqayki, nispa.

¹³Chaymi Gadqa Davidman willaq rispa nirqan: — ¿Kay kinsantinmanta mayqentan munanki? ¿Qanchis wata llaqtayki yarqaymanta ñak'arinantachu? ¿Awqaykikuna qatisuqtiyki kinsa killa ayqeytachu? Icha, ¿kinsa p'unchay millay onqoy suyuntinpi kanantachu? Allinta yuyaykuy, niwaytaq kachamuwaqniyman willanaypaq, nispa.

¹⁴Chaymi Davidqa profeta Gadta nirqan: — Hatun llaki phutiypin kashani. Chaypas manan runakunaq muchuchisqan kayta munanichu, aswanpas Diospa muchuchiwanantan munani, payqa ancha khuyapayakuqmi, nispa.

¹⁵Hinan Señor Diosqa chay kikin paqarmantapacha minchhakaq p'unchaykama millay onqoyta Israel suyuntinman kachamurqan, chaymi Dan llaqtamanta Beerseba llaqtakama qanchis chunka waranqa runakuna wañurqanku.

¹⁶Jerusalenta ángel ch'usaqyachiyta munaqtinmi, Señor Diosqa muchusqankumanta llakikuspa llaqta muchuchiq angelta nirqan: — ¡Chaykamalla! ¡Amaña muchuchiyñachu! nispa. Kaq ratopachan Señor Diospa angelninqa Jebus runa Araunaq eranpi kapusharqan.

¹⁷Davidtaq llaqta muchuchiq angelta rikuspa Señor Diosta nirqan: — ¡Ñoqan huchallikuni! ¡Ñoqan mana allintaqa ruwani! ¿Ima huchayoqtaq kay runakunari? Rogakuykin, ñoqata familiaytawan muchuchiwayku, nispa.

¹⁸Chay p'unchaytaq Gadqa Davidman rispa nirqan: — Jebus runa Araunaq eranta riy, chaypi Señor Diospaq altarta sayarichimuy, nispa.

¹⁹Davidtaq Señor Diospa kamachisqanta kasukurqan Gadpa nisqanman hina.

²⁰Araunataq reyta oficialninkunatawan wasinman hamushaqta rikuspa, phawarispa ñawpaqenpi pampakama k'umuykukurqan.

²¹Hinaspanmi reyta tapuykurqan: — ¿Imallamantaq señor reyníy, kamachiykimanri hamushanki? nispa. Davidtaq kutichirqan: — Eraykita rantikuqmi hamushani, Señor Diospaq altarta sayarichinaypaq kay millay onqoy chinkapunanpaq, nispa.

²²Araunataq Davidta nirqan: — Señor reyníy, hayk'an munasqaykita hap'iy haywanaykipaq. Kayqa torokunapas ruphachina sacrificiota haywanaykipaq, saruna k'ullukunapas yugokunapas ruphachinaykipaq.

²³Reyníy, llapan chaykunatan qoyki. ¡Ichapaschá Diosniyki Señor Dios chay haywasqaykita chaskisunkiman! nispa.

²⁴Reytaq ichaqa kutichirqan: — Manan yanqallanqa munanichu, aswanpas pagapusqaykin hayk'aña valeqtinpas. ¿Mana qolqeypaq chanin sacrificiotachu Diosniy Señor Diosman haywayman? nispa. Chaymi Davidqa phisqa chunka qolqeta Araunaman pagapurqan eramanta torokunamanta ima.

²⁵Chaymantataq altarta Señor Diospaq sayarichirqan, hinaspa ruphachina sacrificiokunata sumaq kawsay sacrificiokunatawan haywarqan. Chaymi Señor Diospa llaqtanpaq mañakusqanta uyarirqan, hinan millay onqoyqa Israelpi chinkapurqan.