Read Diospa Simin Qelqa 2 SAMUEL 4 Bible Online

2 SAMUEL 4 - Diospa Simin Qelqa bible

2 SAMUEL 4

¹Saulpa churin Isbosetmi Hebrón llaqtapi Abnerpa wañusqanta yacharqospa reparakurqan manaña atiyniyoqchu kasqanta, hinallataq llapa Israel runakunapas sinchita mancharikurqanku.

²Isbosetpa llat'anaq t'aqanpin iskay umallikuna karqan, hukpa sutinmi Baana karqan, hukkaqpataq Recab, Benjamín ayllumanta Beerot llaqtayoq Rimonpa churinkuna.

³Beerot llaqtayoq runakunaqa Gitaim llaqtaman ayqepuspan, chaypi karu llaqtayoq hina tiyapurqanku. Chaymi Beerot llaqtaqa Benjamín aylluman yupasqa kapurqan.

⁴Saulpa churin Jonatanpa huk churinmi wist'u chakiyoq karqan, Mefiboset sutiyoq. Phisqa watayoq kashaqtinmi, Saulwan Jonatanwan wañusqan Jezreel llaqtamanta uyarikurqan, hinan wawa amani warmiqa wawata aparikuspa ayqesharqan, usqhaylla phawashaspataq wawata pampaman atipachikurqan. Chaymi wist'u kapurqan.

⁵Beerot llaqtayoq Rimonpa churinkuna Recabwan Baanawan rispankun, chawpi p'unchayta Isbosetpa wasinta haykurqanku, Isboset-taq puñunan wasipi puñusharqan p'unchaypa aswan q'oñi horasninpi.

⁶Wasin punku qhawaqpas trigo ch'uyanchasqanpin puñurqapullasqataq, hinan Baanaqa wawqen Recabpiwan mana piqpa rikusqallan Isbosetpa wasinta haykurqanku.

⁷Pay puñunapi puñushaqtintaq wañurqachispa umanta qhorurqanku. Chayta aparikuspan tutantin Hebrón llaqtaman purirqanku Jordán qheswa wayq'o ñanninta.

⁸Chayaspataq rey Davidman rikuchirqanku: — Señor reyniyku, kayqa Saúl awqaykiq churin Isbosetpa uman, paymi wañuchiyta munarqasunki. Kunantaq ichaqa Saulta miraynintapas muchuchispa Señor Diosqa vengachisunki, nispa.

⁹Hinan rey Davidqa Beerot llaqtayoq Rimonpa churin Baanaman Recabmanwan kutichirqan: — ¡Juranin tukuy ñak'ariyniykunamanta qespichiwaqniy Señor Diospa sutinpi!

¹⁰Allin kasqanpaq yuyaspa Saulpa wañusqanta willawaqniy runatapas, “allinmi” ninaymantaqa Siclag llaqtapin hap'ispa wañuchirqani.

¹¹¡Chaychu kay mana allin runakunata chanin qharita wasinpi puñukushaqta wañuchimusqankumanta mana wañuchiyman! ¿Chaychu manaqa wañuchisqaykichismanta vengakuyman, kay pachamantapas qankunata ch'usaqyachispay? nispa.

¹²Chaymi Davidqa soldadonkunata nirqan: — Wañuchimuychis, nispa. Paykunataq wañuchirqanku, hinaspan chakinta makintawan qhorurqospanku, Hebronpi estanque qayllaman warkurqanku. Isbosetpa umantataq Hebronpi Abner p'ampasqaman p'ampapurqanku.