Read Diospa Simin Qelqa 2 SAMUEL 8 Bible Online

2 SAMUEL 8 - Diospa Simin Qelqa bible

2 SAMUEL 8

¹Chay qhepatataq Davidqa Filistea runakunata atiparqan, hinaspan suyu kamachinanta qechuspa munaychakurqan.

²Hinallataq Moab runakunatapas atiparqan, hinaspan paykunata pampaman thallaykachispa, cordelwan tupuchirqan: Pikunachus cordelwan iskay tupusqa ukhupi kaqkunan wañuchisqa karqanku, huk tupusqa ukhupi kaqkunataq kawsarqanku. Chaymi Moab runakunaqa Davidpa kamachisqan kapurqanku, contribuciontapas pagarqanku.

³Soba suyu rey Rehobpa churin Hadad-ezertapas Davidqa atipallarqantaqmi Eufrates mayu qaylla hallp'anta kutichikapuq rishaqta.

⁴Hinaspan Davidqa waranqa qanchis pachak caballoyoq soldadokunata, iskay chunka waranqa chakillapi puriq soldadokunatawan presota apamurqan, carreta aysaq caballokunatapas yaqa llapanta hank'unta kuchurqarirqan, pachak carretakunallapaqña puchuchikurqan.

⁵Damasco llaqtamanta Aram soldadokunataq Hadad-ezerman maqanakuypi yanapaq hamurqanku, ichaqa Davidmi paykunatapas atipaspa iskay chunka iskayniyoq waranqa soldadokunata wañuchirqan.

⁶Chaymi Davidqa Aram suyupi Damasco llaqtaman soldado t'aqakunata churarqan, hinan Aram runakunaqa Davidpa kamachisqan kapurqanku, contribuciontapas pagarqanku. Ahinatan Señor Diosqa Davidta maypiña kaqtinpas atipachillarqanpuni.

⁷Chaymantataq payqa Hadad-ezerpa oficialninkunaq apasqan qori escudokunata qechurqospa Jerusalenman aparikurqan.

⁸Hinallataq Hadad-ezerpa llaqtankuna Betamanta Berotaimantawan askha bronceta hap'ikurqan.

⁹Hamat suyu rey Toin Hadad-ezerpa llapan soldadonkunata Davidpa atipasqanta yachaspa,

¹⁰churin Joramta rey Davidman napaykuqta kacharqan qorimanta, qolqemanta, broncemanta regalokunatawan apachispa: — Allinpunin Hadad-ezerta maqanakuypi atiparqanki, nispa. Hadad-ezerqa Hamat suyu rey Toiq awqanmi karqan.

¹¹Chay regalokunatan rey Davidqa Señor Diospaq t'aqarqan.

¹²Hinallataq Edom suyumanta, Moab suyumanta, Amón runakunamanta, Filistea suyumanta, Amalec runakunamanta llapan apamusqan qorita, qolqeta, Hadad-ezermanta wakin qechumusqankunatawan Señor Diospaq t'aqarqan.

¹³Chaymantataq Davidqa Kachi Qocha Wayq'opi Edom runakunaq chunka pusaqniyoq waranqa soldadonkunata atiparqorqan, chaymi payqa mentasqa kapurqan.

¹⁴Edom suyupitaq soldado t'aqakunata churarqan, hinan llapan Edom runakunaqa Davidpa kamachisqan kapurqanku. Chhaynatan Señor Diosqa Davidta maypiña kaqtinpas atipachillarqanpuni.

¹⁵Llapa Israel suyutan Davidqa kamachirqan, llapa runakunapaqpas chaninkaqta cheqaqkaqta ruwarqan.

¹⁶Sarviaq churin Joabtaq ejercitonpi umalli karqan, Ahiludpa churin Josafat-taq qelqa waqaychaqnin karqan.

¹⁷Ahitobpa churin Sadocwan, Abiatarpa churin Ahimelecpiwantaq sacerdotenkuna karqanku, Seraiastaq qelqaqnin karqan.

¹⁸Joiadaq churin Benaiastaq reypa guardian Ceret runakunaq Pelet runakunaq umallin karqan, Davidpa churinkunataq sacerdotekuna karqanku.