Read Diospa Simin Qelqa 2 SAMUEL 9 Bible Online

2 SAMUEL 9 - Diospa Simin Qelqa bible

2 SAMUEL 9

¹Davidmi nirqan: — ¿Kashanmanraqchu pillapas Saulpa ayllunpi khuyapayanaypaq Jonatanta munakusqayrayku? nispa.

²Saulpa ayllunpa kamachinmi karqan Siba sutiyoq, paytan waqyamurqanku. Hinan reyqa nirqan: — ¿Sibachu kanki? nispa. Paytaq: — Ñoqan kani kamachinaykipaq, nirqan.

³Reytaq tapurqan: — ¿Manachu pillapas Saulpa ayllunqa kanña, Diospa munasqan khuyakuyta payman rikuchinaypaq? nispa. Hinan Sibaqa reyta nirqan: — Kashanraqmi Jonatanpa huk churin, wist'u chakiyoq, nispa.

⁴Hinan reyqa tapuykurqan: — ¿Maypin kashan? nispa. Sibataq nirqan: — Lodebarpi Amielpa churin Maquirpa wasinpin kashan, nispa.

⁵Hinan rey Davidqa Maquirpa wasinta kacharqan pusamuqta.

⁶Rey Davidpa qayllanman chayaspataq, Saulpa churin Jonatanpa churin Mefibosetqa manchakuywan k'umuykukurqan. Hinan Davidqa nirqan: — ¡Mefiboset! nispa. Paytaq kutichirqan: — Ñoqan kani kamachinaykipaq, nispa.

⁷Hinan payqa nirqan: — Ama manchakuychu. Taytaykita munakuspaymi qantapas khuyapayayki. Saúl abueloykiq hallp'anta llapanta qopusqayki, wasiypitaq sapa p'unchay mikhunki, nispa.

⁸Mefiboset-taq wakmanta k'umuykukuspa nirqan: — ¿Pitaq ñoqari kani alqo hina mana serviq kashaqtiy yuyarikuwanaykipaq? nispa.

⁹Reytaq ichaqa Saulpa kamachin Sibata waqyarispa nirqan: — Saulpa llapan kaqninkunata ayllunpatawanmi nieton Mefibosetman qopushani.

¹⁰Chhaynaqa, qan churiykikunapiwan, kamachiykikunapiwan hallp'anta llank'apunki, cosechata hoqarispaykitaq waqaychanki Saulpa nieton Mefibosetpaq, chaywanpas payqa sapa p'unchaymi wasiypi mikhunqa, nispa. Sibaq churinkunan karqan chunka phisqayoq, kamachinkunataq iskay chunka.

¹¹Sibataq reyta nirqan: — Lliw kamachiwasqaykitan llapanta ruwasaq, Señor reyníy, nispa. Mefiboset-taq reypa wasinpi hukkaq churin hina mikhurqan,

¹²paypan huch'uy churichan Micaía sutiyoq karqan. Sibaq wasinpi llapan kaqkunataq Mefibosetpa kamachin karqanku.

¹³Mefibosetqa Jerusalenpin tiyarqan, reypa wasinpitaq mikhurqan, iskaynin chakintaq wist'u karqan.