Read Diospa Simin Qelqa 1 REYES 10 Bible Online

1 REYES 10 - Diospa Simin Qelqa bible

1 REYES 10

¹Sabá suyu reinaqa Salomonman Señor Diospa yachay qosqanwan mentasqa kasqanta uyarispanmi Jerusalenta rirqan sasa tapukuykunawan Salomonta wateqananpaq.

²Hinaspan chayarqan askha runankunapiwan, camellokunapitaq apamurqan q'apaq hawinakunata, askha qorita, umiña rumikunatawan. Salomonman asuykuspataq sonqonpi tukuy yuyaykusqankunata tapukurqan,

³hinan Salomonqa tukuy tapukusqanta kutichirqan, sinchi sasaña kaqtinpas mana sasachaspallan payqa kutichirqan.

⁴Sabá suyu reinaqa Salomonpa yachaynintan uyarirqan, sayarichisqan wasitapas qhawararqan.

⁵Hinallataq rikurqan mesanpi sumaq mikhunakunata, oficialninkunaq tiyasqan wasikunata, kamachinkunaq imayna llank'asqanta, p'achankunata, ukyana haywaqninkunata, Señor Diospa wasinpi ruphachina sacrificiota haywasqantapas, chaymi reinaqa musphaspa chiriyarqan.

⁶Hinaspan reyta nirqan: — Llaqtaypi kashaspayraq ruwasqaykimanta yachayniykimantawan uyarisqayqa cheqaqpunin kasqa.

⁷Runakunaq rimasqantaqa manan cheqaqpaqchu hap'irqani, kunanmi ichaqa ñawiykunawan rikuspa creeni. Chaywanpas qanmantaqa manan kuskantapas willawasqakuchu, yachayniykipas qhapaq kayniykipas willawasqankumantaqa ancha hatunmi kasqa.

⁸¡Kusisamiyoqchá warmiykikunaqa! ¡Ancha kusisqachá oficialniykikunapas! Paykunaqa qayllaykipi kaspanku uyarishallankupunin yachaysapa simiykikunata.

⁹¡Diosniyki Señor Dios hatunchasqa kachun! Paymi allinta qhawarirqasunki, chaymi Israel suyuta qanman hap'ichirqasunki. Señor Diosqa Israelta munakullarqanpunin, chaymi reyta churarqasunki chanin-kaywan kuskachaywan kamachinaykipaq, nispa.

¹⁰Hinaspanmi reinaqa Salomonman qorqan yaqa tawa waranqa kilo qorita, ancha askha q'apaq hawinakunata, umiña rumikunatawan. Manan Israel suyumanqa hayk'aqpas ancha askha q'apaq hawinakunata aparqankuchu, Sabá suyuq reinan Salomonman qosqanta hinaqa.

¹¹Hinallataq Ofirmanta qori apaq Hirampa barconkuna aparqan askha sándalo kurkukunata, umiña rumikunata ima.

¹²Chay sándalo kurkukunamantan reyqa ruwachirqan gradaspi hap'ipakunata Señor Diospa wasinpaqpas paypa wasinpaqpas, tocaqkunapaq ruwachillarqantaq arpakunata tawtinkukunatapas. Chay sándalo kurkuqa sinchi sumaqmi karqan, manataq hayk'aqpas Israel suyumanqa chay hinata apamurqankuñachu.

¹³Rey Salomontaq Sabá suyu reinaman tukuy munasqanta mañakusqantawan qorqan, sapaqtataq sumaq sonqokunataqa qollarqantaq. Chay qhepatan reinaqa suyunman kutipurqan runankunapiwan.

¹⁴Salomonqa sapa watan iskay chunka iskayniyoq waranqa kilo qorita chaskirqan,

¹⁵hinallataq qhatuqkuna, wak suyukunamanta rantiqkuna, Arabia reykuna, kikin suyupi kamachikuqkunapas contribucionta qoripi pagarqanku.

¹⁶Rey Salomonqa iskay pachak hatun escudokunatan ruwachirqan, sapanka escudotataq qanchis kilo qori llaphllawan qatachirqan.

¹⁷Ruwachillarqantaq kinsa pachak huch'uy escudokunatapas, sapankatataq huk kilo kuskannin qori llaphllawan qatachirqan, hinaspa chaykunata churachirqan Líbano Sach'a-sach'a nisqa wasiman.

¹⁸Hinallataq marfilmanta huk hatun tiyanata ruwachikurqan, hinaspa chayta ch'uyanchasqa qoriwan qatachirqan.

¹⁹Chay tiyanaqa soqta pata gradasniyoqmi karqan, wasa k'iraykunan patataq muyu karqan, tiyanaq iskaynin ladonpitaq maki tawnakunan karqan, chaywan kuskataq iskay leonkunaq rikch'aynin sayasharqan.

²⁰Kallarqantaq chunka iskayniyoq leonkuna soqtantin gradaskunaq sapanka ladonpi. Manan hayk'aqpas mayqen suyupipas chay hina tiyanataqa ruwachikurqankuchu.

²¹Reypa llapan vasonkunapas qorimantakaman karqan, hinallataq Líbano Sach'a-sach'a nisqa wasipi serviciokunapas qorimantakama karqan. Manan imatapas qolqemantaqa ruwarqankuchu, Salomonpa tiemponkunapi qolqe mana munasqa kasqanrayku.

²²Salomonpaqa lamar-qochanta puriq barconkunan karqan, chaykunan sapa kinsa wata Tarsismanta Hirampa barconkunawan kuska chayamuqku qori, qolqe, marfil, k'usillukuna, pavo realkuna cargayoq.

²³Rey Salomonqa tukuy kay pachapi reykunamanta allin qhapaq allin yachaysapan karqan.

²⁴Lliw runakunan Salomonta rikuyta munarqanku, Diospa qosqan yachayninta uyarinankupaq.

²⁵Watan-watanmi runakunaqa rey Salomonman rirqan, sapanka runataq sumaq sonqota aparqan: qorimanta, qolqemanta, alhajakunata, p'achakunata, armakunata, q'apaq hawinakunata, caballokunata, mulakunata ima.

²⁶Salomonqa huñurqan waranqa tawa pachak carretakunata, chunka iskayniyoq waranqa caballokunatawan, hinaspan wakinta maqanakuypaq carretakuna waqaychana llaqtakunaman apachirqan, wakintataq Jerusalén llaqta qayllapi waqaycharqan.

²⁷Rey Salomonqa sinchi askhatan Jerusalenpi qolqeta rumita hinaraq hunt'aykachirqan, hinallataq cedro kurkukunatapas Shefela moqo-moqopi k'ita higos sach'ata hinaraq.

²⁸Salomonpa rantiqninkunaqa Musrimanta Ciliciamantawanmi caballokunata reypaq rantimurqanku.

²⁹Egiptomanta rantisqa huk carretaqa soqta pachak qolqen valerqan, huk caballotaq pachak phisqa chunka. Llapan Het reykunapas Siria reykunapas rantikurqanku rey Salomonpa rantiqninkunamantan.