Read Diospa Simin Qelqa 1 REYES 11 Bible Online

1 REYES 11 - Diospa Simin Qelqa bible

1 REYES 11

¹Rey Salomonqa Egipto reypa ususinmantapas wak llaqtayoq askha warmikunatan munakurqan: Moab warmikunata, Amón warmikunata, Edom warmikunata, Sidón warmikunata, Het warmikunatawan.

²Señor Diosmi Israel runakunata kamachisqa: Aman chay suyu warmikunawan casarakunkichischu, paykunaqa sonqoykichistan q'ewichinkuman diosninkuta yupaychanaykichispaq, nispa. Salomontaq ichaqa chay warmikunata wayllukurqan, hinaspan paykunawan tiyarqan.

³Reina warminkunan karqan qanchis pachak, tiyaqmasin warminkunataq kinsa pachak, hinan paykunaqa sonqonta Diosmanta q'ewichirqan.

⁴Yuyaqña Salomón kashaqtinmi warminkunaqa sonqonta q'ewichirqan, hinan wak dioskunata yupaycharqan, payqa manan taytan David hinachu tukuy sonqo Diosnin Señor Diosman hap'ipaykukurqan.

⁵Salomonqa Sidón runakunaq Astarte diosantan yupaycharqan, hinallataq Amón runakunaq millay Milcom diosnintapas.

⁶Ahinatan Salomonqa sinchi mana allinta ruwarqan Señor Dios contra, manataq taytan David hinachu Señor Diosta tukuy sonqo kasukurqan.

⁷Chay tiempokunapin Salomonqa Jerusalenpa inti lloqsimuy lado orqon patapi huk yupaychana wasita sayarichirqan Moab suyuq millay Quemos diosninpaq, Amón suyuq millay Moloc diosninpaqpas.

⁸Llapan wak llaqtayoq warminkunapaqpas yupaychana wasikunata sayarichillarqantaq, chaymi paykunaqa diosninkuman sacrificiota haywarqanku inciensotapas q'apachirqanku.

⁹Hinan Israelpa Diosnin Señorqa Salomonpaq phiñakurqan, paymanta sonqonpi t'aqarikusqanrayku. Señor Diosqa iskay kutitan rikhurisqa,

¹⁰hinaspa kamachisqa: Aman wak dioskunata yupaychankichu, nispa. Salomontaq ichaqa mana kasukurqanchu Señor Diospa kamachisqanta.

¹¹Chayraykun Señor Diosqa Salomonta nirqan: — Yachashaspan rimanakusqayta p'akirqanki, kamachikuyniykunatapas mana kasuwarqankichu. Chhaynaqa, ñoqan kamachisqayki suyuta qechupusqayki, hinaspa huk oficialniykiman qopusaq.

¹²Chaywanpas kawsashaqtiykiqa manan qechusqaykichu taytayki Davidta munakusqayrayku, aswanpas churiykimantañan qechusaq.

¹³Ichaqa manan suyuntintachu churiykimanta qechusaq, huk ayllullataqa payman qosaqmi akllakusqay Jerusalén llaqtarayku, taytaykita munakusqayrayku ima, nispa.

¹⁴Chaymantataq Señor Diosqa Salomón contra huk awqata sayarichirqan, chaymi karqan Edom suyu reypa ayllunmanta Hadad.

¹⁵Edom runakunata David atipashaqtinmi, ejército umalli Joabqa awqa-tinkuypi wañuqkunata p'ampaq rispa, llapan Edom qharikunata wañurqachirqan.

¹⁶Llapan Israel soldadokunapiwantaq soqta killata chaypi qhepakurqanku, Edompi llapan qharikunata wañuchiyta tukunankama.

¹⁷Hadadqa chay pacha erqen karqan, hinataq Egipto suyuman ayqekurqan taytanpa wakin kamachinkunapiwan, paykunaqa Edom runakunan karqan.

¹⁸Chaymi Madianmanta puririspanku Parán llaqtaman chayarqanku, chay llaqta wakin qharikunataq paykunawan huñukurqan. Egipto suyuman chayaspankutaq Egipto suyuq reynin Faraonman qayllaykurqanku, hinan reyqa mikhunata, wasita, hallp'ata ima paykunaman qorqan.

¹⁹Chaymantataq Hadadqa anchata munachikurqan rey Faraonwan, hinan rey Faraonqa warmin Tahpenespa ñañanta qorqan Hadadman casarakunanpaq.

²⁰Chaymantataq reina Tahpenespa ñañanqa Hadadpaq wachakurqan huk qhari wawata, suticharqantaq Genubat-ta. Chay wawatataq Tahpenesqa rey Faraonpa wasinpi uywarqan paypa wawankunatawan kuskata.

²¹Egipto suyupi kashaspataq Hadadqa uyarirqan Davidpa wañukapusqanta, hinallataq ejército umalli Joabpa wañukapusqantapas. Chaymi rey Faraonta nirqan: — Ama hinachu kay, llaqtayta kachaway, nispa.

²²Hinan rey Faraonqa kutichirqan: — ¿Imamantaq llaqtaykitari kutiyta munanki? ¿Imamantachu icha ñoqa kaypi pisichiyki? nispa. Hadadtaq kutichirqan: — Manan imapas pisiwanchu, ichaqa valekuykin rinaypaq, nispa.

²³Diosmi Eliadaq churin Rezonta Salomón contra sayarichillarqantaq. Rezonqa Soba suyu rey Hadad-ezerpa uywasqanmi karqan, payqa uywaqenmantan chinkakusqa.

²⁴Hadad-ezerta atipaspataq Davidqa Hadad-ezerpa runankunata wañuchirqan. Chaymantataq Rezonqa wakin qharikunata huñurqan, chaykunan karqan llat'anaqkuna, Rezontaq umallin karqan. Hinaspataq Rezonqa runankunapiwan Damascota rirqanku, hinan chay qharikunaqa reyninkupaq Rezonta churakurqanku.

²⁵Chaymantataq Rezonqa Israelpa awqan karqan Salomonpa tukuy kawsasqan p'unchay. Payqa Siria rey kaspanmi Israelta cheqnikurqan, imaynan Hadadqa Israelta mana allinta ruwarqan, chay hinallataq paypas mana allinta ruwarqan.

²⁶Hinallataq Nabatpa churin Jeroboampas rey Salomón contra sayarirqan. Payqa Salomonpa oficialninmi karqan, Efraín ayllu Sereda llaqtamanta, mamantaq viuda karqan Zerúa sutiyoq.

²⁷Kaymi Jeroboampa rey contra sayarisqan willakuy: Salomonmi Jerusalenpa inti lloqsimuy cheqasnin p'ukruta hunt'achisharqan, perqa q'asakunatapas wisq'achisharqan.

²⁸Jeroboamqa kusa llank'aq qharin karqan, chaymi Salomonqa kusa llank'asqanta qhawarispa, Efraín ayllu Manasés ayllu mit'ani runakunaq umallinpaq churarqan.

²⁹Chay tiempokunapin Jeroboamqa huk p'unchay Jerusalenmanta lloqsirqan, hinan Silomanta profeta Ahiasqa paywan tuparqan. Ahiasmi huk mosoq capawan p'istuykusqa karqan, paykunallan iskayninku campopi kasharqanku.

³⁰Hinan Ahiasqa p'istukusqan mosoq capata llik'irqan chunka iskayniyoq retazoman.

³¹Jeroboamtataq nirqan: — Chunka retazokunata hap'ikuy, Israelpa Diosnin Señormi kay hinata nisunki: Salomonmantan suyuta qechusaq, hinaspa chunka aylluta qanman qosqayki.

³²Salomonpaqtaq huk ayllullata saqesaq, Jerusalenrayku kamachiy Davidta munakusqayrayku, chay llaqtatan Israelpa llapan ayllunkunamanta akllakurqani.

³³Salomonqa pisichawarqanmi, chaymi Sidón runakunaq diosan Astarteta, Moab runakunaq diosnin Quemosta, Amón runakunaq diosnin Milcomta ima yupaycharqan. Payqa manan kasuwarqanchu, manataq chanintachu ruwarqan, manallataq kamachikuyniytapas, unanchayniytapas David taytan hinachu hunt'arqan.

³⁴Chaypas manan paymantaqa llapan suyutachu qechusaq, aswanpas kawsanankamaqa suyuta kamachillanqapunin akllakusqay David kamachiyta munakusqayrayku, payqa hunt'arqanmi kamachikuyniykunatapas unanchayniykunatapas.

³⁵Churinmantan ichaqa suyuta qechusaq, hinaspa qanman chunka aylluta qosqayki.

³⁶Huk ayllullatan Salomonpa churinpaq saqesaq, kamachiy Davidpa miraynin Jerusalenpi ñawpaqeypi kamachishanallanpaq, chay llaqtatan akllakurqani chaypi ñoqa yupaychasqa kanaypaq.

³⁷Ñoqan qanta churasqayki, hinan Israelpi rey kanki. Tukuy munasqayki llaqtakunata kamachinki.

³⁸Tukuy kamachikusqaykunata kasuwanki, munayniyman hinataq ruwanki, allin kaqta ruwaspataq kamachikuyniykunata unanchayniykunata kamachiy David hina hunt'anki chayqa, qanwanmi kashasaq, aylluykitapas allintan sayachisaq Davidta sayachirqani hinata, Israeltataq qosqayki.

³⁹Davidpa miraynintaqa muchuchisaqmi Salomonpa huchan hawa, ichaqa manan wiñaypaqchu, nispa.

⁴⁰Chaykuna hawan Salomonqa Jeroboamta wañurqachiyta munarqan, Jeroboammi ichaqa Egipto suyuman ayqekapurqan rey Sisacman, hinaspan chaypi qhepakurqan Salomonpa wañukapunankama.

⁴¹Salomonpa wakin ruwasqankunapas, yachayninpas, tukuy kawsayninpas Salomonmanta Willakuy Qelqapi qelqasqan kashan.

⁴²Salomonqa Jerusalenmantan llapan Israel suyuta kamachirqan tawa chunka watantin,

⁴³wañupuqtintaq David taytanpa llaqtanpi p'ampapurqanku. Chay qhepatataq churin Roboam rantinpi kamachikurqan.