Read Diospa Simin Qelqa 1 REYES 15 Bible Online

1 REYES 15 - Diospa Simin Qelqa bible

1 REYES 15

¹Abiamqa Judapi kamachikuyta qallarirqan Nabatpa churin Jeroboam Israelpi chunka pusaqniyoqkaq watapi kamachikushaqtinmi.

²Jerusalenmantataq kinsa watata kamachikurqan. Mamanmi karqan Abisalompa ususin Maaca sutiyoq.

³Payqa taytanpa ruwasqan kikin huchakunallatataqmi ruwarqan, manataq Diosnin Señor Diospaq hunt'aqchu karqan imaynan ñawpa taytan David hunt'aq karqan hinaqa.

⁴Chaywanpas, Diosnin Señor Diosqa Davidta allinta qhawarisqanraykullan paypa mirayninta Jerusalenpi kamachikushanallanpaq churarqan, ahinapin Abiamman huk churita qorqan Jerusalenta waqaychananpaq.

⁵Davidqa Señor Diospa ñawpaqenpi chanintan kawsarqan, payqa manan hayk'aqpas kawsayninpi Señor Diospa kamachikuyninmanta t'aqakurqanchu, aswanpas Het runa Uriasta wañuchisqallanwanmi t'aqakurqan.

⁶Roboam kawsashaqtinqa Jeroboamwan churanakuyllapin karqanku.

⁷Hinallataq chay qhepatapas Abiamwan Jeroboamwan churanakuyllapi karqanku. Abiammanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan.

⁸Abiam wañukapuqtintaq Davidpa Llaqtan nisqapi p'ampapurqanku. Chay qhepatataq churin Asa rantinpi kamachikurqan.

⁹Asaqa Judapi kamachikuyta qallarirqan Israelpi Jeroboam iskay chunkakaq watapi kamachikushaqtinmi,

¹⁰Jerusalenmantataq tawa chunka watata kamachikurqan. Hatun mamanmi karqan Abisalompa ususin Maaca sutiyoq.

¹¹Asaqa Señor Diospa munayninman hinan chaninta ruwarqan ñawpa taytan Davidpa ruwasqanta hina,

¹²payqa suyumantan wikch'urqan yupaychana wasikunapi yupaychaq hamuq qhari-masinkunawan t'inkikuq qharikunatapas, ñawpa taytakunaq ruwasqan llapan idolokunatapas.

¹³Hinallataq hatun maman Maacata reina mama kayninmanta wikch'urqan Asera diosaq millay rikch'ayninta ruwachisqan hawa. Chay rikch'aytan Asaqa ñut'uta chhallurqan, hinaspan Cedrón mayu wayq'opi ruphachirqan.

¹⁴Manaña Israel suyupi orqo patapi yupaychana wasikunata thunirqanchu chaypas, Asaqa Señor Diospaq hunt'aqllapunin karqan tukuy kawsasqan p'unchaykunapi,

¹⁵hinallataq Señor Diospa wasinman churarqan paypas taytanpas Señor Diospaq t'aqasqanku qorita, qolqeta, serviciokunatawan.

¹⁶Asaqa Israel suyu rey Baasawanmi tukuy tiempo maqanakuyllapi karqanku.

¹⁷Baasataq Judata maqanakuq rispa Ramá llaqtata allinta perqachirqan Asaq suyunman haykuqtapas lloqsiqtapas hark'ananpaq.

¹⁸Hinan Asaqa Señor Diospa wasinpi puchuq llapan qorita, qolqeta, paypa qhapaq kayninkunatapas huñuspa, oficialninkunawan apachirqan Siria suyu rey Ben-Hadadman. Payqa Hezionpa churin Tabrimonpa churinmi karqan, tiyarqantaq Damasco llaqtapi. Asaqa kay hina willakuytan apachirqan:

¹⁹Qanwan ñoqawan rimanakusun, imaynan taytanchiskuna rimanakurqan hinata. Kayqa sumaq sonqota apachimushayki qorita, qolqetawan. Israel suyu rey Baasawan rimanakusqaykita saqepuy, ahinapin ñoqaq suyuymanta paykuna ripunqaku, nispa.

²⁰Hinan Ben-Hadadqa rey Asaq nisqanta uyakurqan, chaymi Israel llaqtakunata phawaykunankupaq soldado umallikunata kacharqan. Hinan munaychakurqanku Ijonta, Danta, Abel-Bet-Maacata, llapan Cineret-ta, llapan Neftalí hap'iytawan.

²¹Baasataq chayta yacharqospa manaña Ramá llaqtata perqachirqanñachu, aswanpas Tirsamanmi kutipurqan.

²²Hinan rey Asaqa Judá suyu runakunata llapallanta waqyachirqan, hinaspan Ramá llaqtata perqananpaq Baasaq apasqan rumikunata kurkukunata ima aparqan. Chaykunawantaq rey Asaqa sayarichirqan Benjaminpi Geba llaqtata Mizpa llaqtatawan.

²³Asamanta wakin willakuykunapas, paypa atiyninpas, tukuy ruwasqankunapas, llaqtakunata sayarichisqanpas Judá Reykunaq Willakuynin Qelqapi qelqasqan kashan. Yuyaqña kaspanmi Asaqa chakinmanta onqoykurqan.

²⁴Wañukapuqtintaq Davidpa Llaqtan nisqapi ñawpa taytankunaq p'ampananman p'ampapurqanku. Chay qhepatataq churin Josafat rantinpi kamachikurqan.

²⁵Iskaykaq watapi Judá suyupi Asa kamachikushaqtinmi, Jeroboampa churin Nadabqa Israel suyupi kamachikuyta qallarirqan, iskay watallataq kamachikurqan.

²⁶Payqa manan Señor Diospa munayninman hinachu ruwarqan, taytan hina huchallikuspan Israel runakunatapas huchallichirqan.

²⁷Isacar ayllumanta kaq Ahiaspa churin Baasataq ichaqa Nadab contra hatarirqan, hinaspan Nadabta wañuchirqan, Filistea runakunaq Gibetón llaqtanta Nadabwan Israel soldadokunapiwan muyuykushaqtin.

²⁸Baasaqa Nadabta wañuchirqan Judapi Asa kinsa wata kamachikushaqtinmi, chaymi Nadabpa rantinpi kamachikurqan.

²⁹Kamachikuyta qallarispa hinataq Jeroboampa llapan ayllunta wañuchirqan, manan ch'ullallapas qheparqanchu, Señor Diospa Silomanta profeta Ahiaswan willachisqanman hina.

³⁰Jeroboamqa Israelpa Diosnin Señorta phiñachisqa huchankunawan Israelta huchallichisqanwan, chaymi Señor Diosqa mirayninkunata ch'usaqyachirqan.

³¹Nadabmanta wakin willakuykunapas tukuy ruwasqankunapas Israel Reykunaq Willakuynin Qelqapi qelqasqan kashan.

³²Asaqa Israelpa reynin Baasawanmi tukuy tiempo maqanakuyllapi karqanku.

³³Judá suyupi kinsakaq watapi Asa kamachikushaqtintaq Ahiaspa churin Baasaqa Tirsamanta llapa Israelta kamachiyta qallarirqan, kamachikurqantaq iskay chunka tawayoq watata.

³⁴Payqa manan Señor Diospa munayninman hinachu ruwarqan, aswanpas Jeroboam hinallataqmi huchallikurqan, kaqllataq Israel runakunatapas huchallichirqan.