Read Diospa Simin Qelqa 1 REYES 18 Bible Online

1 REYES 18 - Diospa Simin Qelqa bible

1 REYES 18

¹Unayñan karqan, hinan kinsa watamantaña Señor Diosqa Eliasta nirqan: — Riy, hinaspa Ahabman qayllaykuy, ñan parachisaqña, nispa.

²Hinan Eliasqa rispa Ahabman qayllaykurqan. Sinchi hatunmi yarqay Samaria llaqtapi karqan,

³chaymi Ahabqa Abdías mayordomonta waqyachirqan. Abdiasqa ukhu sonqonmanta manchakuywan Señor Diosta yupaychaqmi karqan,

⁴chaymi payqa Señor Diospa profetankunata Jezabel wañuchiyta qallarishaqtin, pachak profetakunata pakasqa. Iskayman t'aqaspanmi phisqa chunkatakama iskay qaqa t'oqopi pakasqa, mikhunankupaqpas t'antata unutawan qosqa.

⁵Hinan Ahabqa Abdiasta nirqan: — Hamuy, haku puririsun suyuntinta, llapa p'uytukunata, mayukunata ima, ichapaschá q'achuta tarisunman caballokunatapas mulakunatapas kawsachinanchispaq. Mana chayqa, mana uywayoqmi kapusun, nispa.

⁶Chaymi suyuta iskayman t'aqarqanku purinankupaq, hinan Ahabqa huk ñanta rirqan, Abdiastaq hukkaq ñanta.

⁷Ñanta rishaspataq Abdiasqa Eliaswan tuparqan, reqsirqospataq pampakama k'umuykukuspa nirqan: — ¡Wiraqocháy, qanqa Eliasmi kashanki riki! nispa.

⁸Eliastaq kutichirqan: — Arí, ñoqapunin kani. Phaway wiraqochayki Ahabman willamuy kaypi kashasqayta, nispa.

⁹Abdiastaq ichaqa nirqan: — ¿Imapin ñoqa huchallikuni, Ahabman hap'ichiwaspayki sipichiwanaykipaq?

¹⁰¡Diosniyki Señor Diospa sutinpin jurani!, wiraqochay Ahabqa tukuy llaqtakunamanmi suyukunamanmi qan maskhaqta kacharqan. Chaymi, “manan kaypi kanchu Eliasqa” niqkunata payqa jurachirqan cheqaqtapuni mana chaypi tarisqasuykita.

¹¹¡Kunantaq niwanki: Phaway, wiraqochayki Ahabman willamuy kaypi kashasqayta, nispa!

¹²Ñoqa qayllaykimanta t'aqarikuqtiymi, Señor Diospa Espiritunqa maymanpas aparqapusunkiman, manataq yachaymanchu maypichus kashasqaykita. Ahabmantaq willamusaq kaypi kasqaykita, manataq tarisunkichu chayqa, wañuchipuwanqan. Ñoqa kamachiykiqa, wayna kasqaymantapachan Señor Diosta yupaychashallarqanipuni.

¹³¿Manachu willarqasunkiku Señor Diospa profetankunata Jezabel wañuchishaqtin imatachus ruwasqayta? Pachak profetakunatan iskayman t'aqaspay, iskay qaqa t'oqoman phisqa chunkatakama pakarqani, mikhunankupaqpas t'antatawan unutawan qorqani.

¹⁴Kunantaq niwanki: Phaway wiraqochayki Ahabman willamuy kaypi kashasqayta, nispa. ¡Wañuchiwanantachu munanki! nispa.

¹⁵Eliastaq kutichirqan: — ¡Tukuy-atiyniyoq Señor Diospa kamachinmi kani! ¡Paypa sutinpin jurani! Kunanpachan Ahabman qayllaykusaq, nispa.

¹⁶Hinan Abdiasqa Ahabman rispa willarqan, chaymi Ahabqa Eliaswan tupaq rirqan.

¹⁷Rikurqospataq nirqan: — ¡Yaw! ¡Qanchu kanki Israel runakunata sinchi sasachayman churaq! nispa.

¹⁸Eliastaq kutichirqan: — Manan ñoqachu sasachayman churashani, aswanpas qanmi aylluykikunapiwan, Señor Diospa kamachikuyninkunata wikch'uspaykichis, Baal dioskunata yupaychashankichis.

¹⁹Chay hinaqa, kunan kamachikuy Israel runakuna Carmelo orqo patapi huñukuspa ñoqawan tupananpaq. Hinallataq Baal diospa tawa pachak phisqa chunka profetankunata, Asera diosaq tawa pachak profetankunatawan chayman huñuchimuy, chay profetakunatan Jezabel mikhuchin, nispa.

²⁰Chaymi Ahabqa waqyachirqan llapan Israel runakunata, hinaspan Carmelo orqo patapi profetakunata huñuykurqan.

²¹Hinan Eliasqa llapa runakunaman asuykuspa nirqan: — ¿Hayk'aqkaman qankuna iskay yuyaypi kankichis? Señor Diospuni cheqaq Dios kaqtinqa, payta serviychis, Baal kaqtintaq chayta serviychis, nispa. Runakunataq ichaqa mana imanirqankupaschu.

²²Eliastaq wakmanta runakunata nirqan: — Ñoqa sapallayñan kawsashani Señor Diospa profetan, Baal diospa profetankunan ichaqa tawa pachak phisqa chunka kashanku.

²³Chay hinaqa, iskay torillokunata qowayku, paykuna huk torillota akllachun, nak'aspankutaq kuchusqata llant'a pataman churachunku, ichaqa aman ninawan hap'ichinqakuchu. Ñoqapas hukkaq torillota kaqllatataq wakichisaq, hinaspa llant'a pataman churasaq, ichaqa manan ninawan hap'ichisaqchu.

²⁴Chaymantataq qankuna diosniykichista waqyakunkichis, ñoqataq Señor Diosta waqyakusaq. ¡Mayqen dioschus ninawan kutichimuwasun, chaymi cheqaq Dios kanqa! nispa. Hinan llapan runakuna kutichirqanku: — ¡Allinmi nisqayki! nispanku.

²⁵Chaymi Eliasqa Baal diospa profetankunata nirqan: — Akllakuychis huk torillota, hinaspa ñawpaqta wakichiychis qankuna askha kasqaykichisrayku. Chaymantataq diosniykichista waqyakuychis, amataq ninataqa hap'ichinkichischu, nispa.

²⁶Hinan paykunaqa chaskisqanku torillota nak'aspanku wakichirqanku, hinaspan Baal diosta chawpi p'unchaykama waqyakurqanku: — ¡Baal, kutichimuwayku! nispa. Perqasqanku altarpa muyuriqninpitaq saltaspa tusurqanku, ichaqa manan pipas kutichimurqanchu.

²⁷Chawpi p'unchayta hinan Eliasqa paykunata chanzakurqan: — ¡Aswan kunkayoqta waqyakuychis! Payqa huk diosmi riki. ¡Manapaschá tiempon kanchu, hisp'akuqpaschá rin, purinpaschá! ¡Ichapaschá puñushan, rikch'arichiychis! nispa.

²⁸Paykunataq qaparishallarqanku, cuchillowan lanzawan cuerponkuta q'allakuspanku yawar phawanankama, paykunaq ruwayninkuman hina.

²⁹Chawpi p'unchaypas pasarqanñan, paykunataq waq'a hina saltaspanku qaparishallarqanku sacrificio haywana las tres horaskama. Ichaqa manan ima rimaypas uyarikurqanchu. Manan pipas uyarimurqanchu, manallataq kutichimurqanpaschu.

³⁰Hinan Eliasqa llapan runakunata nirqan: — Ñoqaman asuykamuychis, nispa. Chaymi llapan runakuna Eliasman asuykurqanku, paytaq Señor Diospa thunisqa altarninta allicharqan.

³¹Chunka iskayniyoq rumitan hap'irqan, Jacobpa churinkuna hayk'a aylluchus kasqanman hina, paytan Señor Diosqa nisqa: “Israelmi sutiyki kanqa”, nispa.

³²Chay runakunawantaq huk altarta Señor Diospaq perqachirqan. Altar muyuriqtataq yarqhata hina hasp'irqan, chaymi karqan kinsa chunka litro unuq haykunan hina.

³³Llant'ata churaspañataq torillota nak'aspa kuchurqan, hinaspa altar pataman churaspa nirqan: — Hunt'achiychis unuta tawa p'uyñuman, hinaspa hich'aychis ruphachina ofrendata llant'atawan, nispa.

³⁴Chaymantataq nirqan: — Huktawan hich'aychis, nispa. Paykunataq ahinata ruwarqanku. Nillarqantaq: — Huktawan hich'aychis, nispa. Hinan paykunaqa ruwarqanku kinsa kutikama.

³⁵Chaymi altar muyuriqman unu phaqchaykurqan, hasp'isqa yarqhaman hunt'anankama.

³⁶Ruphachina ofrenda haywana horastan profeta Eliasqa altarman qayllaykuspa kunkayoqta mañakurqan: — ¡Abrahampa, Isaacpa, Israelpa Diosnin, Señorníy, kunan reqsichikuy qanpuni Israelpa Diosnin kasqaykita, ñoqapas qanpa kamachiyki kasqayta, hinallataq kamachiwasqaykirayku tukuy kaykunata ruwasqaytapas!

³⁷¡Señor Diosníy, kutichimuway mañakusqayta! ¡Kutichimuway kay runakuna qanpuni Dios kasqaykitapas, qanman kutirikunankupaq waqyaq kasqaykitapas yachanankupaq! nispa.

³⁸Chay kikin raton Señor Diospa ninanqa uraykamuspa rupharqan ruphachina sacrificiota, llant'ata, rumikunatapas, hallp'a ñut'utapas, hinallataq yarqhapi unutapas ch'akichirqan.

³⁹Chayta rikuspan llapa runakuna pampakama k'umuykukurqanku, hinaspa qaparirqanku: — ¡Señormi Diosqa! ¡Señormi Diosqa! nispa.

⁴⁰Hinan Eliasqa paykunata nirqan: — ¡Hap'iychis Baal diospa profetankunata, ama hukpas ayqechunchu! nispa. Chaymi runakunaqa hap'irqanku, Eliastaq Cisón mayuman apaspa chaypi chay profetakunata nak'aspa wañuchimurqan.

⁴¹Chay qhepatataq Eliasqa Ahabta nirqan: — Phaway mikhuq ukyaq, para kunununuymi uyarikushanña, nispa.

⁴²Hinan Ahabqa mikhuq ukyaq ripurqan. Eliastaq ichaqa Carmelo orqo puntaman seqarqan, chaypitaq qonqoriykukurqan moqon chawpiman uyan chayanankama,

⁴³kamachintataq nirqan: — Phaway, lamar-qocha ladota qhawarimuy, nispa. Kamachintaq rispa qhawamurqan, nirqantaq: — Manan imapas kanchu, nispa. Eliastaq ichaqa kamachirqan qanchis kutita qhawamunanpaq.

⁴⁴Qanchiskaq kutipitaq kamachiqa nirqan: — ¡Haqayqá! ¡Lamar-qochamanta huk maki sayay phuyulla lloqsimushan! nispa. Hinan Eliasqa nirqan: — Phaway, Ahabta nimuy: Carretaykita aysachiy hinaspa ripuy, mana chayqa paran hark'asunki, nispayki, nispa.

⁴⁵Chaykamataq wayrawan yana phuyuwan cieloqa tutayaykurqan, hinan sinchita para chayarqan. Ahabqa carretanman wichaspa Jezreelman ripurqan.

⁴⁶Eliastataq Señor Diosqa kallpachaykurqan, chaymi payqa p'achanta allinta chumpiykukuspa Jezreel llaqtaman phawaspa Ahabmantapas ñawpaqtaraq chayarqan.