Read Diospa Simin Qelqa 1 REYES 21 Bible Online

1 REYES 21 - Diospa Simin Qelqa bible

1 REYES 21

¹Jezreel llaqtayoq Nabotpan chay llaqtapi uvas chakran karqan Samaria rey Ahabpa kamachikunan wasi qayllapi.

²Huk p'unchaymi Ahabqa Nabot-ta nirqan: — Uvas chakraykita qopuway chaypi verdura huertay kananpaq, wasiy qayllapitaq kashanpas chayqa. Chakraykiq rantinpiqa aswan allin uvas chakratan qopusqayki, mana chaytaq qolqeta hayk'achus valesqanta pagapusqayki, nispa.

³Nabot-taq ichaqa kutichirqan: — Amapuni Dios munachunchu ñawpa taytaykunamanta herencia chaskisqay chakrata qonaytaqa, nispa.

⁴Hinan Ahabqa llakisqataq phiñasqataq wasinta ripurqan, Nabotpa: Manan qoykimanchu, nisqan hawa. Chayaspataq puñuykurqan perqa lado kutirisqa, manataq mikhuytapas munarqanchu.

⁵Hinan warmin Jezabelqa payman qayllaykuspa nirqan: — ¿Imamantataq sinchi llakisqa kashanki, manataq mikhuytapas munankichu? nispa.

⁶Ahabtaq kutichirqan: — Jezreelmanta Nabot-tan nirqani: Uvas chakraykita vendepuway, mana chaytaq rantinpi huk uvas chakrata qopusqayki, nispa. Paytaq ichaqa mana qoyta munawanchu, nispa.

⁷Hinan warmin Jezabelqa kutichirqan: — ¿Manachu qanqa Israel suyu kamachiq kashanki? ¡Sayariy, mikhumuy! ¡Ama llakikuychu! ¡Ñoqan qochisqayki Nabotpa uvas chakrantaqa! nispa.

⁸Chaymantataq Jezabelqa Ahabpa sutinpi cartakunata qelqarqan, reypa selloyoq anillonwantaq ñit'iykurqan, hinaspa apachirqan Nabotpa tiyasqan llaqtapi kurak runakunaman umallikunamanwan.

⁹Chay cartakunapin nirqan: Ayunanapaq kamachiychis. Nabot-tataq runakunaq ñawpaqenpi tiyaykuchiychis.

¹⁰Hinallataq iskay millay runatapas Nabotpa ñawpaqenpi tiyaykuchiychis, hinaspa chay runakunata pay contra rimachiychis: Arí, ñakanpunin Diostapas reytapas, nispa. Chay qhepatataq llaqta hawaman horqospa rumiwan ch'aqespa wañuchinkichis, nispa.

¹¹Nabotpa tiyasqan llaqtapi kurak runakunan umallikunapiwan Jezabelpa cartanpi kamachikusqanman hina ruwarqanku.

¹²Ayunanapaq kamachirqanku, Nabot-tataq runakunaq ñawpaqenman tiyaykuchirqanku.

¹³Chaymantataq iskay millay runakuna chayamuspa Nabot contra llapa runaq qayllanpi rimarirqanku: — Arí, ñakanpunin Diostapas reytapas, nispa. Hinan llaqta hawaman horqorqanku, chaypitaq rumiwan ch'aqespa wañuchirqanku.

¹⁴Chay qhepatataq Jezabelman willaqta kacharqanku: Nabotqa ch'aqesqan wañupun, nispa.

¹⁵Jezabeltaq chayta yacharqospa hina Ahabta nirqan: — Phaway, Jezreel llaqtayoq Nabotpa uvas chakranta hap'ikamuy, payqa manan vendeyta munarqasunkichu, kunanqa wañupunmi, nispa.

¹⁶Ahabtaq Nabotpa wañupusqanta yachaspa sayarirqan, hinaspa rirqan uvas chakranta hap'ikapunanpaq.

¹⁷Señor Diostaq Tisbe llaqtayoq Eliasta nirqan:

¹⁸— Phaway Samariapi tiyaq Israel rey Ahabman. Payqa Nabotpa uvas chakranta hap'ikapuqmi rin.

¹⁹Paytan ninki, Señor Diosmi nin: ¿Nabot-ta wañuchispaykichu kunanqa chakrantañataq hap'ikapushanki? May cheqaspichus Nabotpa yawarninta alqokuna llaqwarqan, chay cheqasllapitaqmi qanpa yawarniykitapas alqokuna llaqwanqa, nispa.

²⁰Ahabtaq Eliasta nirqan: — Chay hinaqa, ¿tarirqamuwankichu qan awqayqa? nispa. Eliastaq kutichirqan: — Arí, tarirqamuykin. Qanqa Señor Diospa ñawpaqenpi mana chanin ruwaykunamanmi k'askaykukunki.

²¹Chaymi Señor Diosqa nin: Hatun llakitan qanman chayachimusqayki, hinaspan llapan mirayniykita tukupusaq, mirayniykimanta Israelpi kashaq llapa qharikunatan ch'usaqyachisaq.

²²Ahinaqa, imaynan Nabatpa churin Jeroboampa aylluntapas, Ahiaspa churin Baasaq aylluntapas ruwarqani, ahinatan aylluykitapas ruwasaq, Israelta huchallichisqayki hawa ñoqatapas phiñachiwasqayki hawa, nispa.

²³Jezabelmantataq Señor Diosqa nin: Jezreelpi kaq chakrapin Jezabeltaqa alqokuna mikhunqa, nispa.

²⁴Nillantaq: Qanpa aylluyki llaqtapi wañuqtinqa, alqokunan mikhunqa, campopi wañuqtintaq phalaq animalkuna mikhunqa, nispa.

²⁵Manan pipas Ahab hina Señor Diospa ñawpaqenpi mana chanin ruwaykunaman k'askasqa karqanchu, paytaqa warmin Jezabelmi sinchita yuyaycharqan mana allinta ruwananpaq.

²⁶Idolokunata yupaychaspanmi sinchi mana chaninta huchallikurqan, imaynan Amor runakuna ruwarqanku hinata, paykunatan Señor Diosqa Israel runakunaq ñawpaqenmanta wikch'usqa.

²⁷Ahabqa tukuy chaykunata uyarispanmi p'achanta llik'ikurqan, qhasqa p'achawan p'achakuspataq ayunarqan. Chay p'achantinmi puñurqan, sinchi llakisqataq purirqan.

²⁸Hinan Señor Diosqa Eliasta nirqan:

²⁹— ¿Rikunkichu imaynatachus Ahabpa ñawpaqeypi huch'uyyaykukusqanta? Chay hinaqa, ñawpaqeypi huch'uyyaykukusqanrayku, pay kawsashaqtinqa manan ayllunman hatun llakita chayachisaqraqchu, aswanpas churinpa tiemponpiñan, nispa.