Read Diospa Simin Qelqa 1 REYES 4 Bible Online

1 REYES 4 - Diospa Simin Qelqa bible

1 REYES 4

¹Salomonmi llapan Israel suyupi rey karqan.

²Kaykunan reypa qollana oficialninkuna karqan: Sacerdote: Sadocpa churin Azarías.

³Qelqaqkuna: Sisaq churinkuna Elihorefpiwan Ahiaspiwan. Qelqa waqaychaq: Ahiludpa churin Josafat.

⁴Ejército umalli: Joiadaq churin Benaía. Sacerdotekuna: Sadocpiwan Abiatarpiwan.

⁵Kamachikuqkunaq umallin: Natanpa churin Azarías. Rey yuyaychaq: Natanpa churin sacerdote Zabud.

⁶Reypa wasinpi kamachiq: Ahisar. Mit'ani runakunaq umallin: Abdapa churin Adoniram.

⁷Rey Salomonmi llapa Israel suyuntinpi chunka iskayniyoq kamachikuqkunata churarqan, paykunan reymanpas ayllunmanpas mikhunata qonankupaq kamachisqa karqanku. Chaymi sapankanku watapi huk killa hunt'a mikhunankupaq lliwta qonanku karqan.

⁸Chay kamachikuqkunaqa kaykunan karqan: Ben-Hur: paymi Efraín orqo-orqopi kamachikurqan.

⁹Ben-Decar: paymi Macazpi, Saalbimpi, Bet-semespi, Elonpi, Bet-hananpiwan kamachikurqan.

¹⁰Ben-Hesed: paymi Arubotpi, Socopi, llapa Hefer suyupiwan kamachikurqan.

¹¹Ben-Abinadab: paymi llapan Dor hap'iypi kamachikurqan. Paypa warminmi Salomonpa ususin Tafat karqan.

¹²Ahiludpa churin Baana: paymi kamachikurqan Taanacpi, Meguidopi, Jocmeampa inti chinkaykuynin cheqaskama, Jezreelmanta Bet-seankama, Bet-seanmanta Saretán qaylla Abel-meholakama Bet-seán hap'iypiwan.

¹³Ben-Geber: paymi kamachikurqan Galaad Ramotpi, Manasespa churin Jairman tupaq Galaadpi huch'uy llaqtachakunapi, Basanpi kashaq Argob hap'iypiwan. Chaypin karqan soqta chunka hatun llaqtakuna muyuriq perqayoq, broncemanta wisq'anayoq ima.

¹⁴Idoq churin Ahinadab: paymi Mahanaimpi kamachikurqan.

¹⁵Salomonpa ususin Basematwan casarakuq Ahimaas: paymi Neftalí ayllu hallp'api kamachikurqan.

¹⁶Husaipa churin Baana: paymi Aser ayllu hallp'api, Alotpiwan kamachikurqan.

¹⁷Paruaq churin Josafat: paymi Isacar ayllu hallp'api kamachikurqan.

¹⁸Elaq churin Simei: paymi Benjamín ayllu hallp'api kamachikurqan.

¹⁹Uriq churin Geber: paymi Galaad hap'iypi kamachikurqan. Chay suyun kasqa Amor runakunaq reynin Sehonpa suyun Basán rey Ogpa suyunpiwan. Hinallataq suyuntinpi huk kamachikuqpas karqan.

²⁰Judá runakunapas Israel runakunapas mana yupay atiymi karqanku lamar-qocha patapi aqo hina. Paykunan mikhurqanku ukyarqanku, ancha kusisqataq kawsarqanku.

²¹Salomonmi kamachirqan llapan suyukunata, Eufrates mayumanta Filistea suyukama, Egipto qorpakama. Paykunan rey Salomonman contribucionta pagarqanku, tukuy kawsasqan p'unchaytaq payta kasurqanku.

²²Salomonpaqqa sapa p'unchaymi mikhuyta churarqanku kinsa chunka fanega ñut'u hak'uta, soqta chunka fanega chhanqa hak'uta,

²³kanchapi uywasqa allin wirayachisqa chunka torokunata, campopi uywasqa iskay chunka torokunata, pachak ovejatawan, hinallataq tukuy t'aqa tarukakunata, wirayachisqa wallpakunatapas.

²⁴Salomonqa kamachirqan llapan Eufrates mayu inti haykuy lado suyutan, Tipsamanta Gazakama, kamachillarqantaq llapan chaypi tiyaq reykunatapas, muyuriqninpi suyukunawantaq sumaqta kawsarqan.

²⁵Salomón kawsashaqtinqa Judá runakunapas Israel runakunapas Danmanta Beersebakaman mana ima llakillayoq tiyarqanku, sapankanku higos sach'akunayoq uvas chakrakunayoq ima.

²⁶Salomonpa caballo kanchankunapin carreta aysaq tawa chunka waranqa caballokuna karqan, chunka iskayniyoq waranqa caballokunataq soldadokunapaq karqan.

²⁷Sapanka kamachikuqkunan tupaqnin killaman hina mikhuyta qorqanku rey Salomonpaq paywan kashaqkunapaqpas, mana imata pisichispa.

²⁸Hinallataq carreta aysaq caballokunapaqpas silla caballokunapaqpas cebadatawan pajatawan apaspanku qarana cheqasman churarqanku.

²⁹Diosmi Salomonman allin yachayta allin yuyaytawan qorqan, chaymi lamar-qocha patapi aqo hinaraq yachayninqa karqan.

³⁰Chaymi Salomonqa Egipto runakunamantapas, inti lloqsimuy lado runakunamantapas aswan allin yachaysapa karqan.

³¹Tukuy qharikunamanta aswan yachaysapan karqan, Ezrac runa Etanmanta, Maholpa churinkuna Hemanmanta Calcolmanta, Dardamantapas aswan yachaysapan karqan. Chaymi llapan muyuriqnin suyukunapi mentasqa karqan.

³²Kinsa waranqa rikch'anachiy simikunatan qelqarqan, hinallataq waranqa phisqayoq takikunatapas kamarirqan.

³³Payqa rimarqan mallkikunamanta, yurakunamanta, Libanopi cedromanta, perqapi wiñaq oreganomantapas, hinallataq animalkunamanta, phalaq animalkunamanta, pampan suchuq animalkunamanta, challwakunamantapas.

³⁴Llapan llaqtakunamantan, suyukunamantan Salomonpa yachayninmanta uyarirqanku, chaymi reykunaqa runakunata kachamurqanku Salomonpa rimasqan uyariqta.