Read Diospa Simin Qelqa 1 REYES 5 Bible Online

1 REYES 5 - Diospa Simin Qelqa bible

1 REYES 5

¹Tiro llaqta rey Hirammi Davidpa churin Salomón reypaq hawisqa kasqanta yachaspa, oficialninkunata payman kacharqan, taytan Davidwan amigontin kasqanrayku.

²Hinan Salomonqa Hiramman willaqta kacharqan:

³Yachankiñan taytay Davidpa awqankunawan maqanakuyllapi sinchita usqhasqanta, chaymi Señor Diosninpaq yupaychana wasita mana sayarichiyta atirqanchu awqankunata Señor Diospa chaki sarunanman churanankama.

⁴Kunanmi ichaqa Señor Diosniy tukuy muyuriqniy llaqtakunawan thak-kaypi kawsachiwanku, manañan awqaykupas ñak'ariykunapas kanñachu.

⁵Chaymi kunan yuyaykuni Señor Diosniypaq huk yupaychana wasita ruwapuyta, taytay Davidmanmi Señor Diosqa khaynata nisqa: Churiykitan rantiykipi kamachikuqta churasaq, paymi ñoqapaq huk yupaychana wasita sayarichipuwanqa, nispa.

⁶Chay hinaqa, Libanomanta cedro sach'ata kumpanpuwanankupaq kamachiy. Llank'aqniykikunatan ñoqaq llank'aqniykuna yanapanqaku, hayk'an niwasqaykitataq llank'aqniykikunaman pagapusaq. Qanqa yachankin Sidonmanta runaykikuna hinaqa mana mayqenniykupas mallki kumpayta yachasqaykuta, nispa.

⁷Hiramtaq Salomonpa willachisqanta uyarispa anchata kusikurqan, hinaspan nirqan: — ¡Saminchasqa Señor Diosqa kachun! Paymi Davidman ancha yachaysapa churita qorqan chay hatun suyuta kamachinanpaq, nispa.

⁸Chaymantataq Hiramqa Salomonman willaqta kacharqan: Chaskinin willamuwasqaykita, ima munasqaykitan ruwasaq, apachimusqaykin cedro kurkutapas pino kurkutapas.

⁹Llank'aqniykunan kurkuta Libanomanta lamar-qochakama uraykachimunqa, chaymantataq lamar-qochanta chaqllasqa tuytushaqta apachimusqayki maymanchá munanki chaykama. Chaypitaq chaqllasqa kurkuta paskanqaku, hinan kurkukunata qan chaskinki. Chay hinaqa, ñoqapaqpas aylluypaqpas mikhuyta qomuwanki chayllawan kurkukunataqa chhalasunchis, nispa.

¹⁰Chaymi Hiramqa Salomonman tukuy munasqanta qorqan, cedro kurkutapas pino kurkutapas.

¹¹Salomontaq Hirampaqpas ayllunpaqpas qorqan iskay chunka waranqa fanega trigota, tawa waranqa tawa pachak litro olivo aceitetawan. Chaytan Salomonqa Hiramman sapa wata qorqan.

¹²Señor Diosmi Salomonman yachayta qorqan prometesqanman hina. Hiramwan Salomonwanqa sumaqtan rimanakurqanku, chaymi paykunaqa sumaqta kawsarqanku.

¹³Chaymantataq rey Salomonqa Israel suyupi mit'ani llank'ayta rikhurichirqan, hinan kinsa chunka waranqa qharikunata huñurqanku mit'anipi llank'anankupaq.

¹⁴Paykunatan Libanoman kacharqanku tupaqninman hina sapa killa chunka waranqa qharikunata. Hinan chaypi huk killa llank'arqanku, chaymantataq iskay killa wasinkupi karqanku. Mit'ani runakunaq umallinmi karqan Adoniram.

¹⁵Kallarqantaqmi orqo-orqopi Salomonpa pusaq chunka waranqa rumi ch'eqtapuqnin qharikuna, kallarqantaq qanchis chunka waranqa rumi q'epiq qharikunapas.

¹⁶Kallarqantaq chay llank'ayta kamachiq kinsa waranqa kinsa pachak umallikunapas.

¹⁷Reypa kamachikusqanman hinan yupaychana wasiq teqsinta churanankupaq sumaq hatun thupasqa rumikunata wakichirqanku.

¹⁸Chhaynaqa, Salomonpa llank'aqninkuna, Hirampa llank'aqninkuna, Gebal llaqta qharikunapiwanmi Dios yupaychana wasi sayarichinapaq kurkukunatapas thupasqa rumikunatapas wakichirqanku.