Read Diospa Simin Qelqa 1 REYES 6 Bible Online

1 REYES 6 - Diospa Simin Qelqa bible

1 REYES 6

¹Israel runakunaq Egipto suyumanta lloqsimpusqan tawa pachak pusaq chunka wata kashaqtin, tawa wataña Israelpi kamachikushaspa, wataq Zif nisqa iskaykaq killanpi Salomonqa Señor Diospaq wasita sayarichiyta qallarirqan.

²Señor Diospaq Salomonpa sayarichisqan wasiq ukhunmi kay hina tupusqa karqan: wask'anman iskay chunka qanchisniyoq metro, anchonman isqon metro, sayayninmantaq chunka kinsayoq metro kuskannin.

³Yupaychana wasiman haykuna wasiqa kay hinan karqan: wask'anman isqon metro, anchonmantaq tawa metro kuskannin.

⁴Salomonqa ventanakunatan churarqan, chaykunan karqan ukhun aswan hatun hawanmantaqa.

⁵Hinallataq yupaychana wasi perqawan k'askata ladopuranpi qhepanpiwan kinsa patata sayarichirqan, chaykunapitaq wasichakuna karqan.

⁶Pampakaq muyuriq wasichakunaq anchonmi karqan iskay metro iskay chunka phisqayoq centímetro, iskay pata muyuriq wasichakunaq anchonmi karqan iskay metro qanchis chunka centímetro, kinsa pata muyuriq wasichakunaq anchonmi karqan kinsa metro chunka phisqayoq centímetro. Yupaychana wasi perqataqa anchotan qallarirqanku, kinsa kutitataq suchuykachirqanku muyuriq pata kurkukunata chayman chakanapaq, ahinapin perqata mana t'oqorqankuchu.

⁷Wasitaqa sayarichirqanku rumi qolqapi wakichisqa rumikunawanmi, chayraykun wasita perqashaspaqa mana takarqankuchu martillowanpas hachawanpas, manataq ima herramientawanpas.

⁸Pampakaq muyuriq wasichakunaq punkunmi karqan yupaychana wasiq uray ladonpi, iskaykaq patapas kinsakaq patapas muyurispa seqanayoqmi karqan.

⁹Wasi perqayta tukuspataq Salomonqa cedro kurkuwan chakaspa cedro tablawan wasiq altonta mast'arqan.

¹⁰Yupaychana wasi perqawan k'askata cedro kurkuwan hap'ichisqata kinsa patata sayarichirqan, sapanka pata iskay metro iskay chunka phisqayoq centímetro sayayniyoq karqan.

¹¹Hinan Señor Diosqa Salomonta nirqan:

¹²— Kay yupaychana wasita sayarichishasqaykirayku kayta nisqayki: Kamachikuyniyta, unanchayniyta, tukuy chaninchayniykunatapas kasukunki chayqa, taytayki Davidman qanmanta prometesqaytaqa hunt'asaqmi.

¹³Israel runakuna ukhupin tiyasaq manataq Israel llaqtaytaqa saqerparisaqchu, nispa.

¹⁴Salomonmi yupaychana wasi sayarichiyta tukupurqan.

¹⁵Wasi ukhu perqatan cedro tablawan k'askachirqan pampamanta altopi kurku chakasqakama, pampantataq pino tablawan mast'arqan.

¹⁶Hinallataq wasi ukhupi qhepa cheqaspi isqon metro wask'ayoqta t'aqarqan, pampamanta altopi kurku cheqaskama cedro tablawan churaspa, chaymi karqan Ch'uyay-ch'uya Cheqaspaq.

¹⁷Ch'uyay-ch'uya Cheqasman qatiq cheqastaq wask'anman chunka pusaqniyoq metro karqan.

¹⁸Wasi ukhuqa llapanmi cedro tablawan llup'asqa[1] karqan, manataq rumiqa rikhurirqanchu. Chay tablakunapin purukunata t'ikakunata llaqllaspa thuparqanku.

¹⁹Salomonmi yupaychana wasipi Ch'uyay-ch'uya Cheqasta wakichirqan Señor Diospa rimanakuynin arcata churananpaq.

²⁰Ch'uyay-ch'uya Cheqasqa isqon metron karqan, anchonmanpas, wask'anmanpas, sayayninmanpas. Hinaspan Salomonqa chayta qoriwan qatarqan, chayman haykuna cheqaspitaq cedromanta altarta churarqan.

²¹Hinallataq yupaychana wasi ukhuta qoriwan qatarqan, Ch'uyay-ch'uya Cheqas haykunatataq qori cadenawan wisq'aykurqan.

²²Ahinatan llapan wasi ukhuta qoriwan qatarqan, hinallataq Ch'uyay-ch'uya Cheqaspi kashaq altartapas qatarqan.

²³Ch'uyay-ch'uya Cheqaspitaq iskay querubinkunata olivo k'ullumanta ruwarqan. Chay querubinkunan sapanka karqan tawa metro kuskan sayayniyoq.

²⁴Sapanka raphrankunataq karqan iskay metro iskay chunka phisqayoq centímetro, chaymi huk raphraq puntanmanta hukkaq raphraq puntankamaqa tawa metro kuskannin karqan.

²⁵Hinallataq hukkaqnin querubinpas tawa metro kuskannin, iskaynin querubinkunaqa sayaypuran karqanku, anchonmanpas kasqanpurataq.

²⁶Sapanka querubinkunan tawa metro kuskannin sayayniyoqkama karqan.

²⁷Chaykunatan Salomonqa Ch'uyay-ch'uya Cheqasman churarqan raphranku mast'arisqatakama. Chaymi paña ladopi kaq querubinpa huk raphran perqata tuparqan, huk raphrantaq lloq'e ladopi kaq querubinpa raphranta tuparqan. Lloq'e ladopi kaq querubinpa huk raphrantaq perqata tuparqan, huk raphrantaq paña ladopi kaq querubinpa raphranta tuparqan.

²⁸Chaymantataq querubinkunata qoriwan qatarqan.

²⁹Ch'uyay-ch'uya Cheqas ukhu perqapi, hinallataq Ch'uya Cheqas ukhu perqapipas querubinkunata, palmerakunata, t'ikakunata llaqllaspa thuparqan.

³⁰Hinallataq Ch'uyay-ch'uya Cheqas pampatapas Ch'uya Cheqas pampatapas qoriwan mast'arqan.

³¹Ch'uyay-ch'uya Cheqaspa iskayman kichakuq punkuntaqa olivo kurkumantan ruwarqan, chay punkuq marcontaq phisqa esquinayoq karqan.

³²Chay punkupitaq querubinkunata palmerakunata t'ikakunata llaqllaspa thuparqan, hinaspataq punkupi llaqllasqa rikch'aykunatapas lliwta qoriwan qatarqan.

³³Yupaychana wasi haykuna punkuq marcontataq olivo kurkumanta ruwarqan tawa esquinayoqta.

³⁴Pino kurkumantataq iskayman kichakuq punkuta ruwarqan, sapanka ladon iskayman q'echukuq karqan.

³⁵Hinallataq chay punkupi llaqllaspa thuparqan querubinkunata, palmerakunata, t'ikakunata ima, hinaspa qoriwan qatarqan.

³⁶Hinallataq yupaychana wasiq ñawpaqenpi huk patiota ruwarqan, chayta perqaspan thupasqa rumiwan sapa kinsa patata muyurispa, huk patata cedro kurkuwan churarqan.

³⁷Señor Diospa wasin teqsitan rey Salomonqa churarqan Zif nisqa iskaykaq killapi tawa wataña kamachikushaspa.

³⁸Yuyaykusqanman hinan tukuy imaymanantinta wasita tukurqan wataq Bul nisqa pusaqkaq killanpi, chunka hukniyoq wataña kamachikushaspa. Chhaynapin rey Salomonqa Dios yupaychana wasi sayarichiyta qanchis watapi tukurqan.