Read Diospa Simin Qelqa 1 REYES 8 Bible Online

1 REYES 8 - Diospa Simin Qelqa bible

1 REYES 8

¹Chaymantataq rey Salomonqa Jerusalén llaqtapi huñurqan Israelpi llapan kurak runakunata, llapan ayllu umallikunata, familia umallikunatawan, Señor Diospa rimanakuynin arcata Davidpa Llaqtan nisqa Sionmanta apanankupaq.

²Wataq Etanim nisqa qanchiskaq killanpitaq Ch'uklla Ruwana Fiestapi llapan Israel qharikuna rey Salomonwan huñukurqanku.

³Israelpi kaq llapa kurak runakuna huñukuqtinkutaq, sacerdotekunaqa rimanakuy arcata hoqarispa

⁴aparqanku, Leví runakunapiwan, Dioswan Tupana Karpapi kaq llapan ch'uya serviciokunatawan Dios yupaychana wasiman.

⁵Hinan rey Salomonqa paywan huñukuq llapan qharikunapiwan rimanakuy arcaq ñawpaqenpi askha ovejakunata torokunata ima sacrificiota haywarqanku, chaykunan mana yupay atiy karqan.

⁶Chaymantataq sacerdotekuna Señor Diospa rimanakuynin arcata yupaychana wasi ukhuman apaykurqanku Ch'uyay-ch'uya Cheqaskama, hinaspa churaykurqanku querubinkunaq raphran uraman.

⁷Chay querubinkunaqa mast'arisqa raphrayoqmi karqan, chay raphrankunan rimanakuy arcata wantuna k'aspitapas pakarqan.

⁸Wantuna k'aspikunan sinchi hatun karqan, chaymi chay k'aspikunaq puntan Ch'uya Cheqasmanta rikukurqan, yupaychana wasi punkumantan ichaqa mana rikukurqanchu. Ahinapin chay k'aspikuna qhepakapurqan.

⁹Rimanakuy arcapiqa iskay p'alta rumikunallan karqan. Israel runakuna Egipto suyumanta lloqsimuqtinmi, Señor Diosqa paykunawan rimanakusqa, chay p'alta rumikunatan Moisesqa arcaman Horebpi churaykusqa.

¹⁰Ch'uya Cheqasmanta sacerdotekuna lloqsiqtintaq, Señor Dios yupaychana wasita phuyu hunt'aykurqan,

¹¹chaymi yupaychana wasiqa Señor Diospa lliphlli-kayninwan hunt'a karqan, chay hawataq sacerdotekunaqa mana serviyta atirqankuchu.

¹²Chaymi Salomonqa nirqan: — Señor Diosníy, qanmi tutayaq phuyu ukhupi tiyakuyta akllakurqanki.

¹³Kunanmi sumaq qhapaq wasita ruwapuyki chaypi wiñayta tiyanaykipaq, nispa.

¹⁴Chaymantataq rey Salomonqa huñuykusqa sayashaq llapan Israel runakunaman kutirispa paykunata samincharqan.

¹⁵Nirqantaq: — Saminchasqa kachun Israelpa Diosnin Señorqa, pay kikinmi taytay Davidman prometesqanta hunt'arqan, paymi nisqa:

¹⁶Egiptomanta Israel llaqtayta horqomusqay p'unchaymantapacha manan Israel suyupi mayqen llaqtatapas akllarqanichu, chaypi wasita sayarichipuwaspaykichis ñoqata yupaychawanaykichispaq, aswanpas qantan David, akllakurqayki llaqtayta kamachinaykipaq, nispa.

¹⁷Taytay Davidtaq sonqonpi yuyaykukusqa Israelpa Diosnin Señorpaq yupaychana wasi sayarichiyta.

¹⁸Señor Diostaq ichaqa taytay Davidta nisqa: Allinmi huk wasita sayarichipuwanaykipaq yuyaykusqaykiqa,

¹⁹ichaqa manan qanqa sayarichiwaqchu, aswanpas churiykin ñoqapaq huk wasita sayarichipuwanqa, nispa.

²⁰Chay hinaqa, hunt'arqanmi Señor Diosqa prometesqanta, chaymi kunan nisqanman hina ñoqaqa David taytaypa rantinpi Israel suyu kamachikuna tiyanapi tiyaykuni, hinaspa Israelpa Diosnin Señorpaq huk yupaychana wasita sayarichipurqani.

²¹Chay yupaychana wasipin huk cheqasta t'aqarqani rimanakuy arcata churanapaq. Chay arcapin kashan Egiptomanta horqomushaspa ñawpa taytanchiskunawan Señor Diospa rimanakuynin, nispa.

²²Chaymantataq llapa Israel runakuna qayllapi Salomonqa Señor Diospa altarninpa ñawpaqenpi sayaykurqan, hinaspa makinta altoman haywarispa

²³nirqan: — Israelpa Diosnin, Señor, manan kanchu hanaq pachapipas kay pachapipas qan hina Diosqa. Qanqa rimanakusqaykita hunt'aqmi kanki, khuyapayankitaqmi tukuy sonqo qanta serviqniykikunata.

²⁴Kamachiyki taytay Davidman prometesqaykitapas hunt'arqankin, simiykiwan rimasqaykitapas kunanmi hunt'anki.

²⁵Chay hinaqa, Israelpa Diosnin, Señor, hunt'allaytaq taytayman prometesqaykita, qanmi nisqanki: Churiykikunachus allinta kawsanqaku, imaynan qan ñawpaqeypi kawsarqanki hinata chayqa, mirayniykiqa Israel suyupi kamachishallanqapunin, nispa.

²⁶Chay hinaqa, Israelpa Diosnin Señorníy, kamachiyki taytay Davidman prometesqaykita hunt'allaypuni.

²⁷Ichaqa, ¿cheqaqtachu qan Diosqa kay pachapi tiyawaq? Hanaq pachapas manan chaskiyta atisunkichu ancha hatun kashaspa, ¿imanpaqraqtaq kanman kay wasi sayarichisqayqa?

²⁸Chaywanpas Diosníy, Señor Dios, uyariykuway mañakusqayta, khuyapayawanaykipaq valekusqaytapas. Uyariykuway, ñoqa kamachiykin kunan waqyakamuyki mañakamuyki.

²⁹Tuta-p'unchay kay wasita qhawashallaypuni, qanqa nirqankin: Chaypin kashasaq, nispa. Maypiña kashaspaypas kay wasi qhawarisqa mañakuqtiyqa uyariykullawankipunin.

³⁰Hinallataq Israel llaqtaykitapas ñoqatapas kay wasi qhawarisqa mañakuqtiykuqa uyariykullawankikupunin, hanaq pacha tiyanaykimanta uyariykamullawankiku, pampachaykuwankikutaq.

³¹Pipas runamasin contra huchallikuqtin, kay wasipi altarniykipi jurachinkuman mana huchayoq kasqanta chayqa,

³²hanaq pachaykimanta uyariykamuy, hinaspa juzgay kamachiykikunata, huchayoqtaqa wanachiy mana chanin ruwasqanmanta muchuchispayki, mana huchayoqtataq chaninchayman hina sut'inchay chanin kasqanta.

³³Qan contra huchallikusqan hawa Israel llaqtaykita awqanku atipanman, hinataq paykuna qanman kutirikamusunkiman, yupaychasunkimantaq, kay wasipi mañakuspataq valekusunkiman chayqa,

³⁴uyariykamuy hanaq pachaykimanta, huchankutapas pampachaykuy, hinaspa ñawpa taytankuman qosqayki hallp'aman kutichimpuy.

³⁵Qan contra llaqtaykiq huchallikusqan hawa ch'akirinman, manataq paranmanchu, ichaqa kay yupaychana wasi ladoman kutirisqataq mañakunkuman, yupaychasunkikuman, muchuchiqtiykitaq huchankuta wikch'unkuman chayqa,

³⁶uyariykamuy hanaq pachaykimanta, pampachaykuy Israel llaqta kamachiykikunaq huchanta, hinaspa yachachiy allin chanin ñanta purinankupaq, hinallataq llaqtaykiman herenciapaq qosqayki hallp'amanpas parachimuy.

³⁷Yarqaypas, millay onqoypas, ruphashaq wayrapas, polvillopas, langostapas, yura mikhuq kurupas, llaqtaykuta muyuykuspa phawaykuq awqaykupas, ima onqoypas sasachakuypas kay suyupi kanman chayqa,

³⁸uyariykamuy mañakusqankuta. Llaqtaykiman mayqen runapas sonqonpi llakikuspa makinta kay wasi ladoman haywarispa mañakusunkiman chayqa,

³⁹hanaq pachaykimanta uyariykamuy, hinaspa huchankuta pampachaykuy, chaninchaspaykitaq sapankaman ruwasqanman hina qopuy. Qan sapallaykin runaq yuyaykuynintapas sonqontapas reqsinki.

⁴⁰Chaymi manchakuywan yupaychasunkiku ñawpa taytaykuman qosqayki hallp'api tiyasqanku tukuy tiempo.

⁴¹Mayqen wak llaqtayoq runapas sutiykimanta uyarispa karu llaqtamanta hamunman,

⁴²mentasqa kasqaykita, musphana ruwasqaykita hinantinpi uyarispanku kay yupaychana wasiykipi mañakusunkiman chayqa,

⁴³uyariykamuy hanaq pacha tiyasqaykimanta, hinallataq tukuy mañakusqasuykita qoykuy, llapan kay pacha suyukuna reqsinasuykipaq, hinaspa Israel llaqtayki hina paykunapas manchakuywan yupaychanasuykipaq. Ahinapin yachanqaku kay ruwapusqay yupaychana wasipi sutiyki yupaychasqa kasqanta.

⁴⁴Llaqtaykita awqa-tinkuyman kachaqtiyki, maypi kasqankupi akllakusqayki llaqta ladoman kutirisqa kay ruwapusqay yupaychana wasiyki ladoman kutirisqa ima mañakunkuman chayqa,

⁴⁵hanaq pachamanta uyariykamuy mañakusqankutapas valekusqankutapas, hinaspa paykunawan atipachiy.

⁴⁶Manan pipas mana huchallikuqqa kanchu, chayrayku llaqtayki qan contra huchallikuqtin, k'arakta phiñakuspayki awqankuman hap'iykachiwaq suyunkuman presota apanankupaq, karumanpas qayllamanpas,

⁴⁷chaypitaq preso apasqa kasqanku suyupi qanman kutirikuspa valeykukusunkiman: Huchallikurqaykun, mana chanintan ruwarqayku, huchachasqan kayku, nispanku,

⁴⁸chaypitaq tukuy sonqo tukuy alma qanman kutirikunkuman, hinaspataq ñawpa taytankuman qosqayki suyu ladoman, akllakusqayki llaqta ladoman, ruwapusqay yupaychana wasi ladoman kutirispa mañakusunkiman chayqa,

⁴⁹hanaq pachaykimanta uyariykamuy mañakusqankutapas valekusqankutapas, hinaspa qespichiy.

⁵⁰Llaqtaykiq qan contra huchallikusqanta tukuy mana chanin ruwasqantapas pampachaykuy. Preso apaqninkuwanpas khuyapayachiy.

⁵¹Paykunaqa llaqtaykin kaqniykin kanku. Qanmi Egiptomanta horqomurqanki, chay suyun fierro unuyachina horno hina paykunapaq karqan.

⁵²Chay hinaqa, uyariykuway mañakuyniyta, kamachiykin kani, hinallataq Israel llaqtaykiq mañakusqantapas uyariykuy. ¡Diosnillayku! Uyariykullawankikupuni qanman mañakamuqtiyku.

⁵³Qanmi, Señor Diosníy kaqniykipaq kay llaqtata akllakusqanki kay pachapi llapan suyukunamanta, ñawpa taytankuta Egipto suyumanta horqomushaspayki Moisés kamachiykiwan willachisqaykiman hina, nispa.

⁵⁴Altarpa ñawpaqenpi qonqoriykukuspan makintapas hanaq pachaman haywarispa, Salomonqa Señor Diosmanta mañakusharqan. Chayta tukuspataq sayarirqan,

⁵⁵hinaspa llapan huñuykusqa kashaq Israel runakunata saminchaspa kunkayoqta nirqan:

⁵⁶— Señor Diosqa saminchasqa kachun. Diosqa prometesqanman hinan sumaq kawsayta Israel llaqtanman qowarqanchis, payqa mana qonqaspan chanin prometekusqanta hunt'arqan, Moisés kamachinwan willachiwasqanchisman hina.

⁵⁷Chay hinaqa, Diosninchis Señor Diosmi yanapaykuwasun imaynan ñawpa taytanchiskunata yanaparqan hinata, manan qonqawasunchu, manataq saqerpariwasunpaschu.

⁵⁸Diosninchis Señor Diosmi kasukuq sonqota qoykuwasun munayninta ruwananchispaq, ahinapi ñawpa taytanchiskunaman kamachikuy siminkunata, chaninchayninkunata, unanchayninkunata, kamachikuyninkunatawan lliwta hunt'ananchispaq.

⁵⁹Kay mañakusqayta Diosninchis Señor Dios, tuta-p'unchay yuyarillachunpuni, ñoqa kamachintapas Israel llaqtantapas allinta qhawariwananchispaq, yanapaykuwananchispaq sapa p'unchay necesitasqanchisman hina.

⁶⁰Chay hinapin, llapan kay pacha suyu runakuna yachanqaku pay sapallan Diosqa kasqanta, nispa.

⁶¹Nillarqantaq llaqtata: — Diosninchis Señor Diospaq hunt'aqllapuni kawsaychis, hinallataq hunt'aychis kamachikuy siminkunatapas unanchayninkunatapas kunan p'unchay hina, nispa.

⁶²Chay qhepatataq reypas llapan Israel runakunapas sacrificiota Señor Diosman haywarqanku.

⁶³Salomonmi haywarqan sumaq kawsay sacrificiota iskay chunka iskayniyoq waranqa torokunata, pachak iskay chunka waranqa ovejakunatawan. Ahinatan rey Salomonpas llapan Israel runakunapas Señor Dios yupaychana wasita sapaqcharqanku.

⁶⁴Señor Dios yupaychana wasiq ñawpaqenpi kaq bronce altarqa huch'uymi karqan, manataq chaskirqanchu llapan ruphachina sacrificiokunata, ruru ofrendakunata, sumaq kawsay sacrificioq wirankunatapas. Chaymi Salomonqa wasiq ñawpaqen patio chawpita ch'uyancharqan, hinaspa chaypi llapan chaykunata Señor Diosman haywarqan.

⁶⁵Chay kutin Salomonqa llapan Israel runakunapiwan Diosninchis Señor Diospa sutinpi Ch'uklla Ruwana Fiestata qanchis p'unchay ruwarqanku. Hamat Q'asamanta Egipto qorpakama tiyaq llapan Israel runakunan chay fiestaman askhallaña huñuykukurqanku. Huk qanchis p'unchaytawanraqmi fiestata ruwarqanku, llapanpitaq chunka tawayoq p'unchay karqan.

⁶⁶Qhepantin p'unchaytaq Salomonqa runakunata kacharparipurqan, hinan paykuna reyta saminchaspa wasinkuta ripurqanku, ancha kusisqa sonqopas-sonqo tukuy allinkunata kamachin Davidpaq Israel llaqtanpaqpas Señor Diospa ruwasqanmanta.