Read Diospa Simin Qelqa 2 REYES 11 Bible Online

2 REYES 11 - Diospa Simin Qelqa bible

2 REYES 11

¹Ocoziaspa maman Atalian churin Ocoziaspa wañusqanta yachaspa, llapanta rey t'aqa aylluta wañuchirqan.

²Rey Jorampa ususin, Ocoziaspa panan Josaban ichaqa Ocoziaspa churin Joasta t'aqarqan Ocoziaspa wakin wawankunata wañuchishasqanmanta, hinaspan Ataliamanta pakarqan puñunan wasipi wawa amanitawan kuskata. Chay hinapin Joastaqa mana wañuchirqanchu.

³Payqa pananpapi tiyaspanmi Señor Dios yupaychana wasipi soqta wata pakasqa karqan. Chaykamataq Ataliaqa suyuta kamachisharqan.

⁴Qanchiskaq watapitaq Joiadaqa waqyachimurqan Caremanta pachak soldadoq umallinkunata, pachak guardiaq umallinkunatawan, hinaspa Señor Dios yupaychana wasiman pusaykurqan. Chaypin paykunata jurachirqan hinaspa rimanakurqanku, chaymantataq reypa churin Joasta rikuchirqan.

⁵Hinaspan paykunata kamachirqan: — Kay hinatan ruwankichis, mayqenkunamanchus samana p'unchaypi llank'anaykichispaq tupasunkichis chayqa, qankunan kinsaman t'aqakunkichis, hinaspa huk t'aqa reypa wasinta waqaychaychis,

⁶huk t'aqataq Shur punkupi kashaychis, hukkaq t'aqataq yupaychana wasi guardiakunaq tiyanan wasiq qhepan punkupi kashaychis.

⁷Samana p'unchaypi llank'anamanta lloqsiqkunan, qankuna iskay t'aqa kankichis, Dios yupaychana wasita makilla qhawankichis reyta waqaychanaykichispaq.

⁸Hinaspa reyta muyuykunkichis, sapanka makiykichispi armayoqkama, pipas qankunaman asuykuqtaqa wañuchinkichismi. Qankunan reyta maytaña puriqtinpas riysinkichis, nispa.

⁹Hinan pachak soldado kamachiqkunaqa sacerdote Joiadaq kamachisqanman hina lliwta ruwarqanku. Chaymi pachak soldadoq umallinkunaqa samana p'unchaypi llank'ananpaq riq soldadonkunatapas llank'ananmanta samapunanpaq ripuq soldadonkunatapas huñurqanku, hinaspataq sacerdote Joiadaman asuykurqanku.

¹⁰Hinan sacerdote Joiadaqa pachak soldadoq umallinkunaman qorqan lanzakunata, escudokunatawan. Chay armakunaqa rey Davidpan kasqa, Señor Diosta yupaychana wasipitaq kasharqan.

¹¹Soldadokunataq makinkupi armantinkama reypa muyuriqninpi sayarqanku, paykunaqa altar qayllapin kasharqanku yupaychana wasiq wichay ladonmanta uray ladonkama.

¹²Hinan Joiadaqa reypa churinta horqomurqan, hinaspa payman coronata churarqan, reypa imachus ruwanan qelqatawan qorqan. Chaymantataq rey kasqanta rimarirqanku, hinaspa aceitewan hawirqanku. Chaymi llapanku t'aqllakuspa qaparirqanku: ¡Kawsachun rey! nispanku.

¹³Ataliataq guardiakunaqpas runakunaqpas qaparisqanta uyarispa, Señor Dios yupaychana wasipi kashaq runakunaman rirqan.

¹⁴Hinaspan payqa chaypi reyta rikurqan tusa qayllapi sayashaqta, imaynachus ruwana karqan chayman hina. Paywan kuskataq umallikuna corneta tocaqkuna kasharqanku, runakunapas ancha kusisqa trompetata tocasharqanku. Chaymi Ataliaqa p'achanta llik'ikuspa, qaparirqan: — ¡Q'otukuymi kayqa! ¡Q'otukuymi kayqa! nispa.

¹⁵Joiadaqa manan yupaychana wasipi Ataliata wañuchinata munarqanchu, chaymi ejército umallikunata kamachirqan: — ¡Guardiakunaq chawpinta hawaman horqoychis, pipas hark'akuqtataq wañuchiychis! nispa.

¹⁶Hinan Ataliata hap'ispa, reypa wasinman caballokunaq haykunan punkunta apaykuspa chaypi wañuchirqanku.

¹⁷Chay qhepatataq Joiadaqa reyta runakunatawan nirqan: — Señor Dioswan rimanakuychis paypa llaqtan kanaykichispaq, nispa. Hinan paykunaqa ahinata ruwarqanku. Chaymantataq reytawan runakunatawan rimanachirqan.

¹⁸Chaymi llapanku Baal dios yupaychana wasita rirqanku, hinaspa thunirqanku, idolonkunatapas altarninkunatapas hukpaqkama ñut'urqanku. Baalpa sacerdoten Matantataq altarpa qayllanpi wañuchirqanku. Hinamantataq sacerdote Joiadaqa Señor Dios yupaychana wasiman guardiakunata churarqan,

¹⁹hinaspataq payqa pachak soldadoq umallinkunapiwan, Caremanta soldadokunapiwan, guardiakunapiwan, llapan runakunapiwan reyta riysirqanku Señor Dios yupaychana wasimanta reypa palacionkama. Guardiakunaq haykunan punkutataq haykurqanku. Rey Joastaq kamachikuy tiyanapi tiyaykurqan,

²⁰hinan llapa runakuna kusikurqanku. Ataliataqa reypa kamachikunan wasipi wañuchirqankuña, chaymi llaqtaqa thak-nisqa kapurqan.

²¹Joasqa qanchis watayoqmi karqan kamachikuyta qallarishaspa.