Read Diospa Simin Qelqa 2 REYES 13 Bible Online

2 REYES 13 - Diospa Simin Qelqa bible

2 REYES 13

¹Ocoziaspa churin Joás iskay chunka kinsayoqkaq watapi kamachikushaqtinmi, Jehupa churin Joacazqa Israelpi kamachikuyta qallarirqan, kamachikurqantaq Samariamanta chunka qanchisniyoq watata.

²Manapunin Señor Diospa munayninman hinachu ruwarqan, aswanpas Nabatpa churin Jeroboampa Israelta huchallichisqan huchakunatan ruwarqan, manataq chaykunamanta t'aqakurqanchu.

³Chay hawan Señor Diosqa Israel contra sinchita phiñakurqan, chaymi Siria suyu rey Hazaelman churin Ben-Hadadmanwan hap'iykachirqan unay watakuna kamachinpi kanankupaq.

⁴Hinan Joacazqa Señor Diosmanta mañakurqan, Señor Diosqa rikurqanmi imaynatachus Siria reyqa Israel runakunata sinchitapuni muchuchishasqanta, chaymi payqa mañakusqanta uyarirqan.

⁵Hinaspan Señor Diosqa Israel runakunaman huk qespichiqta kacharqan, ahinapin paykunaqa Siria suyuq kamachisqan-kaymanta qespikurqanku, chaymi kaqlla ñawpa hina wasinkupi thak-nisqa tiyarqanku.

⁶Chaywanpas manapunin t'aqakurqankuchu Jeroboampa ayllunkunaq Israelta huchallichisqan huchakunamantaqa, aswanpas huchallikushallarqankupunin. Asera diosaq rikch'ayninpas Samariapi kashallarqanpunin.

⁷Joacazpa ejercitonqa pisichallañan qheparqan, phisqa chunka caballería soldadokuna, maqanakuypaq chunka carretakuna, chunka waranqa chakillapi soldadokunapiwan, Siria suyu reymi wakinkunataqa ch'usaqyachirqan hallp'ata hinaraq ñut'uspa.

⁸Joacazmanta wakin willakuykunapas tukuy ruwasqanmantapas atiyninmantapas Israel Reykunaq Willakuynin Qelqapi qelqasqan kashan.

⁹Wañupuqtinqa Samariapin p'ampapurqanku. Chay qhepatataq churin Jehoás[5] rantinpi kamachikurqan.

¹⁰Judá rey Joás kinsa chunka qanchisniyoqkaq watapi kamachikushaqtinmi, Joacazpa churin Jehoasqa Israelpi kamachikuyta qallarirqan, kamachikurqantaq Samariamanta chunka soqtayoq watata.

¹¹Manapunin Señor Diospa munayniman hinachu ruwarqan, payqa manan t'aqakurqanchu Nabatpa churin Jeroboampa Israelta huchallichisqan lliw huchakunamantaqa, aswanpas ruwashallarqanpunin.

¹²Jehoasmanta wakin willakuykunapas, tukuy ruwasqanmantapas, atiyninmantapas, Judá rey Amasiaswan maqanakusqanmantapas Israel Reykunaq Willakuynin Qelqapi qelqasqan kashan.

¹³Jehoás wañupuqtinqa Samariapin p'ampapurqanku, Israel reykuna p'ampasqa qayllapi. Chay qhepatataq Jeroboam kamachikurqan.

¹⁴Eliseotaqa wañuy onqoymi hap'irqan, chaymi Israel rey Joasqa watukuq rirqan, hinaspan ñawpaqenpi waqarqan: — ¡Taytalláy! ¡Taytalláy! ¡Qanqa Israelpa atiyniyoq hark'aykuqninmi karqanki! nispa.

¹⁵Eliseotaq nirqan: — Hap'iy huk wach'ita iskay kinsa wach'inatawan, nispa. Hinan reyqa hap'irqan huk wach'ita iskay kinsa wach'inatawan.

¹⁶Chaymi Eliseoqa nirqan: — Wach'inaykipaq wakichikuy, nispa. Wakichikuqtintaq Eliseoqa makinta reypa makin pataman churarqan,

¹⁷hinaspa nirqan: — Inti lloqsimuy lado ventanata kichariy, nispa. Kichariqtintaq kamachirqan: — ¡Wach'illayña! nispa. Hinan reyqa wach'irqan. Eliseotaq qaparirqan: — ¡Señor Diospa llallichiq wach'inan! ¡Siria suyuta atipaq wach'ina! ¡Qanmi Siria runakunata Afecpi atipanki ch'usaqyachinaykikama! nispa.

¹⁸Chay qhepatataq Eliseoqa reyta nirqan: — Hap'iy wach'inakunata, nispa. Hap'iqtintaq kamachirqan: — Kunanqa pampata waqtay, nispa. Hinan reyqa kinsa kutillata pampata waqtarqan.

¹⁹Chaymi profetaqa reypaq phiñakurqan, nirqantaq: — Phisqa kutitapas soqta kutitapas pampata waqtawaq karqan chayqa, Siria runakunata ch'usaqyachinaykikaman atipawaq karqan, kunanqa kinsa kutillatan paykunata atipanki, nispa.

²⁰Eliseo wañukapuqtintaq p'ampapurqanku. Sapa wata hinan tarpuy kinrayta Moabmanta llat'anaqkuna Israel suyuman hamullaqkupuni.

²¹Huk kutinmi Israel runakuna huk wañusqa qharita p'ampasharqanku, hinan llat'anaq t'aqa hamushasqanta rikuspanku ayata wikch'uykurqanku Eliseo p'ampasqa t'oqoman, hinaspan ayqekurqanku. Chay qhariq ayantaq Eliseoq tullunkunaman tupaykuspa hina kawsarirqanpuspa sayarirqan.

²²Rey Joacazpa lliw kamachikusqan p'unchaypin Siria suyu rey Hazaelqa Israelta muchuchisqa.

²³Chaywanpas Señor Diosmi Israel runakunata munakurqan, khuyapayarqan, sumaqta qhawarirqan, Abrahamwan, Isaacwan, Jacobwan rimanakusqanrayku. Chaymi kunan p'unchaykamapas mana ch'usaqyachirqanchu, manallataq ñawpaqenmantapas wikch'urqanchu.

²⁴Siria suyu rey Hazael wañupuqtinqa, churin Ben-Hadadmi rantinpi kamachikurqan.

²⁵Hinan Joacazpa churin Jehoasqa Ben-Hadadmanta qechusqan llaqtakunata chaskikapurqan, chaykunatan Ben-Hadadqa taytan Joacazwan maqanakushaspa qechusqa. Jehoasqa kinsa kutitan Ben-Hadadta atiparqan, hinaspan qechukapurqan Israelpa llaqtankunata.