Read Diospa Simin Qelqa 2 REYES 19 Bible Online

2 REYES 19 - Diospa Simin Qelqa bible

2 REYES 19

¹Chayta uyarispataq rey Ezequiasqa p'achanta llik'ikurqan, llakisqa kaspataq qhasqa p'achawan churaykukuspa Señor Dios yupaychana wasita rirqan.

²Hinaspan mayordomon Eliaquimta, qelqaq Sebnata, kurak sacerdotekunatawan qhasqa p'achayoqta Amozpa churin profeta Isaiasman kacharqan.

³Paykunataq nirqanku: — Rey Ezequiasmi nin: Kunanmi kashanchis hatun llakipi, sinchi muchuchisqa, huch'uyyachisqa, imaynan warmiqa wachakunan patapi kallpan mana kapunchu wachakunanpaq chay hinaraq.

⁴Asiria reymi qollana oficialninta kachamusqa kawsaq Diosta k'aminanpaq, allinchá kanman Diosniyki Señor Dios chay rimasqanta uyarispa payta muchuchinman chayqa. Chay hinaqa, puchuq runakunapaq mañakuy, nispa.

⁵Ezequiaspa oficialninkuna Isaiasman riqtinmi,

⁶Isaiasqa kutichirqan: — Rey Ezequiasta niychis, Señor Diosmi nin: Ama manchakuychu Asiria reypa oficialninkunaq ñoqata ñakawaspa rimasqantaqa.

⁷Kunanmi payman huk yuyayta churasaq, hinan huk willakuyta uyarispa suyunman kutipunqa, chaypitaq espadawan wañuchisaq, nispaykichis.

⁸Asiria suyu qollana oficialqa Asiria reypa Laquis llaqtamanta ripusqanta uyarispanmi, Jerusalenmanta ripuspa reyninta Libna llaqtaman phawaykushaqta tarirqan.

⁹Chaypin Asiria suyu reyqa uyarirqan: Etiopía suyu rey Tirhacan qan contra maqanakuq hamushan nisqata. Judá rey Ezequiasmantaq wakmanta willaqkunata kacharqan.

¹⁰Hap'ipakushasqayki diosniyki: Manan Jerusalén llaqtataqa Asiria rey munaychakunqachu, nispa nisuqtiykiqa, ama paywan q'otuchikuychu.

¹¹Qanqa yachankin imaynatachus Asiria reykunaqa llapan suyukunata ch'usaqyachisqanta. ¿Qantaqchu kunan qespikuwaq?

¹²Gozán llaqtata, Harán llaqtata, Resef llaqtata, Telasar hap'iypi tiyaq Bet-edén runakunatapas ñawpa taytaykuna atipashaqtin, manan chay llaqtakunaq diosninkuqa paykunata qespichirqanchu.

¹³¡Maytaq Hamatpa reynin, Arfatpa reynin, Sefarvaimpa reynin, Henaq reynin, Ivaq reyninpas! nispa.

¹⁴Hinan Ezequiasqa willaqkunaq qosqan qelqata leerqan. Chaymantataq yupaychana wasita rispa Señor Diospa ñawpaqenpi chay qelqata mast'arirqan,

¹⁵mañakurqantaq: Israelpa Diosnin Señor, querubinkuna patapin tiyanaykipi kashanki. Qan sapallaykin kanki llapan kay pacha suyukunaq Diosnin, qanmi kamarqanki hanaq pachatapas kay pachatapas.

¹⁶Señor Diosníy, kutirimuway, hinaspa uyariykuway. Señor Diosníy, ñawiykita kichariy, hinaspa qhawariway. Uyariy Senaqueribpa tukuy rimasqankunata, paymi kachamurqan qollana oficialninta qan kawsaq Diosta k'aminasuykipaq.

¹⁷Señor Diosníy, cheqaqtapunin Asiria reykunaqa chay suyukunatapas hallp'ankunatapas ch'usaqyachirqan,

¹⁸diosninkutapas ninawan kanaykurqanku. Chaykunaqa manan cheqaq Dioschu karqan, aswanpas rumimanta kurkumanta runaq ruwasqallanmi, chayraykun ch'usaqyachirqanku.

¹⁹Kunanqa, Diosniyku Señor Dios, chay reypa atiyninmanta qespichiwayku, llapan kay pachapi suyukuna qan Señor sapallayki Dios kasqaykita yachanankupaq, nispa.

²⁰Profeta Isaiasmi rey Ezequiasman willaqta kachaspa nirqan: — Israelpa Diosnin Señormi nin: Uyarinin Asiria rey Senaquerib hawa mañakuwasqaykita.

²¹Chaymi pay contra nini: Sión llaqtaq ususin sipasmi asikuspa pisichasunki, Jerusalén llaqtaq ususinmi qanpa ayqekusqaykita rikuspa, asikuspa umanta chhaphchirin.

²²¿Pitataq pisicharqankipas k'amirqankipas? ¿Pi contrataq hatunta rimarirqanki? ¡Ñoqa Israelpa Ch'uya Diosnin contran!

²³Willaq kachasqaykikunawanmi ñoqa Señor Diosta k'amichiwarqanki. Nirqankitaq: Askhallaña maqanakuypaq carretaykunapin orqo patakunaman wicharqani, Libanoq aswan hatun orqonkunamanmi seqarqani. Sinchi hatun cedro sach'akunatan wit'urqani, ancha sumaq pino sach'akunatan kumparqani. Aswan ukhu sach'a-sach'akaman haykurqani, aswan thami sach'a-sach'akunamanmi ayparqani.

²⁴Wak suyukunapin p'uytuta hasp'irqani, chaymantan unuta ukyarqani, chakiywan saruspan Egiptoq llapan mayunkunata ch'akichirqani, nispa.

²⁵¿Manachu uyarirqanki? Ñawpaqtaraqmi ñoqaqa chay hina kananta unancharqani, unay watakunamantañan kaykunataqa yuyaykurqani, kunantaqmi hunt'ashani, chaymi qanqa allin perqasqa llaqtakunata thuninki, raqay-raqaymanpas tukuchinki.

²⁶Runakunan pisi kallpa kapunku, manchasqa p'enqachisqan kapunku, campopi q'achu hinan kapunku, qholla pasto hinan kapunku, wasi patapi wiñaq q'achu hinan kapunku, manaraq wiñarishaspan naq'epunku.

²⁷Yachanin tukuy purisqaykikunata, tukuy ruwasqaykikunatapas, yachanin ñoqa contra sinchita phiñakusqaykitapas.

²⁸Ñoqa contra phiñakusqayki hawan lerq'opayawasqayki hawan senqaykiman argollata churasaq, simiykiman frenota churasaq, hinan maynintachus hamurqanki chay ñanninta kutichisqayki, nispa.

²⁹Qanmantaq, Ezequías, imachus kananta yachanaykipaq kayta niyki: K'ipa rurutan mikhunkichis kay watapas q'aya watapas, kinsakaq watapin ichaqa tarpunkichis, ichhunkichis. Uvas chakratapas plantankichis, uvastapas mikhunkichis.

³⁰Judapi kawsayniyoq puchuqkunaqa mallki hinan kanqaku, pampamanmi saphinqaku, altomantaq rurunqaku.

³¹Jerusalenpiqa puchuq runakunan qhepanqapuni, Sión orqopiqa kawsaqkunan qhepanqapuni. Chaytaqa ruwanqa Señor Diospa ancha sienteq munakuyninmi, nispa.

³²Chayraykun Señor Diosqa Asiria reymanta nin: Manan Jerusalenman haykunqachu, manan huk wach'inatapas wach'inqachu, manan escudowanpas phawaykunqachu, manan perqanpipas pata-pata seqanata tawqanqachu.

³³Kikin hamusqan ñannintan kutipunqa, manan kay llaqtaman haykumunqachu.

³⁴Kay llaqtataqa ñoqan waqaychaspa qespichisaq, David kamachiyrayku ñoqaq sutiyrayku, nispa.

³⁵Chay kikin tutapachan Señor Diospa angelninqa rispan karpa-karpapi kashaq pachak pusaq chunka phisqayoq waranqa Asiria soldadokunata wañuchirqan, llapankutaq wañusqa paqarirqanku.

³⁶Hinan Asiria suyu rey Senaqueribqa karpakunata hoqarispa Nínive llaqtaman kutipurqan.

³⁷Huk p'unchaymi Senaqueribqa Nisroc diosnin yupaychana wasipi yupaychashaqtin, iskaynin churinkuna Adramelecpiwan Sarezerpiwan chaypi payta wañurqachirqanku, hinaspataq Ararat hap'iyman ayqekurqanku. Chay qhepatataq churin Esarhadón rantinpi kamachikurqan.