Read Diospa Simin Qelqa 2 REYES 2 Bible Online

2 REYES 2 - Diospa Simin Qelqa bible

2 REYES 2

¹Eliasmi muyuq wayrapi hanaq pachaman Señor Diospa hoqaripunanpaqña kashaqtin, Eliseopiwan Gilgalmanta risharqanku.

²Hinan Eliasqa Eliseota nirqan: — Kaypi qhepakuy, Señor Diosmi Betelman rinaypaq kamachiwan, nispa. Eliseotaq kutichirqan: — Señor Diospa sutinpin qanpa sutiykipiwan jurani, manan qhepaymanchu, nispa. Hinan Betelman kuska rirqanku.

³Betelpi tiyaq profetakunataq Eliseowan tupaq lloqsimuspanku payta nirqanku: — ¿Yachankichu yachachiqniykita qayllaykimanta Señor Diospa apakapunanta? nispa. Eliseotaq kutichirqan: — Arí, yachaniñan, ch'inlla kaychis, nispa.

⁴Eliasqa wakmantan Eliseota nirqan: — Kunanqa kaypi qhepakapuy, Señor Diosmi Jericoman rinaypaq kamachiwan, nispa. Paytaq kutichirqan: — Señor Diospa sutinpin qanpa sutiykipiwan jurani, manan qhepaymanchu, nispa. Hinan Jericoman kuska rirqanku.

⁵Jericopi tiyaq profetakunataq Eliseoman qayllaykuspa nirqanku: — ¿Yachankichu yachachiqniykita qayllaykimanta Señor Diospa apakapunanta? nispa. Eliseotaq kutichirqan: — Arí, yachaniñan, ch'inlla kaychis, nispa.

⁶Hinan Eliasqa Eliseota nillarqantaq: — Valekuykin, kaypi qhepakapuy, Señor Diosmi Jordanman rinaypaq kamachiwan, nispa. Paytaq kutichirqan: — Señor Diospa sutinpin qanpa sutiykipiwan jurani, manan qhepakuymanchu, nispa. Chaymi iskayninku kuskallapuni risharqanku.

⁷Jericopi tiyaq phisqa chunka profetakunataq qhepankuta rirqanku. Eliastaq Eliseopiwan Jordán mayu pataman chayaspa sayaykurqanku, profetakunapas paykunaq as chhikan qhepaneqninpi sayaykullarqankutaq.

⁸Hinan Eliasqa capanta k'uyurqan, hinaspa chaywan mayuta waqtaykurqan, chaymi unuqa iskay ladoman t'aqakurqan, iskayninkutaq ch'akinta chimparqanku.

⁹Chimparqospankuñataq Eliasqa Eliseota nirqan: — Manaraq qayllaykimanta hoqarisqa kashaqtiy mañakuway, ¿imatan qanpaq ruwanayta munanki? nispa. Paytaq nirqan: — Valekuykin, espirituykiq atiyninwan kallpachawanaykita qanpa rantiykipi qhepanaypaq, nispa.

¹⁰Eliastaq nirqan: — Sinchi sasatan mañakunki, ichaqa qayllaykimanta hoqarisqa kasqayta rikunki chayqa chaskinkin, mana hinaqa, manan chaskinkichu, nispa.

¹¹Iskayninku parlaspa rishaqtinkutaq, huk nina carreta nina caballokunantin[3] chawpinkuman haykuspa t'aqarqan. Hinan Eliasqa huk muyuq wayrapi hanaq pachaman wicharipurqan.

¹²Eliseotaq chayta rikuspa qaparirqan: ¡Taytalláy! ¡Taytalláy! ¡Qanqa Israelpa atiyniyoq hark'aykuqninmi karqanki! nispa. Eliseoqa manan hayk'aqpas Eliasta rikurqanñachu. Payqa llakikuymantan p'achanta hap'ispa iskayman llik'irqan.

¹³Chaymantataq Eliseoqa Eliaspa urmaykamuq capanta hoqarispa kutipurqan, Jordán mayu patapitaq sayaykurqan.

¹⁴Hinaspanmi Eliaspa capanwan unuta waqtaykuspa nirqan: ¿Maypin kashan Eliaspa Diosnin Señor Diosqa? nispa. Waqtaykuqtin hinan unuqa iskayman t'aqakurqan, chaymi Eliseoqa ch'akinta chimparqan.

¹⁵Chimpapi qhepaq Jericomanta profetakunataq chayta rikuspanku nirqanku: Eliaspa atiyniyoq espiritunmi Eliseopi qhepapun, nispa. Chaymi Eliseota chaskiq rirqanku, qayllaykuspataq ñawpaqenpi qonqorikurqanku.

¹⁶Hinaspa nirqanku: — Qhawariy, ñoqayku kamachiykikunawanmi kashan kallpayoq phisqa chunka qharikuna, chay hinaqa, kachasun yachachiqniyki maskhaqta. Paqtan Señor Diospa Espiritun hoqarispa mayqen orqomanpas wayq'omanpas wikch'unman karqan, nispa. Eliseotaq kutichirqan: — Ama kachaychischu, nispa.

¹⁷Sinchita rimapayaqtinkutaq Eliseoqa uyakurqan, hinaspa: — Kachaychis, nirqan. Paykunataq kacharqanku phisqa chunka qharikunata, hinan paykunaqa kinsa p'unchay maskhamuspa mana tarimurqankuchu.

¹⁸Chaymi Jericó llaqtapi Eliseoq kasqanman kutimpurqanku, Eliseotaq paykunata nirqan: — Ñoqaqa “ama riychischu” nirqaykichismi, nispa.

¹⁹Chay llaqta runakunataq Eliseota nirqanku: — Qhawariy, kay llaqtaq kasqan cheqasqa ancha allinmi qan wiraqochaykuq rikusqayki hinapas, ichaqa ununmi mana allinchu, chaymi hallp'apas mana rurunchu, nispa.

²⁰Eliseotaq nirqan: — Huk mosoq p'ukupi kachita churaykuspa apamuwaychis, nispa. Hinan paykunaqa aparqanku.

²¹Eliseotaq unu pukyuman rispa kachiwan hich'aykuspa nirqan, Señor Diosmi nin: Ñoqan kay unu pukyuta ch'uyanchani, kunanmantaqa manan wañuypas mana ruruq hallp'apas kanqañachu, nispa.

²²Chaymantapachan unuqa Eliseoq nisqanman hina allin kapurqan.

²³Chay qhepatataq Eliseoqa Jericomanta Betelman rirqan. Ñanta wichashaqtintaq llaqtamanta waynachakuna lloqsimuspanku Eliseota k'amirqanku: — ¡Yaw, p'aqla uma, lloqsiy kaymanta! ¡Yaw, p'aqla uma, lloqsiy kaymanta! nispanku.

²⁴Eliseotaq qhepaman kutirispa qhawarirqan, hinan Señor Diospa sutinpi ñakarqan. Chaymantataq sach'a-sach'amanta iskay ukumarikuna lloqsirqamuspan chay waynachakunamanta tawa chunka iskayniyoqta llik'irqarirqan.

²⁵Betelmantan Eliseoqa Carmelo orqoman rirqan, chaymantataq Samaria llaqtaman kutimpurqan.