Read Diospa Simin Qelqa 2 REYES 22 Bible Online

2 REYES 22 - Diospa Simin Qelqa bible

2 REYES 22

¹Josiasqa pusaq watayoqmi karqan kamachikuyta qallarishaspa, kamachikurqantaq Jerusalenmanta kinsa chunka hukniyoq watata. Mamanqa Boscatmanta Adaiaq ususin Jedidan karqan.

²Josiasqa Señor Diospa munayninman hinapunin chaninta ruwarqan, payqa ñawpa taytan Davidpa ruwasqanta hinan ruwarqan, mana pañamanpas lloq'emanpas t'aqakuspa.

³Rey Josiasqa chunka pusaqniyoqkaq watapi kamachikushaspanmi, Mesulampa nieton Azaliaq churin, qelqaqnin Safanta Señor Dios yupaychana wasita kacharqan:

⁴— Phaway uma sacerdote Hilquiasman, hinaspa ninki: Señor Dios yupaychana wasiman runakunaq qolqe apasqankutan punku qhawaqkuna chaskirqanku chay qolqeta huñuy,

⁵hinaspa Dios yupaychana wasita allichachiqpaq churasqa umallikunaman qoy. Paykuna Dios yupaychana wasi allichaypi llank'aqkunaman pagapuchunku,

⁶k'ullu llaqllaqkunaman, wasi perqaqkunaman, rumi thupaqkunamanwan. Hinallataq kurkuta, thupasqa rumitawan rantichunku Dios yupaychana wasita allichanapaq.

⁷Paykunaqa hunt'aq runakunan kanku, chayrayku chay qolqemantaqa ama cuentata mañachunkuchu, nispa.

⁸Uma sacerdote Hilquiastaq qelqaq Safanman willarqan: — Señor Dios yupaychana wasipin kamachikuy qelqa k'uyuta tarirqoni, nispa. Safanmantaq qorqan, paytaq leerqan.

⁹Chaymantataq Safanqa rey Josiasman willaq rispa nirqan: — Reyníy, kamachiykikunaqa Dios yupaychana wasipi kaq qolqeta huñuspankun, wasita allichachiqpaq churasqa umallikunaman qonkuña, nispa.

¹⁰Nillarqantaqmi: Sacerdote Hilquiasmi kay qelqa k'uyuta qomuwan, nispa. Hinaspan Safanqa reypa ñawpaqenpi leerqan.

¹¹Hinan reyqa kamachikuy qelqa k'uyu leesqanta uyarispa, p'achanta llakikuymanta llik'ikurqan,

¹²hinaspataq kamachirqan Safanpa churin Ahicamta, Micaiaspa churin Acborta, qelqaq Safanta, paypa yanapaqnin Asaiastawan:

¹³— Riychis Señor Diosta tapumuychis ñoqapas llapan Judá runakunapas tarisqanku qelqaman hinaqa imaynachus kanaykuta. Señor Diosqa k'arak phiñasqan ñoqanchispaq kashan, ñawpa taytanchiskunapas kay qelqapi ruwanapaq kamachiwasqanchista manataq kasukusqakuchu chayqa, nispa.

¹⁴Chaymi Hilquías, Ahicam, Acbor, Safán, Asaiaspiwan rirqanku profetisa Huldaman. Payqa Salumpa warminmi karqan, Salumtaq Harhaspa churin Ticvaq churin karqan, Dios yupaychana wasipi p'achakuna waqaychaq. Huldaqa Jerusalenpi yapachisqa llaqtapin tiyarqan.

¹⁵Paymi willaqtinku nirqan, Israelpa Diosnin Señormi nin: Ñoqata tapuwanaykichispaq kachamuwaqniykichis runaman willamuychis:

¹⁶Ñoqa Señor Diosmi nini: Ancha hatun llakitan kay llaqtamanpas chaypi tiyaq runakunamanpas chayachisaq, Judá reypa leesqan qelqa k'uyupi tukuy willakusqanman hina.

¹⁷Paykunaqa wikch'uwarqankun, hinaspa wak dioskunaman inciensota q'apachirqanku, tukuy ruwasqankuwanmi phiñachiwarqanku, chayraykun phiñakuyniy kay llaqta contra rawrarin, manataqmi thaninqachu, nispaykichis.

¹⁸Nillarqantaq: — Señor Diosta tapunaypaq kachamuqniykichis Judá reytataq ichaqa niychis: Israelpa Diosnin Señormi uyarisqayki qelqamanta nin:

¹⁹Kay llaqtatan runakunatawan ch'usaqyachisaq, ñakasaq, nisqayta uyarispaykin, qanqa kasukuq sonqoyoq karqanki, hinaspa huch'uyyaykukurqanki, hinallataq llakikuymanta p'achaykitapas llik'ikuspa ñawpaqeypi waqarqanki, chaymi ñoqapas uyarirqayki.

²⁰Chay hinaqa, mana ima llakillayoqmi wañukapunki, ñawpa taytaykikunawan kuskataq p'ampasqa kanki, manataqmi kay llaqta muchuchisqaytaqa rikunkiñachu, nispa. Hinan kachasqakunaqa kutirqanku tukuy chaykunata reyman willanankupaq.