Read Diospa Simin Qelqa 2 REYES 24 Bible Online

2 REYES 24 - Diospa Simin Qelqa bible

2 REYES 24

¹Joacimpa kamachikusqan tiempopin Babilonia rey Nabucodonosorqa Judá suyuta munaychakuq phawaykurqan, chaymi Joacimqa kinsa wata payta servirqan. Chaymantataq huk-hinata yuyaykuspa Nabucodonosor contra sayarirqan.

²Ichaqa Señor Diosmi Joacim contra kachamurqan t'aqa-t'aqa llat'anaqkunata, paykunan karqan Babiloniamanta, Siriamanta, Moabmanta, Amonmantawan. Chaykunatan Señor Diosqa kachamurqan Judata ch'usaqyachinanpaq, kamachin profetakunawan willachisqanman hina.

³Señor Diosqa yuyaykurqanmi ñawpaqenmanta Judá runakunata wikch'upuyta Manasespa tukuy huchankuna hawa, mana allin ruwasqankuna hawa, chayraykun llat'anaqkunata kacharqan.

⁴Manasesmi Jerusalenpi mana huchayoq runakunata wañuchispa hinantinpi yawarta hich'asqa, chayraykun Señor Diosqa mana payta pampachayta munarqanchu.

⁵Joacimmanta wakin willakuykunapas tukuy ruwasqanmantapas Judá Reykunaq Willakuynin Qelqapi qelqasqan kashan.

⁶Wañupuqtinqa churin Joaquinmi rantinpi kamachikurqan.

⁷Chaymantapachan Egipto suyu reyqa manaña hayk'aqpas suyunmanta lloqsirqanchu, Babilonia suyu reymi tukuy hallp'ankunata hap'ikapurqan Egipto wichay qorpa mayumanta Eufrates mayukama.

⁸Joaquinqa chunka pusaqniyoq watayoqmi karqan kamachikuyta qallarishaspa, kamachikurqantaq Jerusalenmanta kinsa killata. Maman Nehustaqa Jerusalenmanta Elnatanpa ususinmi karqan.

⁹Joaquinqa manapunin Señor Diospa munayninman hinachu ruwarqan, aswanpas taytan hinan mana allinta ruwarqan.

¹⁰Haqay p'unchaykunapin Babilonia rey Nabucodonosorpa soldadonkuna Jerusalén llaqta contra rirqanku hinaspa muyuykurqanku.

¹¹Llaqtata soldadokuna muyuykushaqtintaq, rey Nabucodonosorqa chayarqan.

¹²Hinan Judá rey Joaquinpas, mamanpas, oficialninkunapas, umalli runakunapas, yuyaychaqninkunapas Babilonia reypa qayllanpi huch'uyyaykakapurqanku. Chaymi Nabucodonosorqa pusaqkaq watapi kamachikushaspa Joaquinta presota hap'irqan.

¹³Chaymantataq Señor Dios yupaychana wasimanta reypa kamachikunan wasimantawan llapan chaypi kaq qhapaq kaykunata aparqan, hinallataq Señor Dios yupaychana wasipaq Israel rey Salomonpa ruwachisqan qorimanta llapan serviciokunata p'akirqan, Señor Diospa willasqanman hina.

¹⁴Chay qhepatataq Jerusalenpi tiyaq chunka waranqa runakunata kamachipaq aparqan, chaykunan karqan llapan umalli runakuna, allinnin soldadokuna, llapan herrerokuna, artesanokuna ima. Chaymi Judá suyupiqa sinchi wakcha runakunallaña qheparqan.

¹⁵Hinallataq Nabucodonosorqa Babiloniaman aparqan rey Joaquinta, mamanta, warminkunata, oficialninkunata, suyupi llapan allichachaq runakunata ima.

¹⁶Apallarqantaq kamachipaq qanchis waranqa soldadokunata, waranqa artesanokunata, herrerokunatawan, paykunan karqanku allin kallpasapa, maqanakuyman rinankupaqpas kusallaña.

¹⁷Chaymantataq payqa Joaquinpa tion Mataniasta paypa rantinpi reyta churarqan, suticharqantaq Sedequiasta.

¹⁸Sedequiasqa iskay chunka hukniyoq watayoqmi karqan kamachikuyta qallarishaspa, kamachikurqantaq Jerusalenmanta chunka hukniyoq watata. Maman Hamutalqa Libnamanta Jeremiaspa ususinmi karqan.

¹⁹Sedequiasqa manapunin Señor Diospa munayninman hinachu ruwarqan, aswanpas Joacim hinan mana allinta ruwallarqantaq.

²⁰Jerusalén runakunapas Judá runakunapas sinchitapunin Señor Diosta phiñachirqanku, chaymi payqa ñawpaqenmanta wikch'urqan. Chaymantataq Sedequiasqa Babilonia rey contra sayarirqan.