Read Diospa Simin Qelqa 2 REYES 25 Bible Online

2 REYES 25 - Diospa Simin Qelqa bible

2 REYES 25

¹Hinan isqonkaq watapi Sedequías kamachikushaqtin, chunkakaq killaq chunka p'unchayninpi, rey Nabucodonosorqa llapan soldadontin Jerusalén contra puririrqan, hinaspan llaqta qhawaypi karpakurqanku. Llaqta muyuriqpitaq hark'achita ruwarqanku runakuna mana ayqenanpaq.

²Jerusalenqa muyuykusqa karqan Sedequiaspa chunka hukniyoq wata kamachikuyninkaman.

³Chay kikin watapi tawakaq killaq isqon p'unchayninpin chay llaqtata sinchita yarqay muchuchirqan, manañataq mikhunankupaq kapurqanñachu.

⁴Chaypachan Babilonia soldadokuna llaqta perqata q'asarqanku, chaymi Sedequiasqa soldadokunantin reypa huertan qaylla iskaynin perqa tupay punkunta lloqsirqospa tuta ayqekurqanku, hinaña awqa soldadokuna llaqta muyuriqpi kashaqtinpas, Jordán qheswa wayq'oman ripurqanku.

⁵Babilonia soldadokunataq ichaqa rey Sedequiasta qatiparqanku, hinaspa Jericó pampapi payman tariparqorqanku, llapan soldadonkunataq hinantinman ch'eqeripurqanku.

⁶Babilonia soldadokunataq Sedequiasta presota hap'ispanku Hamat suyupi Ribla llaqtapi kaq Babilonia reyman aparqanku. Chaypin Nabucodonosorqa kamachikurqan Sedequiaspaq imachus kananta.

⁷Hinan pay rikukushaqtin churinkunata wañuchirqanku, Sedequiastataq ñawinta horqorqanku, hinaspa bronce cadenawan watasqata Babiloniaman apachirqanku.

⁸Babilonia rey Nabucodonosor chunka isqonniyoqkaq watapi kamachikushaqtinmi, phisqakaq killaq qanchis p'unchayninpi reypa guardian umalli Nabuzaradanqa Jerusalenman chayarqan, paymi reypa yuyaychaqnin karqan.

⁹Hinaspa ruphaykachirqan Señor Dios yupaychana wasita, reypa wasinta, llapan allichachaq wasikunata, wakin wasikunatapas.

¹⁰Paypa kamachisqan Babilonia soldadokunataq Jerusalén llaqta muyuriq perqata thunirqan.

¹¹Hinallataq Nabuzaradanqa Babiloniaman presota aparqan llaqtapi qhepaq runakunata. Babilonia reyman huñukuq runakunata, wakin runakunatawan.

¹²Sinchi wakcha runakunallatan saqerqan, uvas chakrakunatapas wak chakrakunatapas llank'anankupaq.

¹³Babilonia soldadokunaqa Dios yupaychana wasipi kaq broncemanta tusakunata, carretakunata, unu qochata ima p'akirqanku, hinaspan llapan chaykunata Babiloniaman aparqanku.

¹⁴Apallarqankutaqmi uspha mankakunata, palakunata, pábilo allichanakunata, pocillokunata, Señor Dios yupaychana wasipi broncemanta llapa serviciokunatawan.

¹⁵Reypa guardian umallipas apallarqantaq qorimanta qolqemanta llapan incienso q'apachinakunatapas puruñakunatapas.

¹⁶Señor Dios yupaychana wasipaq rey Salomonpa ruwachisqan iskaynin tusakunapas unu qochapas carretakunapas sinchi llasan karqan, mana pesay atiy.

¹⁷Sapanka tusakunan sayayninman yaqa isqon metro karqan, uma puntapitaq broncemanta huk corona karqan, iskay metro yaparisqa sayayniyoq. Chaypa muyuriqnintaq broncemanta awasqa karqan bronce granadawan sumaqchasqa. Iskaynin tusakunaqa kaqkaman karqan.

¹⁸Babilonia reypa guardian umalliqa presota hap'irqan uma sacerdote Seraiasta, payman qatiq sacerdote Sofoniasta, yupaychana wasi punku qhawaq kinsa runakunatawan.

¹⁹Llaqta runakunamantataq presota hap'irqan soldadokunaq umallinta, llaqtapi kashaq reypa yuyaychaqnin phisqa qharikunata, soldadopaq huñuq umallita, soqta chunka runakunatawan.

²⁰Llapan chaykunatan Nabuzaradanqa aparqan Hamat suyupi Ribla llaqtapi kaq Babilonia reyman.

²¹Chaypin Babilonia reyqa chay runakunata hasut'ichirqan, hinaspa sipichirqan. Chay hinatan Judá suyu runakunaqa llaqtankumanta apasqa karqanku.

²²Babilonia rey Nabucodonosorqa Safanpa churin Ahicampa churin Gedaliastan churarqan, Judapi saqesqan runakunata kamachinanpaq.

²³Hinan Judá suyupi ejército oficialkunaqa soldadonkunapiwan Gedaliasta llaqta kamachiqpaq Babilonia rey churasqanta yachaspanku, Mizpata rirqanku Gedaliaswan tupaq. Kaykunan rirqanku: Netaniaspa churin Ismael, Careaq churin Johanán, Netofamanta Tanhumetpa churin Seraías, Maaca runaq churin Jaazaniaspiwan, sapanka soldadontinkama.

²⁴Hinan Gedaliasqa paykunaman juraspa nirqan: — Ama Babilonia oficialkunata manchakuychischu, tiyallankichismi kay suyupiqa, Babilonia reyta serviychis, allillanmi kankichis, nispa.

²⁵Qanchiskaq killapitaq ichaqa Judá reypa ayllunmanta kaq Elisamaq churin Netaniaspa churin Ismaelqa chunka qharikunapiwan Mizpa llaqtata chayarqan, hinaspa Gedaliasta wañurqachirqanku, hinallataq paywan kashaq Judá runakunatapas Babilonia runakunatapas.

²⁶Chaymi llapan runakuna, huch'uypas hatunpas, ejército oficialkunapiwan Egipto suyuman ripurqanku, Babilonia runakunata manchakuspanku.

²⁷Evil-merodacmi Babiloniapi kamachikuyta qallarishasqan watapi Judá rey Joaquinta carcelmanta horqorqan. Chaymi karqan Judá rey Joaquinpa preso kasqan kinsa chunka qanchisniyoq wataq chunka iskayniyoq killan iskay chunka qanchisniyoq p'unchaypi.

²⁸Evil-merodacqa sumaqtan Joaquinta rimaykurqan, hinallataq Babiloniapi paywan kashaq reykunamantapas aswan allinta qhawarirqan.

²⁹Hinan Joaquinqa preso kasqan p'achanta ch'utikurqan, reypa wasinpitaq mikhurqan wañukapunan p'unchaykama.

³⁰Sapa p'unchaymi Babilonia reyqa Joaquinman kawsananpaq mikhunata qorqan wañukapunan p'unchaykama.