Read Diospa Simin Qelqa 2 REYES 5 Bible Online

2 REYES 5 - Diospa Simin Qelqa bible

2 REYES 5

¹Naamanqa Siria suyu reypa ejerciton umallin karqan. Paywanmi Señor Diosqa Siria suyuta qespichirqan, chaymi reyqa payta ancha allinta hap'irqan, munakurqantaq. Naamanqa atiyniyoq qharin karqan, ichaqa lepra onqoyniyoqmi karqan.

²Huk kutinmi Siria runakunaqa Israel suyuman llat'anaq phawaykuspa huk sipaschata hap'ispa aparqanku, hinan qhepakurqan Naamanpa warminpa muchachan.

³Chay sipaschan patronanta nirqan: — Samariapi kashaq profetaman patronniy rinman chayqa, lepra onqoyninmanta qhaliyapunmanmi, nispa.

⁴Hinan Naamanqa reyninman rispa sipaspa nisqanta willarqan.

⁵Chaymi Siria suyu reyqa nirqan: — Allinmi. Phaway riy, ñoqaña Israel reyman cartata apachisqayki, nispa. Hinan Naamanqa rispa aparikurqan kinsa chunka waranqa qolqeta, soqta waranqa qorimanta qolqeta, chunka sayay p'achakunatawan.

⁶Apallarqantaq cartatapas Israel reypaq, chay cartapin nirqan: — Kay qelqatan apachimuyki ejercitoypa umallin Naamanta lepra onqoyninmanta qhaliyachinaykipaq, nispa.

⁷Israel reytaq chay cartata leespa mancharikuymanta p'achanta llik'ikurqan, nirqantaq: — ¿Ñoqari Dioschu kani? ¿Ñoqari atinichu runata kawsachiyta kawsayninta qechuytapas? ¿Imanaqtinmi chay runaqa onqosqa runata qhaliyachinaypaq kachamuwan? ¡Reparaychis allinta, awqallikuytan maskhashan! nispa.

⁸Profeta Eliseotaq uyarirqan Israel rey chay carta hawa p'achanta llik'ikusqanta, chaymi willaqta kacharqan: — ¿Imanaqtintaq p'achaykita llik'ikunki? Kachamuway chay runata, hinaspa Israelpi profeta kasqanta yachanqa, nispa nimunanpaq.

⁹Hinan Naamanqa Eliseoman rirqan carretantin caballokunantin ima, chayaspataq wasin punkupi sayaykurqan.

¹⁰Eliseotaq kamachinwan nichirqan: — Phaway Jordán mayuta, hinaspa chaypi qanchis kutita bañakamuy, chaymi lepra onqoyniykimanta qhaliyapunki, nispa.

¹¹Naamantaq ichaqa sinchi phiñasqa kutipuspa nirqan: — Ñoqaqa yuyarqani lloqsimuspa chaskiwanantan, hinaspa sayaykuspa Diosnin Señor Diosmanta mañakunanta, chaymantataq makinwan lepra onqoyniy cheqasta llamiykuwananta, ahinapi onqoyniymanta qhaliyapunayta.

¹²Chaypaqqa kakushanmá Damasco llaqta Abana mayupas Farfar mayupas, chaykunan aswan allin Israelpi llapan mayukunamantaqa. Chay mayukunapichá bañakushayman onqoyniymanta qhaliyanaypaqqa, nispa. Hinaspan payqa sinchi phiñasqa kutiripurqan.

¹³Kamachinkunan ichaqa payman qayllaykuspa nirqanku: — Wiraqochayku, ima sasa ruwanataña profeta kamachisunkiman chaypas, ¿manachu kasukuwaq? Chay hinaqa, “bañakamuy qhaliyasqa kanaykipaq”, nishaqtinqa, ¿imaynataq manaqa bañakamuwaqchu? nispa.

¹⁴Hinan Naamanqa Jordán mayuta rirqan, chaypitaq qanchis kutita unuman chinkaykurqan, profetaq kamachisqanman hina, chaymi aychanqa wawaq aychanman hina tukurqan, qhaliyasqataq kapurqan.

¹⁵Chaymantataq llapan paywan riqkunapiwan Eliseoman kutirqanku. Chayaspataq Naamanqa nirqan: — ¡Kunanqa yachanin kay pachantinpi Israelpa Diosnin payllapuni Dios kasqanta! Chay hinaqa, valekuykin sumaq sonqo apamusqayta chaskiykuwanaykita, nispa.

¹⁶Eliseotaq ichaqa kutichirqan: — Señor Diospa kamachinmi kani, paypa sutinpin jurani, manan chaskiykimanchu, nispa. Anchataña Naamán rimapayaqtinpas, manapunin Eliseoqa chaskirqanchu.

¹⁷Chaymi Naamanqa nirqan: — Manañataq munankichu chayqa, iskay mulaq apanan chhika hallp'ata kay Israelmanta apakusaq, manañan ñoqaqa ofrendatapas ruphachina sacrificiotapas wak dioskunaman haywasaqñachu, aswanpas Señor Diosllamanñan.

¹⁸Wiraqocha reyníy, Rimón diosninpa yupaychanan wasita yupaychaq riqtinmi riysisaq, hinaspa makiyman tawnaykukuwaqtin chay wasipi qonqoriykukusaq, chayta pampachaykuwanantan Señor Diosta valekuni, nispa.

¹⁹Eliseotaq kutichirqan: — Tak-kaypi ripuy, nispa. Hinan Naamanqa chaymanta ripurqan. Kuskan leguata hina rishaqtintaq,

²⁰profeta Eliseoq kamachin Gieziqa yuyaykurqan: Wiraqochayqa chay Siria runa Naamanta kacharparipun, manataq apamusqan sumaq sonqota chhikallantapas chaskinchu. Señor Diospa sutinpin jurani, usqhaylla qhepanta phawarisaq icha imallatapas qoykamuwanman, nispa.

²¹Chaymi Gieziqa Naamanpa qhepanta phawarqan, Naamantaq qhepanta phawamushaqta rikuspa, carretanmanta uraykurqan chaskinanpaq, hinaspa Giezita tapuykurqan: — ¿Iman karqon? nispa.

²²Giezitaq kutichirqan: — Manan imapas kanchu. Wiraqochallaymi qanman willaqta kachamuwan, Efraín orqo-orqopi kashaq profeta t'aqamantan chaylla iskay waynakuna chayarqamun, chaymi payqa valekusunki kinsa waranqa qolqeta iskay sayay p'achatawan chay waynakunapaq qonaykita, nispa.

²³Naamantaq kutichirqan: — Amayá chayllataqa, aswanpas soqta waranqa qolqeta aparikuy, nispa. Anchatapuni Naamanqa k'askachirqan apananpaq, chaymi iskay costalman qolqetawan iskay sayay p'achatawan winarqan, hinaspa iskay kamachinkunaman llapanta qorqan Gieziq ñawpaqenta apanankupaq.

²⁴Orqoman chayaqtinkutaq Gieziqa kamachikunamanta qolqeta chaskispa wasinman waqaycharqan, paykunatataq kacharparipurqan.

²⁵Chay qhepatataq Gieziqa wiraqochan Eliseoman rispa qayllaykurqan, hinan Eliseoqa tapuykurqan: — Giezi, ¿maymantataq hamushanki? nispa. Paytaq kutichirqan: — Manan ñoqaqa maytapas rinichu, nispa.

²⁶Eliseotaq ichaqa nirqan: — Huk runa chaskinasuykipaq carretanmanta uraykushaqtinqa, yuyayniypin rikusharqayki. Manan kunanchu qolqetapas p'achatapas chaskina tiempoqa, manallataq huertata, uvas chakrata, ovejakunata, torokunata, qhari kamachita, warmi kamachita rantina tiempopaschu.

²⁷Chayraykun Naamanpa lepra onqoynin wiñaypaq hap'isunki qantapas llapan mirayniykitapas, nispa. Chaymi Gieziqa Eliseomanta t'aqarikapurqan, hinaspa lepra onqoyniyoq kaspa rit'i hina yuraqllaña kapurqan.