Read Diospa Simin Qelqa 2 REYES 6 Bible Online

2 REYES 6 - Diospa Simin Qelqa bible

2 REYES 6

¹Huk p'unchaymi profeta t'aqa qharikuna Eliseota nirqanku: — Kaypi qanwan huñukunanchis cheqasqa huch'uymi ñoqanchispaqqa.

²Simiykimanta risaqku Jordán mayuta, chaypi sapankayku huk kurkuta hap'ispa, wasita ruwakusaqku tiyanaykupaq, nispa. Eliseotaq kutichirqan: — Riychis, nispa.

³Hukninkutaq ichaqa Eliseota nirqan: — Ama hinachu kay, riysiwayku, nispa. Paytaq: — Allinmi, riysisqaykichisyá, nirqan.

⁴Hinan Eliseoqa paykunawan Jordán mayukama rirqan, chaypitaq sach'akunata kumpayta qallarirqanku.

⁵Hukkaqnin profeta sach'ata kumpashaqtinmi, hachanqa unuman atipaykurqan, hinan qaparirqan: — ¡Ay! ¡Imanaykusaqtaq, wiraqocháy! ¡Mañakusqallan karqan chay hachaqa! nispa.

⁶Diospa profetantaq tapuykurqan: — ¿May cheqasmanmi urmaykurqan? nispa. Chaymi atipachikuq runaqa urmaykusqan cheqasta rikuchirqan. Hinan Eliseoqa huk k'aspita wit'uspa chay cheqasman wikch'uykurqan, chaymi hachaqa tuytumurqan.

⁷Eliseotaq payta kamachirqan: — Horqoy, nispa. Chay runataq makinwan hachata horqomurqan.

⁸Siria reymi Israel runakunawan awqa-tinkuypi maqanakunanpaq yuyaykurqanña. Oficialninkunawan rimanakuspataq nirqan: — Chay cheqaspin ejercitoyta churasaq, nispa.

⁹Eliseotaq ichaqa Israel reyman willachirqan: Aman chay cheqasman rinkichu, Siria runakunan chayman uraykunqaku, nispa.

¹⁰Chaymi Israel reyqa profetaq willasqan cheqaskunata tapupakuqta kacharqan. Askha kutitan Eliseoqa reyman willachirqan makilla kananpaq, chay hinapin reyqa chay cheqaskunapi cuidakurqan.

¹¹Siria reytaq chay hawa phiñasqa kasharqan, chaymi oficialninkunata waqyachispa nirqan: — ¿Mayqenniykichismi Israel reyman sayakunkichis? nispa.

¹²Hinan hukninku nirqan: — Reyníy, manan pipas sayakunchu, aswanpas Israelpi kashaq profeta Eliseon Israel reymanqa willan puñunayki wasipi rimasqaykitawanpas, nispa.

¹³Siria reytaq kamachirqan: — Maypichus kasqanta tapupakamuychis, wakin soldadoykunata kachaspa hap'ichimunaypaq, nispa. Hinan: — Dotán llaqtapin kashan, nispa willaqtinku,

¹⁴reyqa kacharqan askha soldadokunata caballokunantinta, carretakunantinta ima. Paykunan Dotanman tuta chayarqanku, hinaspa llaqtata muyuykurqanku.

¹⁵Qhepantin paqartaq Eliseoq kamachinqa hatarispa lloqsirqan, hinan rikurqan carretakunantin caballokunantin soldadokuna llaqtata muyuykushaqta. Chaymi Eliseota tapurqan: — ¡Achacháw! ¿Imanaykusuntaq kunanqa, wiraqocháy? nispa.

¹⁶Eliseotaq kutichirqan: — Ama manchakuychu, paykunamantaqa aswan askhan ñoqanchiswan kashaqkunaqa, nispa.

¹⁷Señor Diosmantataq mañakurqan: Señor Diosníy, qhawarichiy rikunanpaq, nispa. Hinan Señor Diosqa Eliseoq kamachinta qhawarichirqan, paytaq qhawarispa rikurqan Eliseoq muyuriqnin orqopi nina caballokuna, nina carretakuna hunt'a kashaqta.

¹⁸Siria soldadokuna paykunaman phawaykushaqtinñan Eliseoqa Señor Diosta valekurqan: Señor Diosníy, kay runakunata ñawsayachiy, nispa. Señor Diostaq Eliseoq mañakusqanman hina paykunata ñawsayachirqan.

¹⁹Hinaqtinmi Eliseoqa nirqan: — Manan kaychu ñanqa, manallataq maskhasqaykichis llaqtapas kaychu. Haku ñoqa pusasqaykichis pitachus maskhashankichis chay runaman, nispa. Hinaspan payqa chay soldadokunata Samaria llaqtaman pusarqan.

²⁰Llaqtaman chayaspataq Eliseoqa mañakurqan: Señor Diosníy, kunanqa ñawinkuta kichariy, nispa. Hinan paykunaqa qhawarispa rikurqanku Samaria llaqta ukhupi kashasqankuta.

²¹Israel reytaq paykunata rikurqospa Eliseota tapuykurqan: — Taytáy, ¿wañuchisaqkuchu? Taytáy, ¿wañuchisaqkuchu? ¿Ima ninkin? nispa.

²²Eliseotaq kutichirqan: — Ama, ama wañuchiychu. Manamá pitapas espadaykiwan wach'inaykiwan presota hap'ispaykiqa wañuchinkichu. Qoychis mikhunata ukyanata, hinaspa wiraqochanku reyman kachapuy, nispa.

²³Hinan hatun mikhuyta wakichirqanku, chaymi mikhuykurqanku ukyaykurqanku. Chay qhepatataq reyqa kacharparipurqan, paykunataq wiraqochanku reyman kutipurqanku. Chaymantapachan Siria runakunaqa manaña Israel suyuta llat'anaq phawaykurqankuchu.

²⁴Chaykuna qhepatataq Siria rey Ben-Hadadqa llapan soldadonkunata huñuykuspa Samariata rirqan, hinaspan muyuykurqan phawaykunanpaq.

²⁵Muyuykusqa kasqanraykun chay llaqtapi sinchipuni yarqay karqan, chaymi huk asnoq uman valerqan pusaq chunka qolqe, libraq kuskannin Urpi Wanu nisqa saphipas phisqa qolqe.

²⁶Huk p'unchaymi Israel reyqa llaqta muyuriq perqa patanta purisharqan, hinan huk warmi waqyakurqan: — ¡Reyníy, yanapaykuway! nispa.

²⁷Reytaq kutichirqan: — Manataq Señor Diospas yanapasunkichu chayqa, ¿imaynatataq ñoqari yanapaykiman? Manan trigoypas vinoypas kanchu qanman qonaypaq, nispa.

²⁸Tapuykurqantaq: — ¿Imataq sasachakuyniykiri? nispa. Hinan warmiqa kutichirqan: — Kay warmin niwarqan: Wawaykita apamuy kunan p'unchay mikhunanchispaq, ñoqaq wawaytataq paqarin mikhusun, nispa.

²⁹Hinaqtinmi wawayta wayk'uspa mikhurqayku, qhepantin p'unchaytaq kay warmita nirqani: Wawaykita apamuy mikhunanchispaq, nispa, paytaq ichaqa wawanta pakarqapun, nispa.

³⁰Warmiq nisqanta uyarispataq reyqa p'achanta llik'ikurqan. Perqa patapi purishaqtintaq runakunaqa rikurqanku qhasqa p'achawan ukhunman churaykusqata.

³¹Hinan reyqa nirqan: — Sinchitapuni Diosqa ñak'arichiwachun, Safatpa churin Eliseota manachus kunanpacha umanta qhorusaq chayqa, nispa.

³²Eliseoqa wasinpin tiyasharqan kurak runakunapiwan. Chaykamataq reyqa huk runata Eliseoman kacharqan. Eliseotaq ichaqa manaraq reypa kachasqan chayashaqtin, kurak runakunata nirqan: — Qhawariychis chay runa wañuchiq reyta, huk runatan umayta qhoruwananpaq kachamushan. Chay hinaqa, kachamusqan runa chayamuqtinqa punkuta wisq'ankichispacha, amataq haykuchimunkichischu. Wiraqochan reyqa qhepantapachan hamushan, nispa.

³³Chayta paykunawan rimashallaqtinraqmi reyqa Eliseoq qayllanman chayaspa nirqan: — Kay mana allinqa Señor Diosmantan hamun. ¿Imapaqñataq paypi suyakuyman? nispa.