Read Diospa Simin Qelqa 1 CRÓNICAS 10 Bible Online

1 CRÓNICAS 10 - Diospa Simin Qelqa bible

1 CRÓNICAS 10

¹Filistea soldadokunan maqanakurqanku Israel soldadokunawan. Hinan Israel soldadokunaqa atipachikuspa ayqekapurqanku, askhataq Gilboa orqopi wañurqanku.

²Filistea soldadokunataq Saulta churinkunantinta qatiparqanku, hinaspan Saulpa churin Jonatanta, Abinadabta, Malquishuatawan wañuchirqanku.

³Sinchita maqanakuspankutaq Saulta chawpinarqorqanku, hinan wach'iqkunaqa payman tariparqospa k'irirqanku.

⁴Saultaq arma apaysiqninta nirqan: — Espadaykita horqokuspayki sat'irqoway, chay mana iñiqkuna manaraq hamushaqtin, paqtan aypamuwaspanku ñoqawan burlakunkuman, nispa. Arma apaysiqnintaq ichaqa mana munarqanchu, sinchita manchakusqanrayku. Chaymi Saulqa espadanta pampaman sayarqachispa chay pataman wikch'uykukurqan.

⁵Arma apaysiqnintaq wañusqata Saulta rikuspa, paypas Saúl hina ruwaspa wañupullarqantaq.

⁶Ahinapin Saulqa kinsantin churinkunapiwan wañupurqan, llapan ayllunkunapas wañupullarqantaq.

⁷Jezreel qheswa wayq'opi tiyaq llapan Israel runakunataq Israel soldadokunaq ayqekusqanta rikuspa, Saulpas kinsantin churinkunapiwan wañupusqanta yachaspa, wasinkuta wikch'uspa ayqekapurqanku. Hinan Filistea runakunaqa chayman rispanku hunt'aykurqanku.

⁸Qhepantin p'unchaymi Filistea soldadokunaqa ayakunaq p'achan ch'utiq rirqanku, hinaspanmi Gilboa orqopi Saulta churinkunatawan wañusqa wikch'urayashaqta tarirqanku.

⁹Chaymi Saulpa p'achanta ch'utirqanku, hinaspa umantawan qhoruspanku aparqanku. Willachirqankutaq allin willakuyta Filistea suyuntinpi, llapan runakunaman idolokunamanpas.

¹⁰Chaymantataq armankunata diosninkuq wasinman churarqanku, Dagón dios yupaychana wasipitaq umanta warkurqanku.

¹¹Galaad Jabespi tiyaq llapan runakunataq Filistea runakunaq Saulta chay hina ruwasqanta uyarispanku,

¹²llapan allin qharikuna rirqanku Saulpa ayanta churinkunaq ayantawan hoqariq, Jabes llaqtamantaq aparqanku. Hinaspa chay llaqta encina sach'a chakipi ayakunata p'amparqanku, llakikuymantataq qanchis p'unchayta ayunarqanku.

¹³Saulqa wañurqan Señor Diospaq mana hunt'aq kasqanraykun. Payqa manan Señor Diospa kamachisqan simikunata kasukurqanchu, aswanpas wañusqakunaq almanta rimachiq warmitan tapukurqan

¹⁴Señor Diosta tapukunanmantaqa. Chayraykun Señor Diosqa wañuchirqan, kamachisqan suyutapas Isaipa churin Davidman qopurqan.