Read Diospa Simin Qelqa 1 CRÓNICAS 12 Bible Online

1 CRÓNICAS 12 - Diospa Simin Qelqa bible

1 CRÓNICAS 12

¹Cispa churin rey Saulpa wikch'usqan Siclagpi David qhepakushaqtinmi, chay allin qhari soldadokuna payman rirqanku, paykunaqa maqanakuypi yanapaqnin

²allin armasqan karqanku, chaymi iskaynin makinkuwan rumita warak'aytapas wach'inawan wach'iytapas yacharqanku. Benjamín ayllumanta Saulpa wawqenkunan karqan:

³Gabaamanta Semaaq churinkuna, umallinku Ahiezerpiwan Joaspiwan, Azmavetpa churinkuna Jezielpiwan Peletpiwan, Beraca, Anatotmanta Jehú,

⁴Gabaonmanta Ismaías (payqa kinsa chunka qharikunaq umallinmi karqan, paykunamanta huknin allin qhari), Jeremías, Jahaziel, Johanán, Gederamanta Jozabad,

⁵Elusai, Jerimot, Bealías, Semarías, Harufmanta Sefatías,

⁶Coré ayllumanta Elcana, Isaías, Azareel Joezer, Jasobeampiwan.

⁷Gedormanta Jerohampa churinkuna, Joelapiwan Zebadiaspiwan.

⁸Hinallataq Gad ayllu wakin soldadokunaqa ch'inneq pukarapi David kashaqtin payman huñukurqanku, paykunaqa allin maqanakuq qharikunan karqanku, allintataq wakiyarqanku escudowan lanzawan maqanakuytapas. Uyankupas leonpa uyan hinan karqan, taruka hina usqhay phawaqtaq karqanku.

⁹Paykunan karqan ñawpaqkaq Ezer, iskaykaqtaq Obadías, kinsakaqtaq Eliab,

¹⁰tawakaqtaq Mismana, phisqakaqtaq Jeremías,

¹¹soqtakaqtaq Atai, qanchiskaqtaq Eliel,

¹²pusaqkaqtaq Johanán, isqonkaqtaq Elzabad,

¹³chunkakaqtaq Jeremías, chunka hukniyoqkaqtaq Macbanai.

¹⁴Chay Gad ayllu soldadokunaqa umallin karqanku. Qhepakaqqa pachak soldado hinan karqan, ñawpaqkaqtaq waranqa soldado hina karqan.

¹⁵Paykunan cosecha qallariy tiempopi Jordán mayuta patantinraq llimp'ashaqtin chimparqanku, hinaspan mayuq chimpapuran wayq'okunapi tiyaq llapan runakunata qatirirqanku.

¹⁶Hinallataq Benjamín ayllu wakin runakuna Judá ayllu wakin runakunapiwan Davidman rirqanku pukarapi kashaqtin.

¹⁷Hinan Davidqa paykunawan tupaq lloqsimuspa nirqan: — Qankuna hamunkichis sumaqwan ñoqata yanapawanaykichispaq chayqa, allinmi, qankunawanmi hukllachasqa kasaq, ichaqa mana pi contra huchallikushaqtiy awqaykunaman hap'ichiwanaykichispaq hamunkichis chayqa, ñawpa taytanchispa Diosninmi rikusunkichis, hinaspa muchuchisunkichis, nispa.

¹⁸Hinan kinsa chunkaq umallin Amasaita Diospa Espiritun hunt'aykurqan, chaymi payqa nirqan: — ¡David, kamachiykin kayku! ¡Isaipa churin, qanwanmi kashayku! ¡Allillanpuni atipaqllapuni kay! ¡Yanapaqniykikunapas ahinallataq kachun! ¡Diosmi qantaqa yanapasunki! nispa. Chaymi Davidqa paykunata chaskirqan, hinaspa llat'anaq t'aqa soldadokunaq umallinta churarqan.

¹⁹Davidqa Filistea soldadokunawan kuska rey Saúl contra maqanakuq rishaqtinmi, Manasés ayllumanta wakin qharikunaqa paywan huñukurqanku. Filistea umallikunataq rimanakuspa ninakurqanku: Paqtan wiraqochan Saulman chimparqapunman, hinaspa ñoqanchista wañuchiwasunman, nispa. Chaymi Davidtaqa llaqtanta kachapurqanku, hinan Davidqa Filistea soldadokunata mana yanaparqanchu.

²⁰Davidqa Siclagman ripushaqtinmi Manasés ayllumanta kaykuna paywan huñukurqan: Adnas, Jozabad, Jediael, Micael, Jozabad, Eliú, Ziletaipiwan. Paykunan karqan Manasés ayllupi waranqa runakunaq umallinkuna.

²¹Paykunaqa llapankun allin qhari karqanku, chayraykun Davidta yanaparqanku llat'anaq t'aqa runakuna contra, chaymi soldadokunaq umallin kapurqanku.

²²Sapa p'unchaymi David yanapaq runakunaqa yapakurqan, ancha hatun kallpasapa ejército kanankama.

²³Maqanakuypaq allin wakichisqa qharikunan Hebronta Davidman rirqanku, Saulpa kamachisqan suyuta payman qonankupaq, Señor Diospa kamachikusqan simiman hina. Kaykunan karqan:

²⁴Judá ayllumanta: Soqta waranqa pusaq pachak qharikuna, maqanakuypaq allin wakichisqa escudoyoq lanzayoq ima.

²⁵Simeón ayllumanta: Qanchis waranqa pachakniyoq maqanakuypaq allin qharikuna.

²⁶Leví ayllumanta: Tawa waranqa soqta pachak qharikuna,

²⁷Aaronpa ayllun umalli Joiada, kinsa waranqa qanchis pachak qharikunapiwan,

²⁸allin maqanakuq qhari Sadoc sutiyoq waynapas, ayllunmanta iskay chunka iskayniyoq umalli runakunapiwan.

²⁹Benjamín ayllumanta: Kinsa waranqa Saulpa wawqenkuna. Paykunamantaqa askharaqmi chay p'unchaykama Saulpa ayllunpi hunt'aqllapuni kasharqanku.

³⁰Efraín ayllumanta: Iskay chunka waranqa pusaq pachak allin qharikuna, ayllunkupi mentasqa qharikuna.

³¹Manasés kuskan ayllumanta: Chunka pusaqniyoq waranqa qharikuna. Paykunan Davidta reyta churanankupaq sutinkumantakama kachasqa karqanku.

³²Isacar ayllumanta: Iskay pachak umallikuna, kamachisqan wawqenkunapiwan. Paykunan allinta yacharqanku tiempo tanteayta, yachallarqankutaq imatachus Israel ruwanantapas.

³³Zabulón ayllumanta: Phisqa chunka waranqa allin maqanakuq qharikuna, tukuy t'aqa armakunawan maqanakuypaq allin wakichisqa, tukuy sonqo maqanakunankupaq allin yuyaykusqa.

³⁴Neftalí ayllumanta: Waranqa umalli runakuna, kinsa chunka qanchisniyoq waranqa escudoyoq lanzayoq qharikunapiwan.

³⁵Dan ayllumanta: Iskay chunka pusaqniyoq waranqa soqta pachak maqanakuypaq wakichisqa qharikuna.

³⁶Aser ayllumanta: Tawa chunka waranqa allin maqanakuq qharikuna, maqanakuypaq allin wakichisqa.

³⁷Jordán mayu chimpamantataq Rubén ayllumanta, Gad ayllumanta, Manasés kuskan ayllumantawan pachak iskay chunka waranqa tukuy t'aqa armayoq qharikuna.

³⁸Llapan chay allin maqanakuq qharikunan maqanakuypaq hina wachuchasqa Hebronta rirqanku tukuy sonqo Davidta Israel suyupi reyta churanankupaq. Hinallataq wakin Israel runakunapas huk-nisqalla llapanku karqanku Davidta Israel reyta churanankupaq.

³⁹Hinan Davidwan Hebronpi kinsa p'unchay qhepakurqanku mikhuspanku ukyaspanku, ayllu-masinkuna paykunapaq mikhunata wakichisqanrayku.

⁴⁰Qorpankunapi tiyaqkunapas, karupi tiyaq Isacar ayllu, Zabulón ayllu, Neftalí ayllu runakunapas mikhunata apamullarqankutaq, asnokunapi, camellokunapi, mulakunapi, torokunapi cargaspa. Karqantaq askha hak'u, higos k'umpa, pasas k'umpa, vino, aceite, torokuna, ovejakunapas, Israelpi kusikuy kasqanrayku.