Read Diospa Simin Qelqa 1 CRÓNICAS 13 Bible Online

1 CRÓNICAS 13 - Diospa Simin Qelqa bible

1 CRÓNICAS 13

¹Chay qhepatataq Davidqa waranqa soldadoq umallinkunawan, pachak soldadoq umallinkunapiwan rimarqan.

²Hinaspa llapan huñuykusqa Israel runakunata nirqan: — Allinchus qankunaman rikch'akusunkichis, Diosninchis Señor Diospa munaynintaqchus kanmanpas chayqa, Israel suyuntinpi wakin wawqenchiskunaman willaqkunata kachasun, hinallataq llaqtankupi tiyaq sacerdotekunamanpas, Leví runakunamanpas. Ahinapin llapanku ñoqanchiswan huñukunqaku.

³Chaymantataq Diosninchispa arcanta kayman apakampusun, rey Saulpa tiemponmantañan arcamanta mana yuyarinchischu, nispa.

⁴Hinan llapa huñuykusqa runakuna: — Arí, ahinata ruwasun, nirqanku, paykunaman allin rikch'akusqanrayku.

⁵Chaymi Davidqa Egipto suyupi kaq Sihor mayumanta Hamat Q'asakama tiyaq llapan Israel runakunata huñuykurqan, Quiriat-jearimmanta Diospa arcanta apanankupaq.

⁶Hinaspan Davidqa rirqan llapan Israel runakunapiwan Judapi kashaq Quiriat-jearim nisqa Baala llaqtata, Señor Diospa arcanta chay llaqtamanta apanankupaq. Chay arcaqa Señor Diospa sutinwan sutichasqan karqan, paymi querubinkuna chawpipi tiyashan.

⁷Hinan Abinadabpa wasinmanta Diospa arcanta aparqanku huk mosoq carretapi. Uzawan Ahiowantaq carretata puriysirqanku.

⁸Davidtaq llapan Israel runakunapiwan Diospa ñawpaqenpi tukuy kallpawan takispa tusurqanku, hinataq tocarqanku arpata, tawtinkuta, tinyata, platillota, cornetatawan.

⁹Quidonpa eranman chayaqtinkutaq, torokuna carretata urmachiyta munaqtin, Uzaqa arcata makinwan llamiykuspa sayaykachirqan.

¹⁰Hinan Señor Diosqa sinchita Uzapaq phiñakurqan arcata makinwan hap'iykusqanmanta, chaymi Uzata muchuchirqan, kaq ratotaq Diospa arcan qayllapi wañusqa wikch'ukurqan.

¹¹Davidtaq phiñakurqan Uzata Señor Diospa wañuchisqanmanta, chaymi haqay p'unchaymanta chay cheqasta “Perez-Uza” nispa suticharqanku.

¹²Chay p'unchaymi Davidqa Diosta manchakuspa nirqan: Chhaynaqa, ¿imaynatan Diospa arcanta wasiyman apasaq? nispa.

¹³Chayraykun payqa Diospa arcanta Jerusalenman mana aparqanchu, aswanpas Gat llaqtamanta Obed-edompa wasinman apachirqan.

¹⁴Chaypin Diospa arcanqa kinsa killa karqan, Señor Diostaq Obed-edomta familiantapas tukuy kaqninkunatapas samincharqan.