Read Diospa Simin Qelqa 1 CRÓNICAS 14 Bible Online

1 CRÓNICAS 14 - Diospa Simin Qelqa bible

1 CRÓNICAS 14

¹Tiro llaqta rey Hirammi Davidman willaqkunata kacharqan, hinallataq rumi thupaqkunata, k'ullu llaqllaqkunatapas. Paykunan cedro kurkukunata aparqanku Davidpaq wasita sayarichinankupaq.

²Hinan Davidqa yacharqan Israel suyupi kamachikuyninta Señor Diospa takyachisqanta, llaqtanta munakuspa suyuntapas hatunyachisqantawan.

³Jerusalenpitaq Davidqa wak warmikunawan casarakurqan, hinaspan churikunata ususikunata astawan churiyarqan.

⁴Sutinkunan kaykuna karqan: Samúa, Sobab, Natán, Salomón,

⁵Ibhar, Elishúa, Elpelet,

⁶Noga, Nefeg, Jafía,

⁷Elisama, Beeliada, Elifeletpiwan.

⁸Filistea soldadokunataq Israel suyupi Davidta reypaq aceitewan hawisqankuta yachaspa llapanku wicharirqanku Davidta hap'inankupaq. Chayta yacharqospataq Davidqa paykuna contra maqanakuq lloqsirqan.

⁹Filistea soldadokunataq rispanku, Refaim wayq'oman ch'eqeykurqanku.

¹⁰Chaymi Davidqa Señor Diosta tapurqan: — ¿Filistea soldadokunawan maqanakuq riymanchu? ¿Atipachiwankimanchu paykunata? nispa. Hinan Señor Diosqa nirqan: — Arí, riy, ñoqan atipachisqayki, nispa.

¹¹Chaymi Davidqa Baal-perazimman rirqan, hinaspa chaypi Filistea soldadokunata atipaspa nirqan: Señor Diosmi awqaykunata ñawpaqeypi mayu llimp'ay hinaraq qhochurparin, nispa. Chaymi chay cheqasta Baal-perazim nispa suticharqanku.

¹²Filistea soldadokunaqa idolonkutapas chaymanmi wikch'upurqanku, hinan Davidqa soldadonkunata kamachirqan ruphachinankupaq.

¹³Wakmanta rispankutaq Filistea soldadokunaqa Refaim wayq'oman ch'eqeykullarqankutaq.

¹⁴Chaymi Davidqa Señor Diosta tapullarqantaq, hinan kutichirqan: — Ama paykunawan maqanakuq cheqanta riychu, aswanpas qhepankuta muyuykarqamuy, hinaspa bálsamo sach'a-sach'api tinkunki.

¹⁵Bálsamo sach'akuna patapi chhaqchaqeqta uyarispaykitaq, usqhaylla maqanakuq phawarinki, ñoqan chay rato ñawpaqeykita lloqsisaq Filistea soldadokunata atipanaypaq, nispa.

¹⁶Davidtaq Diospa kamachisqanta hina ruwarqan, hinan Filistea soldadokunata Gabaonmanta Gezerkama qatispa wañuchirqanku.

¹⁷Tukuy suyukunapin Davidpa mentasqa kasqanta uyarirqanku, Señor Diosmi Davidwan manchachirqan llapan suyukunata.