Read Diospa Simin Qelqa 1 CRÓNICAS 15 Bible Online

1 CRÓNICAS 15 - Diospa Simin Qelqa bible

1 CRÓNICAS 15

¹Llaqtanpin Davidqa wasikunata paypaq ruwakurqan, Diospa arcanpaqtaq huk cheqasta wakichispa chaypi karpata sayarichirqan.

²Hinaspan nirqan: — Diospa arcantaqa Leví runakunallan apanan, Señor Diosmi paykunataqa akllakusqa arcanta apapunanpaqpas tukuy tiempo payta servinanpaqpas, nispa.

³Chaymi Davidqa llapan Israel runakunata Jerusalenpi huñuykurqan, Señor Diospa arcanta wakichisqan karpaman apanankupaq.

⁴Huñullarqantaq Aaronpa mirayninta, Leví runakunaq miraynintapas.

⁵Chaymi Cohat ayllumanta hamurqan umalli Uriel pachak iskay chunka wawqenkunapiwan.

⁶Merari ayllumanta hamurqan umalli Asaías iskay pachak iskay chunka wawqenkunapiwan.

⁷Gersón ayllumanta hamurqan umalli Joel pachak kinsa chunka wawqenkunapiwan.

⁸Elizafán ayllumanta hamurqan umalli Semaías iskay pachak wawqenkunapiwan.

⁹Hebrón ayllumanta hamurqan umalli Eliel pusaq chunka wawqenkunapiwan.

¹⁰Uziel ayllumanta hamurqan umalli Aminadab pachak chunka iskayniyoq wawqenkunapiwan.

¹¹Davidqa waqyallarqantaqmi sacerdote Sadocta Abiatartawan. Hinallataq Leví runakuna Urielta, Asaiasta, Joelta, Semaiasta, Elielta, Aminadabtawan.

¹²Hinaspan paykunata nirqan: — Qankunan Leví ayllu runakunaq umallinkuna kankichis, ch'uyanchakuychis qankunapas wawqeykichispas, Israelpa Diosnin Señorpa arcanta wakichisqay karpaman apamunaykichispaq.

¹³Ñawpaq kutiqa manan qankunachu aparqankichis, chaymi Diosninchis Señor Diosqa muchuchiwarqanchis. Manataqmi payta tapurqanchischu kamachikusqanman hina imaynatachus ruwananchispaq, nispa.

¹⁴Hinan sacerdotekunapas Leví runakunapas ch'uyanchakurqanku Israelpa Diosnin Señor Diospa arcanta apanankupaq.

¹⁵Chaymantataq Leví runakunaqa Diospa arcanta aparqanku, arcataqa k'aspinmantan rikraykukurqanku, Señor Diospa Moiseswan kamachisqanman hina.

¹⁶Davidtaq Leví runakunaq umallinkunata kamachirqan: — Wawqeykichiskunamanta churaychis takiqkunata kusisqa takinankupaq, churallaychistaq tocaqkunatapas, arpata, tawtinkuta, platillota ima tocanankupaq, nispa.

¹⁷Hinan Leví runakunaqa churarqanku Joelpa churin Hemanta, wawqenkunamanta Berequiaspa churin Asafta, Merari ayllumanta wawqenkunamantawan Cusaiaspa churin Etanta.

¹⁸Paykunaman qatiqkaq wawqenkunatataq churarqan Zacariasta, Jaazielta, Semiramot-ta, Jehielta, Unita, Eliabta, Benaiata, Maasiasta, Matatiasta, Elifelehuta, Micniasta, punku qhawaqkuna Obed-edomta, Jeieltawan.

¹⁹Hinan Hemán, Asaf, Etanpiwan takiqkunaqa broncemanta platillokunata tocarqanku.

²⁰Zacarías, Aziel, Semiramot, Jehiel, Uni, Elial, Maasías, Benaiaspiwanmi ñañuman tupasqa tawtinkukunata tocarqanku.

²¹Matatías Elifelehu, Micnías, Obed-edom, Jeiel, Azaziaspiwantaq rakhuman tupasqa arpakunata tocarqanku.

²²Leví runakunaq umallin Quenaniastataq takiqkuna kamachiqta churarqan, takikunapi hamawt'a kasqanrayku.

²³Berequiaswan Elcanawan Obed-edomwan Jehiaspiwantaq arca karpa punkuta qhawarqanku. Diospa arcanpa ñawpaqenpi corneta tocaq sacerdotekunataq karqan: Sebanías, Josafat, Natanael, Amasai, Zacarías, Benaías, Eliezerpiwan.

²⁵Ahinatan Davidqa Israel kurak runakunapiwan waranqa soldadoq umallinkunapiwan kusisqa rirqanku Obed-edompa wasinmanta Señor Diospa rimanakuynin arcata apanankupaq.

²⁶Diosmi kallpacharqan Leví runakunata paypa rimanakuynin arcata apashaqtinku, chaymi qanchis torillota qanchis anejotawan sacrificiota haywarqanku.

²⁷Davidqa sumaq linomanta p'achayoqmi linomanta sotanayoqmi rirqan, hinallataq arca apaq llapan Leví runakunapas, takiqkunapas, takiqkuna takichiq Quenaniaspas sumaq lino p'achayoq karqanku.

²⁸Llapan Israel runakunan ancha kusisqa qaparispa Señor Diospa rimanakuynin arcata aparqanku, putututa, cornetata, platillota, tawtinkuta, arpatawan tocaspanku.

²⁹Señor Diospa rimanakuynin arcata Davidpa llaqtanman chayachiqtinkutaq, Saulpa ususin Micalqa wasi ventanamanta rey Davidta rikurqorqan tusushaqta saltashaqta, chaymi sonqonpi pisicharqan.