Read Diospa Simin Qelqa 1 CRÓNICAS 16 Bible Online

1 CRÓNICAS 16 - Diospa Simin Qelqa bible

1 CRÓNICAS 16

¹Ahinatan Diospa arcanta apaykurqanku, hinaspa Davidpa wakichisqan karpa ukhuman churaykurqanku. Chaymantataq ruphachina sacrificiota sumaq kawsay sacrificiotawan Diosman haywarqanku.

²Chay sacrificiokunata haywayta tukuspañan, Davidqa Señor Diospa sutinpi llaqtata samincharqan.

³Hinallataq llapan Israel runakunaman warmimanpas qharimanpas sapankaman rakichirqan t'antata, dátil nisqa ruru k'umpata pasas k'umpatawan.

⁴Chaymantataq Davidqa Señor Diospa arcanpa ñawpaqenpi Leví runakunata serviqpaq churarqan, Israelpa Diosnin Señorta yupaychanankupaq, hatunchanankupaq, paymanta mañakunankupaq ima.

⁵Asafmi umalli karqan, payman qatiqtaq Zacarías, yanapaqninkunataq Jeiel, Semiramot, Jehiel, Matatías, Eliab, Benaía, Obed-edom, Jeielpiwan. Paykunan tocarqanku tawtinkukunata arpakunata ima, Asaftaq platillota tocarqan.

⁶Sacerdotekunataq Benaiaspiwan Johazielpiwan Diospa rimanakuynin arcaq ñawpaqenpi tukuy tiempo cornetata tocanankupaq churasqa karqanku.

⁷Chay p'unchaymi Davidqa unancharqan Asafpa wawqenkunapiwan Señor Diosman yupaychaykunata takinankupaq.

⁸¡Señor Diosman graciasta qoychis! ¡Paymanta mañakuychis! Ruwasqankunata llaqtakunaman willaychis.

⁹Señor Diosman takiychis, payman yupaychaykunata takiychis, tukuy musphana ruwasqankunamanta willakuychis.

¹⁰Ch'uya sutinpi kusikuychis, Señor Diosta yupaychaqkunaqa sonqoykichispi kusikuychis.

¹¹Señor Diosmanta mañakuychis kallpachanasuykichispaq, Señor Diosmanqa qayllaykullaychispuni.

¹²Señor Diospa musphana ruwasqankunata yuyariychis, milagronkunata, chaninchayninkunata yuyariychis,

¹³qankuna Diospa kamachin Israelpa mirayninkuna, Señor Diospa akllakusqan Jacobpa churinkuna.

¹⁴Paymi Diosninchis Señor Diosqa, paymi kay pachantin kamachiqqa.

¹⁵Wiñaypaq rimanakuyninta yuyaychis, waranqa miraypaq kamachikusqan simitapas yuyaychis,

¹⁶Abrahamwan rimanakusqanta yuyaychis, Isaacman jurasqanta yuyaychis.

¹⁷Chaytan Señor Diosqa Jacobpaq unancharqan, Israelpaq wiñay rimanakuyta churaspa nirqan:

¹⁸Qanmanmi qosqayki Canaán hallp'ata, chaymi kanqa herenciaykichis, nispa.

¹⁹Paykunaqa pisi runakunallan karqanku, wak llaqtayoq hinan chay hallp'api pisilla karqanku.

²⁰Huk suyumanta huk suyumanmi purirqanku, huk llaqtamanta huk llaqtamanmi rirqanku.

²¹Señor Diosqa manan piqpa sarunchanantapas munarqanchu, paykuna hawan reykunata anyaspa nirqan:

²²Akllakusqaykunataqa aman llamiykunkichischu, profetaykunataqa aman imanankichispaschu, nispa.

²³Llapan kay pacha, Señor Diosman takiychis, qespichiwasqanchista sapa p'unchay willaychis.

²⁴Qhapaq-atiyninta runakunaman willaychis, musphana ruwasqankunatapas llapan llaqtakunaman willaychis.

²⁵Hatunmi Señor Diosqa, yupaychana hinapuni, llapan dioskunamanta aswan manchana.

²⁶Llaqtakunaq llapan diosninqa idolokunan, Señor Diosmi ichaqa hanaq pacha kamaq.

²⁷Paytaqa lliphlli-kaywan manchana-atiywanmi muyuykun, wasintaqa atiywan kusikuywanmi hunt'aykun.

²⁸Llapa suyu ayllukuna, Señor Diosta niychis: ¡Qanmi qhapaqqa atiyniyoqqa kanki!

²⁹¡Sutiykiqa hatunchasqan! nispa. Ñawpaqenman asuykuychis ofrendakuna aparisqa, ch'uya p'achantin Señor Diosman qonqoriykukuychis.

³⁰Kay pacha runakuna, Señor Diospa ñawpaqenpi khatatataychis. Teqsimuyuqa allin takyachisqan, manataqmi kuyurinmanchu.

³¹Hanaq pachapas kusikuchun, kay pachapas q'ochukuchun, suyukunamanpas paykuna willarichun: ¡Señor Diosmi kamachikushan! nispa.

³²¡Lamar-qocha qaparichun, llapan chaypi kaqkunapas! ¡Campokuna kusikuchun, llapan chaypi kaqkunapas!

³³Sach'a-sach'api mallkikunan takinqaku, Señor Diospa ñawpaqenpin kusikuymanta takinqaku, Señor Diosmi hamushan kay pachata kamachinanpaq.

³⁴Señor Diosta yupaychaychis, payqa allinmi, munakuyninqa mana tukukuqmi.

³⁵Waqyakuychis: ¡Qespichiq Diosnillayku, qespichiwayku! Huñuykuwayku, hinaspa suyukunamanta qespichiwayku ch'uya sutiykita hatunchanaykupaq, q'ochukuspayku qanta yupaychanaykupaq, nispaykichis.

³⁶Wiñaymanta wiñaykama saminchasqa kachun Israelpa Diosnin Señorqa, nispa. Hinan llapan runakuna nirqanku: — ¡Amén! ¡Señor Diosqa yupaychasqa kachun! nispanku.

³⁷Davidmi Asafta llank'aq-masinkunatawan saqerqan Señor Diospa rimanakuynin arca qayllapi tukuy tiempo servinankupaq, sapa p'unchay imaynatachus ruwanankuta hina.

³⁸Saqellarqantaq Obed-edomta soqta chunka pusaqniyoq llank'aq-masinkunatawan paykunata yanapanankupaq. Jedutunpa churin Obed-edomqa Hosapiwanmi punku qhawaq karqanku.

³⁹Sacerdote Sadoctataq llank'aqmasin sacerdotekunatawan saqerqan Gabaonpi yupaychana cheqaspi Señor Diospa karpan qayllapi.

⁴⁰Paykunan Señor Diosman ruphachina sacrificiota tukuy tiempo tutamantapas tardepas haywananku karqan ruphachina altar patapi, Señor Diospa Israelta tukuy kamachisqan qelqaman hina.

⁴¹Paykunawanmi karqan Hemanpas Jedutunpas Señor Diosta yupaychanapaq wakin sutinmantakama akllasqakunapas. Paykunaqa Señor Diosta yupaycharqanku wiñay munakuyninmantan.

⁴²Hemanpiwan Jedutunpiwanmi cornetata, platillotawan tocarqanku, yupaychaykunata takinapaq wakin tocanakunatawan. Jedutunpa churinkunaqa punku qhawaqmi karqanku.

⁴³Chay qhepatataq llapa runakuna sapanka wasinkuta ripurqanku, Davidpas ripullarqantaq familianta saminchananpaq.