Read Diospa Simin Qelqa 1 CRÓNICAS 21 Bible Online

1 CRÓNICAS 21 - Diospa Simin Qelqa bible

1 CRÓNICAS 21

¹Satanasmi Israel runakuna contra sayarirqan, chaymi Davidta yuyaykachirqan Israel runakunata yupananpaq.

²Hinan Davidqa Joabta ejército umallinkunatawan kamachirqan: — Phawaychis, Israel runakunata yupamuychis Beersebamanta Dankama, hinaspa willawankichis hayk'achus paykuna kasqankuta yachanaypaq, nispa.

³Joabtaq kutichirqan: — Señor reyníy, pachak kutitaraq llaqtaykita Dios askhayachichun, paykunaqa llapallanmi kamachiykikuna. Reyníy, ¿imanaqtintaq runa yupanata munanki? ¿Imapaqtaq Israel runakunata huchachachiwaq? nispa.

⁴Chaywanpas reyqa mana uyarispan Joabta kamachishallarqan. Hinan Joabqa Israel suyuntinta puririrqan, chaymantataq Jerusalenman kutipurqan.

⁵Hinaspan Davidman willarqan maqanakuy atiq qharikuna hayk'achus kasqanta. Israel suyupitaq karqan waranqaq waranqan pachak waranqa qharikuna, Judá suyupitaq tawa pachak qanchis chunka waranqa qharikuna.

⁶Joabmanqa manan allinchu rikch'akurqan reypa kamachikusqan, chaymi mana yuparqanchu Leví ayllutapas Benjamín ayllutapas.

⁷Chay yupaytaqa manan Diosqa munarqanchu, chaymi Israel runakunata muchuchirqan.

⁸Hinan Davidqa Diosta nirqan: — Sinchitan huchallikuni chayta ruwaspa. Rogakuykin, Diosníy, kay huchayta pampachaykuway, mana yuyayniyoq hinan chayta ruwarqani, nispa.

⁹Señor Diostaq Davidpa yuyaychaqnin profeta Gadta nirqan:

¹⁰— Phaway Davidman, hinaspa nimuy, Señor Diosmi nin: Kinsa muchuchiytan churayki, kinsantinmanta hukkaqta akllakuy, hinaspa chaywan muchuchisqayki, nispa.

¹¹Hinan Gadqa Davidman rispa nirqan: — Señor Diosmi nin:

¹²Akllakuy, mayqentan munanki: ¿Kinsa wata yarqaytachu? ¿Awqaykikunaq espadawan muchuchisqan kinsa killa ayqeytachu? Icha, ¿Señor Diospa angelnin Israel suyuntinpi kinsa p'unchay millay onqoywan wañuchinantachu? Chhaynaqa, akllakuy kachamuwaqniyman willanaypaq, nispa.

¹³Chaymi Davidqa profeta Gadta nirqan: — Hatun llaki phutiypin kashani, chaypas manan runakunaq muchuchisqan kayta munanichu, aswanpas Señor Diospa muchuchiwanantan munani, payqa ancha hatun khuyapayakuqmi, nispa.

¹⁴Hinan Señor Diosqa Israel suyuntinman millay onqoyta kachamurqan, chaymi qanchis chunka waranqa Israel runakuna wañurarqan.

¹⁵Chaymantataq Diosqa angelta kachamurqan Jerusalén llaqtata ch'usaqyachinanpaq. Chay ángel ch'usaqyachishaqtintaq Señor Diosqa chayta qhawarispa llakikurqan, hinaspan wañuchiq angelta nirqan: — ¡Chaykamalla! ¡Amaña ch'usaqyachiychu! nispa. Señor Diospa angelnintaq Jebusmanta Araunaq eran qayllapi sayasharqan.

¹⁶Davidtaq altota qhawarispa Señor Diospa angelninta rikurqan, churananmanta horqosqa espadanwan Jerusalén llaqtata ch'usaqyachinan patapi kashaqta. Hinan Davidqa kurak runakunapiwan qhasqa p'achayoq qonqoriykukuspa pampakama k'umuykukurqanku.

¹⁷Chaymi Davidqa Señor Diosta nirqan: — Ñoqan runakunata yupachiqqa kani, ñoqan huchallikuni, ñoqan mana chaninta ruwani. ¿Ima huchayoqtaq kay runakunari? ¡Diosníy Señor Dios! Ama llaqtaykitaqa muchuchiychu, aswanpas ñoqata familiaytawan muchuchiwayku, nispa.

¹⁸Hinan Señor Diospa angelninqa profeta Gadta nirqan: — Davidta kamachiy Jebusmanta Araunaq eranpi Señor Diospaq huk altarta sayarichinanpaq, nispa.

¹⁹Chaymi Davidqa rirqan, profeta Gadwan Señor Diospa kamachisqanman hina.

²⁰Araunaqa trigotan saruchisharqan, kutirispataq angelta rikurqan, chaymi paywan kashaq tawantin churinkuna pakakurqanku.

²¹Davidtaq Araunaman qayllaykurqan, hinan payqa Davidta rikuspa eranmanta lloqsispa Davidpa ñawpaqenpi pampakama k'umuykukurqan.

²²Davidtaq Araunata nirqan: — Kay eraykita vendeway. Señor Diospaq kaypi altarta sayarichisaq millay onqoy kay suyupi thaninanpaq. Hayk'achus valesqanta pagapusqayki, nispa.

²³Araunataq kutichirqan: — Señor reyníy, hayk'an munasqaykita hap'iy, hinaspa mayqenchá allin rikch'akusunki chayta ruway. Qollasqaykitaqmi torokunatapas ruphachina sacrificiopaq, trigo saruna rastrakunatapas llant'apaq, trigotataq ruru ofrendapaq, llapantan qosqayki, nispa.

²⁴Hinan rey Davidqa Araunata nirqan: — Manan yanqallanqa munanichu, aswanpas pagapusqaykin hayk'aña valeqtinpas. Manan qanpa kaqniykitaqa Señor Diosman qoymanchu, manataq ruphachina sacrificiotapas haywaymanchu mana qolqeypa chanintaqa, nispa.

²⁵Davidqa chay cheqasmanta soqta pachak qorimanta qolqetan Araunaman pagapurqan,

²⁶hinaspa chaypi Señor Diospaq altarta perqarqan. Chaymantataq ruphachina sacrificiokunata, sumaq kawsay sacrificiokunatawan haywarqan. Hinaspa Señor Diosmanta mañakurqan, paytaq kutichimuspa hanaq pachamanta ninata kachamurqan altar patapi sacrificiokunata ruphananpaq.

²⁷Angeltataq kamachirqan espadanta churananman churapunanpaq, hinan angelqa kasurqan.

²⁸Mañakusqanta Señor Diospa uyarisqan hawan Davidqa Jebusmanta Araunaq eranpi sacrificiota Señor Diosman haywashallarqan.

²⁹Moisespa ch'inneqpi Señor Diospaq karpa ruwasqanpas, sacrificio ruphachina altarpas Gabaonpi yupaychana cheqaspin kasharqan.

³⁰Davidtaq chay cheqasta mana riyta munarqanchu Señor Diosta tapuq, angelninpa espadanta manchakusharqanraq chayrayku.