Read Diospa Simin Qelqa 1 CRÓNICAS 24 Bible Online

1 CRÓNICAS 24 - Diospa Simin Qelqa bible

1 CRÓNICAS 24

¹Kaymi Aaronpa mirayninkuna t'aqa-t'aqa rakisqa. Aaronpa churinkunan karqan Nadab, Abiú, Eleazar, Itamarpiwan.

²Nadabwan Abiuwanqa taytankumanta aswan ñawpaqtaraqmi wañukapurqanku, manataq wawankupas karqanchu, chaymi Eleazarpiwan Itamarpiwan sacerdote-kayta chaskirqanku.

³Davidmi Eleazarpa mirayninmanta Sadocpiwan Itamarpa mirayninmanta Ahimelecpiwan t'aqa-t'aqaman sacerdotekunata rakirqan llank'anankuman hina.

⁴Itamarpa miraynin ayllu umallikunamantaqa Eleazarpa mirayninmantan aswan askha ayllu umallikuna karqan, chaymi rakirqanku Eleazarpa mirayninmanta chunka soqtayoq ayllu umallikunata, Itamarpa mirayninmantataq pusaq ayllu umallikunata.

⁵Eleazarpa mirayninpipas Itamarpa mirayninpipas karqanmi Diosta yupaychana wasipi serviq umallikuna, Diosta wak cheqaskunapi serviq umallikunapas, chayraykun mana mayqenmanpas sayakuspa sorteopi akllarqanku.

⁶Chaymi sorteopi akllarqanku Eleazarpa ayllunpaq iskayta, Itamarpa ayllunpaqtaq hukta, ahinatan ruwarqanku tukunankukama. Hinan Leví runakunamanta Natanaelpa churin qelqaq Semaiasqa sutinkunata reypa ñawpaqenpi umallikunaq ñawpaqenpiwan qelqarqan. Chay umallikunan karqan: Sacerdote Sadoc, Abiatarpa churin Ahimelec, sacerdote ayllunkunaq umallinkuna, Leví runakunaq umallinkunapiwan. Sorteopin akllarqanku Eleazarpa iskay ayllunta, Itamarpatataq huk ayllunta.

⁷Ñawpaqkaq suerten tuparqan Joiaribman, iskaykaqtaq Jedaiasman,

⁸kinsakaqtaq Harimman, tawakaqtaq Seorimman,

⁹phisqakaqtaq Malquiasman, soqtakaqtaq Mijaminman,

¹⁰qanchiskaqtaq Cosman, pusaqkaqtaq Abiasman,

¹¹isqonkaqtaq Jesuaman, chunkakaqtaq Secaniasman,

¹²chunka hukniyoqkaqtaq Eliasibman, chunka iskayniyoqkaqtaq Jaquimman,

¹³chunka kinsayoqkaqtaq Hupaman, chunka tawayoqkaqtaq Jesebeabman,

¹⁴chunka phisqayoqkaqtaq Bilgaman, chunka soqtayoqkaqtaq Imerman,

¹⁵chunka qanchisniyoqkaqtaq Hezirman, chunka pusaqniyoqkaqtaq Afsesman,

¹⁶chunka isqonniyoqkaqtaq Petaiasman, iskay chunkakaqtaq Hezequielman,

¹⁷iskay chunka hukniyoqkaqtaq Jaquinman, iskay chunka iskayniyoqkaqtaq Gamulman,

¹⁸iskay chunka kinsayoqkaqtaq Delaiaman, iskay chunka tawayoqkaqtaq Maaziasman.

¹⁹Chay hina rakisqan karqan Señor Diospa wasinman llank'aq haykunankupaq, Aarón ñawpa taytankuq kamachisqanman hinataq ruwarqanku, chaytan Aaronqa Israelpa Diosnin Señor Diosmanta chaskisqa paykunata kamachinanpaq.

²⁰Wakin Leví runakunaq umallinkunataq karqan: Amrampa mirayninmanta Subael, Subaelpa mirayninmanta Jehedías,

²¹Rehabiaspa mirayninmanta umalli Isías,

²²Izharpa mirayninmanta Selomot, Selomotpa mirayninmanta Jahat.

²³Hebronpa mirayninmanta tawa karqan: ñawpaqkaq Jerías, iskaykaqtaq Amarías, kinsakaqtaq Jahaziel, tawakaqtaq Jecamán.

²⁴Uzielpa mirayninmantan karqan Micaía, Micaiaq mirayninmantan karqan Samir,

²⁵Micaiaq wawqen Isiaspiwan. Isiaspa mirayninmantan karqan Zacarías.

²⁶Merariq mirayninmantan karqan Mahli, Musi, Jaaziaspiwan.

²⁷Jaaziaspa ayllunmantan karqan: Soham, Zacur, Ibripiwan.

²⁸Mahaliq mirayninmantan karqan Eleazar, payqa manan churiyoqchu karqan.

²⁹Cispa mirayninmantan karqan Jerameel.

³⁰Musiq mirayninmantan karqan: Mahli, Edar, Jeremotpiwan. Chaykunan karqan Leví runakunaq ayllunman hina.

³¹Paykunaqa Aaronpa miraynin wawqenku hinan sortearqanku rey Davidpa ñawpaqenpi, Sadocpa, Ahimelecpa, sacerdote ayllu umallikunaq, Leví runakunaq umallinkunaqpas ñawpaqenkupi, kurakkaqpa aylluntapas sullk'akaqpa aylluntapas kaqtakama kuskachaspanku.