Read Diospa Simin Qelqa 1 CRÓNICAS 5 Bible Online

1 CRÓNICAS 5 - Diospa Simin Qelqa bible

1 CRÓNICAS 5

¹Rubenqa Israelpa phiwi churinmi karqan, ichaqa taytanpa tiyaqmasin warmiwan puñusqanraykun phiwi-kay derechonqa wawqen Josepa churinkunaman qosqa karqan, manan phiwi nisqañachu karqan, manallataq miray qelqapi phiwi hina qelqasqachu karqan.

²Judaqa wawqenkuna ukhupi allin atiyniyoqmi karqan, paymantan kamachikuqqa karqan, chaywanpas phiwi-kay derechonqa Josepan kapurqan.

³Israelpa phiwi churin Rubenpa churinkunan karqan: Hanoc, Falú, Hezrón, Carmipiwan.

⁴Joelmi churiyarqan Semaiasta, Semaiastaq churiyarqan Gogta, Gogtaq churiyarqan Simeita,

⁵Simeitaq churiyarqan Micaiata, Micaiataq churiyarqan Reaiata, Reaiataq churiyarqan Baalta,

⁶Baaltaq churiyarqan Rubén aylluq umallin Beerata, paymi Asiria suyu rey Tiglat-pileserpa apasqan karqan.

⁷Beeraq wawqenkunan aylluntinkama miray qelqapi qelqasqaman hina karqanku: umalli Jeiel, Zacarías,

⁸Azaspa churin Belapiwan (paypa ñawpa taytankunan karqan Semawan Joelpiwan). Tiyarqankutaq Aroermanta Nebokama Baalmeonkama ima.

⁹Galaad hallp'apin uywanku askhata mirarqan, chaymi inti lloqsimuy ladopi tiyarqanku Eufrates mayumanta ch'inneq qorpakama.

¹⁰Rey Saulpa tiemponpin paykunaqa Agar runakuna contra maqanakurqanku, hinaspan paykunata atipaspa hallp'ankuta hap'ikapurqanku Galaadpa llapan inti lloqsimuy hap'iyninpi.

¹¹Gad aylluqa wawqen Rubén aylluq wichayninpin tiyarqan, Basán hallp'api Salca llaqtakama.

¹²Basanpiqa Joelmi ñawpaqkaq kamachikuq karqan, Safantaq iskaykaq kamachikuq karqan, chayman qatiqkunataq Jaanai, Safatpiwan.

¹³Ayllu-masinkunataq familiantinkama karqanku: Micael, Mesulam, Seba, Jorai, Jacán, Zía, Heberpiwan, llapanku qanchis.

¹⁴Paykunan karqan: Huriq churin Abihailpa churinkuna. Abihailpa ñawpa taytankunataq karqan: Jaroa, Galaad, Micael, Jesisai, Jahdo, Buzpiwan.

¹⁵Guniq churin Abdielpa churin Ahiqa chay familiakunaq umallinmi karqan.

¹⁶Tiyarqanku Galaadpi, Basanpi, campo llaqtachakunapi, Sharonpa llapan pastoyoq cheqaskunapi.

¹⁷Llapan chaykunan miray qelqapi qelqasqa karqanku, Judá rey Jotampa tiemponpi, Israel rey Jeroboampa tiemponpi ima.

¹⁸Rubén ayllupi, Gad ayllupi, Manasés kuskan ayllupi karqan tawa chunka tawayoq waranqa qanchis pachak soqta chunka soldadokuna, paykunan karqanku escudowan, espadawan, p'eqtawan maqanakuypaq allin wakichisqa.

¹⁹Paykunan maqanakurqanku Agar runakunawan, Jetur runakunawan, Nafis runakunawan, Nodab runakunawan ima.

²⁰Paykunaqa maqanakushaspankun Diosmanta mañakurqanku, hinan Diosqa paykunata yanaparqan iñisqankurayku, atipachirqantaq Agar runakunata llapan paykuna yanapaq runakunatapas.

²¹Hinan Israel runakunaqa Agar runakunaq uywankunata aparqanku phisqa chunka waranqa camellokunata, iskay pachak phisqa chunka waranqa ovejakunata, iskay waranqa asnokunatawan. Runakunatataq pachak waranqata presota hap'irqanku.

²²Agar runakunaqa askhan wañurqanku Dioswan maqanakuy kasqanrayku. Chaymi Agar runakunaq hallp'ankupi Israel runakunaqa tiyarqanku wak suyuman kamachipaq apasqa kanankukama.

²³Manasés kuskan aylluq mirayninkunan askha mirarqan. Tiyarqankutaq Basanmanta Baal-hermonkama, Senir nisqa Hermón orqokama ima.

²⁴Familiankunaq umallinkunan karqan: Efer, Isi, Eliel, Azriel, Jeremías, Hodavías, Jahdielpiwan. Paykunan karqanku allin qharikuna, kallpasapa mentasqa qharikuna.

²⁵Ichaqa ñawpa taytankuq Diosnin contran huchallikurqanku, hinaspa tiyasqanku suyupi dioskunata servispanku waqllipurqanku, chay dioskunatan Diosqa qayllankupi thunisqa.

²⁶Chayraykun Israelpa Diosninqa Asiria suyu rey Pul nisqa Tiglat-pileserpa sonqonta tanqarirqan. Hinan payqa kamachipaq aparqan Rubén aylluta, Gad aylluta, Manasés kuskan ayllutawan, hinaspa aparqan Halahman, Haborman, Haraman, Gozán mayuman ima, chaypitaq qhepapurqanku.