Read Diospa Simin Qelqa 1 CRÓNICAS 9 Bible Online

1 CRÓNICAS 9 - Diospa Simin Qelqa bible

1 CRÓNICAS 9

¹Llapan Israel runakunatan mirayninkuman hina yupasqata qelqarqanku Israel Reykunaq Qelqanpi. Judá suyu runakunan huchanku hawa Babilonia suyuman apasqa karqanku.

²Ñawpaqta kutimpuspa llaqta wasinkupi tiyaqkunan karqanku wakin Israel runakuna, sacerdotekuna, Leví runakuna, Dios yupaychana wasipi llank'aqkunapiwan.

³Jerusalenpin tiyarqanku Judá ayllu runakuna, Benjamín ayllu runakuna, Efraín ayllu runakuna, Manasés ayllu runakunapiwan.

⁴Judapa churin Farespa mirayninmanta kutimpuqmi karqan: Amiudpa churin Utai (ñawpa taytankunataq karqan Omri, Imri, Banipiwan).

⁵Judapa churin Siloq mirayninmanta kutimpuqkunan karqan phiwi churin Asaías churinkunantin.

⁶Judapa churin Zeraq mirayninmanta kutimpuqmi karqan Jeuel. Llapan Judá qharikunan soqta pachak isqon chunka karqanku.

⁷Benjaminpa mirayninmanta kutimpuqkunan karqan: Mesulampa churin Salú (ñawpa taytankunataq karqan Hodaviaswan Asenuapiwan),

⁸Jerohampa churin Ibneías, Micriq churin Uziq churin Ela, Sefatiaspa churin Mesulampiwan. Mesulampa ñawpa taytankunan karqan Reuelwan Ibniaspiwan.

⁹Llapan Benjamín ayllu qharikunaq miraynin qelqaman hinan isqon pachak phisqa chunka soqtayoq karqanku. Paykunaqa ayllunkupi umallikunan karqanku.

¹⁰Sacerdotekunamanta kutimpuqkunan karqan: Jedaías, Joiarib, Jaquín,

¹¹Hilciaspa churin Azarías (Azariasmi Diospa wasinpi umalli karqan, ñawpa taytankunataq karqan Mesulam, Sadoc, Meraiot, Ahitobpiwan),

¹²Jerohampa churin Adaía (ñawpa taytankunataq karqan Pasurwan Malquiaspiwan), Adielpa churin Masaipiwan, paypa ñawpa taytankunataq karqan: Jazera, Mesulam, Mesilemit, Imerpiwan.

¹³Ayllunkupi umalli sacerdotekunan waranqa qanchis pachak soqta chunka karqanku, Diospa wasinpi llank'aykunata allin ruway atiq qharikuna.

¹⁴Leví runakunamanta kutimpuqkunan karqan: Merariq mirayninmanta Hasubpa churin Semaías (paypa ñawpa taytankunan karqan Azricamwan Hasabiaspiwan),

¹⁵Bacbacar, Heres, Galal, Micaiaq churin Matanías (paypa ñawpa taytankunan karqan Zicriwan Asafpiwan),

¹⁶Semaiaspa churin Obadías (paypa ñawpa taytankunan karqan Galalwan Jedutunpiwan), Elcanaq churin, Asaq churin Berequiaspiwan. Paymi tiyarqan Netofa runakunaq llaqtachankunapi.

¹⁷Punku qhawaqkunamanta kutimpuqkunan karqan: Salum, Acub, Talmón, Ahimán, wawqenkunapiwan. Salumtaq umallinku karqan.

¹⁸Paymi yupaychana wasiq inti lloqsimuy lado reypa punkunta qhawashallarqan. Paykunan karqan Leví runakunaq tiyasqan cheqas punkukuna qhawaqkuna.

¹⁹Ebiasafpa churin Corepa churin Salum, ñawpa taytan Corepa ayllunmanta wawqenkunapiwan yupaychana wasi punkukunata qhawarqanku, imaynan ñawpa taytankupas Señor Dioswan Tupana Karpaman haykunata qhawasqaku hinata.

²⁰Ñawpa tiempopin Eleazarpa churin Fineesqa paykunaq umallinku kasqa. Señor Diostaq paykunawan karqan.

²¹Meselemiaspa churin Zacariasmi yupaychana wasipi punku qhawaq karqan.

²²Llapanpitaq punku qhawaqpaq akllasqa qharikuna karqanku iskay pachak chunka iskayniyoq, mirayninkuman hinataq llaqtankupi qelqasqa karqanku. Paykunatan Davidwan profeta Samuelpiwan tukuy tiempo llank'anankupaq churasqaku.

²³Ahinapin paykunamanpas churinkunamanpas Señor Dios yupaychana wasi punkukuna qhawana tuparqan.

²⁴Punku qhawaqkunaqa tawantin ladopin karqanku: inti lloqsimuypi, inti haykuypi, wichaypi, uraypi ima.

²⁵Tiyasqanku llaqtachakunapi kashaq wawqenkunataq qanchis p'unchay llank'aysiq rirqanku tupaqninkuman hina.

²⁶Punku qhawaq Leví runakunamantan tawa umallikuna tukuy tiempo llank'arqanku, waqaycharqankutaq Diospa wasinpi kashaq cuartokunata, hinallataq qolqe waqaychana cuartokunatapas.

²⁷Paykunan Diospa wasinpa muyuriqninpi illarirqanku qhawananku kasqanrayku, sapa paqartaqmi punkuta kicharqanku.

²⁸Wakinninkuqa Dios yupaychana serviciokuna waqaychaqmi karqanku, chaymi horqorqanku yupasqata, churapurqankupas yupasqallatataq.

²⁹Hukkunataq waqaycharqan kawsaykunata, tukuy ch'uya serviciokunata, hak'uta, vinota, aceiteta, inciensota, q'apaq hawinakunatawan.

³⁰Wakin sacerdotekunataq q'apaq hawinata ruwarqanku.

³¹Leví runakunamanta Corepa ayllun Salumpa phiwi churin Matatiasmi Diospa ñawpaqenpi churana t'antakunata ruwanan karqan.

³²Cohatpa ayllun wakin wawqenkunataq sapa samana p'unchaypaq t'antata ruwarqanku, chaytan mesa pataman churarqanku.

³³Kallarqantaqmi takiqkunapas. Leví ayllukunaq umallinkunan tiyarqanku Dios yupaychana wasiq cuartonkunapi, paykunaqa tuta-p'unchaymi tukuy llank'aykunata qhawananku karqan, chayraykun wak llank'aykunamanta horqosqa karqanku.

³⁴Chaykunan karqan miraynin qelqaman hina Leví ayllukunaq umallinkuna, Jerusalenpitaq tiyarqanku.

³⁵Gabaón llaqta sayarichiq Jehielmi Gabaonpi tiyarqan, warmintaq Maaca karqan.

³⁶Phiwi churinmi karqan: Abdón, qatiqninkunataq Zur, Cis, Baal, Ner, Nadab,

³⁷Gedor, Ahío, Zacarías, Miclotpiwan,

³⁸Miclot-taq churiyarqan Simeamta. Paykunapas Jerusalenpin tiyallarqankutaq wawqenkunawan kuska.

³⁹Nermi churiyarqan Cista, Cistaq churiyarqan Saulta, Saultaq churiyarqan Jonatanta, Malquishuata, Abinadabta, Es-baaltawan.

⁴⁰Jonatanmi churiyarqan Merib-baalta, Merib-baaltaq churiyarqan Micaiata.

⁴¹Micaiaq churinkunataq karqan: Pitón, Melec, Tarea, Ahazpiwan.

⁴²Ahazmi churiyarqan Jarata, Jarataq churiyarqan Alemet-ta, Azmavelta, Zimritawan. Zimritaq churiyarqan Mosata.

⁴³Mosataq churiyarqan Binata, Binataq churiyarqan Refaiata, Refaiataq churiyarqan Elasata, Elasataq churiyarqan Azelta.

⁴⁴Azelpa churinkunan soqta karqan: Azricam, Bocru, Ismael, Searías, Obadías, Hananpiwan.