Read Diospa Simin Qelqa 2 CRÓNICAS 1 Bible Online

2 CRÓNICAS 1 - Diospa Simin Qelqa bible

2 CRÓNICAS 1

¹Davidpa churin Salomonwanmi Señor Diosqa kasharqan, anchatapunitaq hatuncharqanpas, chaymi Salomonqa kamachikuyninta suyuntinpi allinta takyachirqan.

²Salomonmi waqyachirqan waranqa soldadoq umallinkunata, pachak soldadoq umallinkunata, juezkunata, Israelpi llapan ayllu umallikunatawan.

³Hinaspan llapan huñuykusqa runakunapiwan Gabaón orqopi yupaychana cheqasta rirqan, chaypin kasharqan ch'inneqpi Señor Diospa kamachin Moisespa ruwasqan Dioswan Tupana Karpa.

⁴Davidqa Diospa arcantan aparqan Quiriat-jearimmanta Jerusalén llaqtaman, chaypin arcapaq huk karpata sayarichirqan.

⁵Hurpa churin Uriq churin Bezaleelpa ruwasqan bronce altartaq ichaqa Gabaón orqopi Señor Dioswan Tupana Karpaq ñawpaqenpi kasharqan. Hinan Salomonqa llapan huñuykusqa runakunapiwan Señor Diosta chaypi yupaycharqanku.

⁶Salomonqa Señor Dioswan Tupana Karpa qayllapi kashaq bronce altarmanmi qayllaykurqan, hinaspan Señor Diospa ñawpaqenpi waranqa ruphachina sacrificiota haywarqan.

⁷Chay tutan Diosqa Salomonman rikhurispa nirqan: — Ima munasqaykita mañakuway, ñoqataq qosqayki, nispa.

⁸Hinan Salomonqa kutichirqan: — Qanqa tukuy tiempon David taytayta munakurqanki, chaymi ñoqata taytaypa rantinpi reyta churawarqanki.

⁹Chay hinaqa, Diosniy Señor Dios, David taytayman prometesqayki simita hunt'allaypuni, qanmi churawarqanki mana yupay atiy sinchi askha llaqtaykiq reynin kanaypaq.

¹⁰Qoykuway yachayta, allin yuyaytawan kay llaqtaykiq allin umallin kanaypaq, mana chayqa manan pipas kay hatun llaqtayki kamachiyta atinmanchu, nispa.

¹¹Hinan Diosqa Salomonta nirqan: — Chay hinatataq sonqoykipi yuyaykunki, manataq mañakuwankichu qhapaq kayta, kawsaykunata, mentasqa kayta, unay kawsayta, awqaykikunaq wañunantapas, aswanpas mañakuwanki yachayta allin yuyayllatawan llaqtayta kamachinaykipaq chayqa,

¹²qoykin yachayta allin yuyaytapas. Qollaykitaqmi qhapaq kayta, kawsaykunata, mentasqa kaytapas, chayraykun qanmanta ñawpaqtaqa mana qan hina rey karqanchu, manataqmi qhepaykitapas kanqachu, nispa.

¹³Chaymantataq Salomonqa Gabaón orqopi yupaychana cheqaspi Señor Dioswan Tupana Karpamanta Jerusalenman kutipurqan, hinaspa Israel suyuta kamachirqan.

¹⁴Salomonqa huñurqan waranqa tawa pachak carretakunata, chunka iskayniyoq waranqa caballokunatawan, hinaspan wakinta maqanakuypaq carretakuna waqaychana llaqtakunaman apachirqan, wakintataq Jerusalén llaqta qayllapi waqaycharqan.

¹⁵Rey Salomonqa sinchi askhatan Jerusalenpi qorita qolqeta rumita hinaraq hunt'aykachirqan, cedro kurkutapas Shefela moqo-moqopi k'ita higos sach'ata hinaraq.

¹⁶Salomonpa rantiqninkunaqa Muzrimanta Ciliciamantawanmi caballokunata paypaq rantirqanku.

¹⁷Egiptomanta rantisqa huk carretaqa valerqan soqta pachak qolqen, huk caballotaq pachak phisqa chunka qolqe. Llapan Het reykunapas Siria reykunapas Salomonpa rantiqninkunamantan rantikurqanku.