Read Diospa Simin Qelqa 2 CRÓNICAS 11 Bible Online

2 CRÓNICAS 11 - Diospa Simin Qelqa bible

2 CRÓNICAS 11

¹Jerusalenman chayaspataq Roboamqa huñurqan llapan Judá ayllumanta Benjamín ayllumantawan pachak pusaq chunka waranqa akllasqa soldadokunata. Payqa Israel runakunawan maqanakuytan yuyaykurqan, ahinapi suyunta kutichikapunanpaq.

²Señor Diosmi ichaqa profeta Semaiasta nirqan:

³— Salomonpa churin Judá rey Roboamta, llapan Judá aylluta, Benjamín ayllutapas nimuy,

⁴Señor Diosmi nin: Ama wawqeykichis Israel runakunawan maqanakuq riychischu, wasiykichista llapaykichis kutipuychis. Suyuq t'aqanakunantaqa ñoqan unancharqani, nispa. Chaymi paykunaqa Señor Diospa nisqanta kasukuspa kutipurqanku, manataq Jeroboam contra maqanakuq ripurqankuchu.

⁵Roboamqa Jerusalenpin tiyarqan, hinaspa Judapi wakin llaqtakunata pukara llaqtakunaman tukuchirqan.

⁶Chaykunan karqan Belén, Etam, Tecoa,

⁷Bet-sur, Soco, Adulam,

⁸Gat, Maresa, Zif,

⁹Adoraim, Laquis, Azeca,

¹⁰Zora, Aijalón, Hebronpiwan. Llapan chaykunan Judá aylluq Benjamín aylluq pukarayoq llaqtankuna kapurqan.

¹¹Muyuriq perqankunatapas allinta ruwarqan, hinaspa kamachikuqkunata churarqan, hinallataq mikhuytapas aceitetapas vinotapas chay llaqtakunapi waqaycharqan.

¹²Llapan chay llaqtakunapin escudokunata espadakunata ima churarqan, chaymi ancha allin pukara hina karqan. Judá ayllupas Benjamín ayllupas Roboamtan servirqanku.

¹³Israel suyuntinpi tiyaq llapan sacerdotekuna Leví runakuna iman tiyasqanku cheqaskunamanta ripuspanku Roboamman huñukapurqanku.

¹⁴Paykunaqa uywa michina hallp'ankutapas wasinkutapas wikch'uspan hampurqanku Judá suyuman Jerusalén llaqtamanwan. Paykunataqa Jeroboammi churinkunapiwan Señor Diospaq sacerdote-kayninkumanta wikch'urqanku.

¹⁵Chaymi Jeroboamqa sacerdotekunata akllakurqan wak'a dios yupaychana cheqaskunapi llank'anankupaq, orqo cabra rikch'aykunata paypa ruwachisqan torillo rikch'aykunatawan yupaychanankupaq.

¹⁶Leví runakunaq qhepantaqa hamullarqankutaqmi Jerusalenta Israelpa ayllunkunapi kaq Dios sonqo llapan runakunapas, ñawpa taytankuq Diosnin Señorman sacrificiota haywanankupaq.

¹⁷Paykunan Judá suyuta allinta kallpacharqanku, Salomonpa churin Roboamtataq kinsa wata yanaparqanku, Davidpa kawsasqanta Salomonpa kawsasqanta hina kawsaspanku.

¹⁸Roboamqa Mahalatwanmi casarakurqan, Mahalatpa taytanmi karqan Davidpa churin Jerimot, mamantaq Isaipa churin Eliabpa ususin Abihail.

¹⁹Mahalatmi wachakurqan Jeusta, Semariasta, Zahamtawan.

²⁰Chaymantataq Roboamqa Absalonpa ususin Maacawan casarakurqan, chaymi paypas wachakullarqantaq Abiasta, Ataita, Zizata, Selomit-tawan.

²¹Payqa Absalonpa ususin Maaca warmintan anchata munakurqan llapan warminkunamantapas tiyaqmasin warmikunamantapas. Roboamqa chunka pusaqniyoq warmikunawanmi casarakurqan, tiyaqmasin warmikunataq soqta chunka karqan. Churinkunan karqan iskay chunka pusaqniyoq, ususinkunataq soqta chunka.

²²Roboamqa Maaca warminpi churin Abiastan reyta churayta munarqan, chaymi wawqenkunaq umallinta churarqan.

²³Allin yuyaywan ruwaspanmi Roboamqa llapan churinkunata ch'eqechirqan Judapi Benjaminpi llapan pukara llaqtakunaman, paykunamanqa askha mikhuykunatan qorqan, askha warmikunatataq taripurqanpas.