Read Diospa Simin Qelqa 2 CRÓNICAS 13 Bible Online

2 CRÓNICAS 13 - Diospa Simin Qelqa bible

2 CRÓNICAS 13

¹Rey Jeroboam chunka pusaqniyoqkaq watapiña Israelpi kamachikushaqtinmi, Abiasqa Judapi kamachikuyta qallarirqan.

²Kinsa watataq Jerusalenmanta kamachikurqan. Abiaspa mamanqa Gabaamanta Urielpa ususinmi karqan Micaías sutiyoq. Abiaswan Jeroboamwanqa churanakushallarqankupunin.

³Payqa Jeroboamwan maqanakuqmi rirqan tawa pachak waranqa akllasqa soldadokunapiwan, paykunan karqan allin maqanakuq qharikuna. Jeroboamtaq pay contra lloqsirqan pusaq pachak waranqa akllasqa soldadokunapiwan, paykunapas allin maqanakuq qharikunan kallarqantaq.

⁴Hinan Abiasqa Efraín orqo-orqopi kashaq Zemaraim orqo patamanta waqyakurqan: ¡Uyariway Jeroboam! ¡Uyariwaychis llapa Israel runakuna!

⁵Qankunaqa yachankichismi Israelpa Diosnin Señorpa Davidman ayllunmanwan Israel suyuta wiñay kamachikunanpaq mana p'akiy rimanakuywan qosqanta.

⁶Nabatpa churin Jeroboamtaq ichaqa wiraqochan contra sayarirqan, payqa Davidpa churin Salomonpa kamachinmi karqan.

⁷Jeroboamqa mana yuyayniyoq millay qharikunawanmi huñukurqan, chaymi Salomonpa churin Roboamta atipananpaq hina karqan, Roboamqa manan paykunata tupapakuyta atirqanchu warma wayna kasqanrayku.

⁸Kunantaq qankunaqa Señor Diospa suyunta Davidpa ayllun kamachishaqkuna contra sayarimunkichis askha kaspaykichis, Jeroboammi qori torillokunata ruwapurqasunkichis diosniykichis kananpaq, chaykunatan awqa-tinkuyman apamushankichis.

⁹Qankunaqa Señor Diospa sacerdotenkunata, Aaronpa mirayninkunata, Leví runakunatapas qarqomusqankichismi, hinaspan wak llaqta runakuna hina kikiykichis sacerdoteta akllakusqankichis, chaymi kunanqa pipas huk torillota qanchis anejotawan aparikuspa ch'uyanchakuq riqqa mana imapaq serviq dioskunaq sacerdotenña kapun.

¹⁰Ñoqaykuq Diosniykuqa Señor Diosmi, manataq payta saqeykuchu. Señor Diosta serviq sacerdotekunapas Aaronpa mirayninkunan kanku, paykunata yanapaqkunapas Leví runakunan kanku.

¹¹Paykunan sapa paqar sapa ch'isi ruphachina sacrificiota haywanku, sumaq q'apaq inciensotapas q'apachinku, hinallataq Diospa ñawpaqenpi churana t'antata ch'uya mesa pataman churanku, qori candeleroq lamparachankunata sapa ch'isi hap'ichinku. Ahinatan ñoqaykuqa Diosniyku Señor Diospa unanchasqankunata hunt'ayku, qankunataq ichaqa Señor Diosta wikch'urqankichis.

¹²Ñoqaykuwanmi Diosqa kashan, paymi umalliyku. Sacerdotenkunapas ñoqaykuwanmi kashan maqanakuypaq cornetata tocanankupaq. ¡Israel runakuna, ama ñawpa taytaykichispa Diosnin contra maqanakuychischu, manan allinchu kawaqchis! nispa.

¹³Chaykamataq Jeroboamqa soldadokunata pakallapi Judá soldadokunaq qhepanman kacharqan, chaymi Jeroboamqa Judá soldadokunaq ñawpaqenpi kasharqan, wakin soldadonkunataq qonqaylla qhepankumanta phawaykamunanpaq kasharqan.

¹⁴Judá soldadokunataq qhawarikuspanku qhepankupi ñawpaqenkupi awqankuta rikurqorqanku. Chaymi Señor Diosta waqyakurqanku, sacerdotekunataq cornetata tocarqanku.

¹⁵Hinan soldadokunaqa: ¡Maqanakusun! nispa kunkayoqta qaparirqanku. Señor Diostaq qapariqtinku hina Jeroboamta llapan Israel soldadokunatawan Abiaswan Judá soldadokunawan atipachirqan.

¹⁶Hinan Israel soldadokunaqa Judá soldadokunaq ñawpaqenmanta ayqekapurqanku, Diosmi paykunata Judá soldadokunaman hap'ichirqan.

¹⁷Chaymi Abiasqa soldadonkunapiwan Israel soldadokunata sinchita atiparqanku, wañuchirqankutaq phisqa pachak waranqa allin qhari soldadokunata.

¹⁸Hinan Israel runakunaqa haqay tiempopi k'umuykuchisqa karqanku, Judá runakunataq atiparqanku ñawpa taytankuq Diosnin Señorman hap'ipakusqankurayku.

¹⁹Abiasqa qatirqanraqmi Jeroboamta, chaymi munaychakurqan Betelta llaqtachakunantinta, Jemasata llaqtachakunantinta, Efrontapas llaqtachakunantinta.

²⁰Jeroboamqa manan wakmanta atiyniyoqchu karqan Abiaspa tiemponpi, aswanpas Señor Diosmi k'irirqan, hinan wañupurqan.

²¹Abiastaq ichaqa astawan atiyniyoq kapurqan. Paypaqa chunka tawayoqmi warminkuna karqan, churinkunan karqan iskay chunka iskayniyoq, ususinkunataq chunka soqtayoq.

²²Abiaspa wakin ruwasqankunapas rimasqankunapas Profeta Iddoq Qelqanpi qelqasqan kashan.