Read Diospa Simin Qelqa 2 CRÓNICAS 14 Bible Online

2 CRÓNICAS 14 - Diospa Simin Qelqa bible

2 CRÓNICAS 14

¹Wañukapuqtinmi Abiastaqa Davidpa Llaqtan nisqapi p'ampapurqanku, rantinpitaq churin Asa kamachikurqan. Asaq tiemponpin Judá suyu runakuna chunka watata thak-kaypi kawsarqanku.

²Asaqa Diosnin Señor Diospa munayninman hinan allinta chaninta ruwarqan.

³Wikch'urqanmi wak dioskuna yupaychana altarkunata, moqo patakunapi yupaychana cheqaskunata, hinallataq yupaychana saywa rumikunata p'akirqan, Asera diosaq rikch'aynintapas thunirqan.

⁴Judá runakunatapas kamachirqanmi ñawpa taytankuq Diosnin Señorta servinankupaq, yachachikuyninkunatapas kamachikuyninkunatapas hunt'anankupaqwan.

⁵Judá suyuq llapan llaqtankunapi kashaq moqo patakunapi yupaychana cheqaskunata, incienso q'apachina altarkunatapas wikch'urqanmi. Judá suyu runakunaqa thak-kaypin kawsarqanku paypa kamachisqan tiempopi.

⁶Hinan Judapi pukara llaqtakunata sayarichirqan, suyupi thak-kay kasqanrayku. Manan chay tiempopi Judá contra awqa-tinkuy karqanchu, paykunaman Señor Dios thak-kawsayta qosqanrayku.

⁷Chaymi Asaqa Judá runakunata nirqan: — Wakmanta allichasun chay llaqtakunata, hinaspa muyurqachisun alto perqawan torrekunawan, churasuntaq punkukunata punku wisq'anakunatawan. Kay suyuqa munayninchispin kashan, Diosninchis Señor Diosta maskhasqanchisrayku, ñoqanchisqa munaynintan ruwarqanchis, chaymi payqa llapan qorpanchiskunawan sumaqpi kawsachiwanchis, nispa. Ahinapin chay llaqtakunata sayarichirqanku, allillantaq kawsarqankupas.

⁸Asaq soldadonkunan karqan Judá ayllumanta kinsa pachak waranqa hatun escudowan espadawan wakiyaqkuna, Benjamín ayllumantataq iskay pachak pusaq chunka waranqa huch'uy escudoyoqkuna, p'eqtawan wach'iqkuna. Llapan chay soldadokunaqa allin maqanakuy yachaq qharikunan karqanku.

⁹Chaymantataq Etiopía runa Zera sutiyoq Judá runakuna contra maqanakuq rirqan waranqa-waranqa soldadokunayoq, kinsa pachak carretakunayoq ima, hinaspa chayarqan Maresaman.

¹⁰Asataq paykuna contra maqanakuq rirqan, hinan Maresa llaqta qayllapi kashaq Sefata wayq'opi maqanakunankupaq wakichikurqanku.

¹¹Asataq Diosnin Señor Diosmanta mañakurqan: Señor Diosnilláy, qanllapunin kanki pisi kallpa runata atiyniyoqmanta hark'aykukuq. Diosniyku Señor Dios, yanapaykuwayku, qanmanmi hap'ipakuyku, sutiykipitaqmi kay sinchi askha soldadokunawan maqanakusaqku. Señornilláy, qanmi Diosniyku kanki, runaqa manapunin atipasunkimanchu, nispa.

¹²Hinan Señor Diosqa Etiopía soldadokunata ch'eqechirqan, Asawan llapan Judá soldadokunawantaq atipachirqan, chaymi paykunaqa ayqekapurqanku.

¹³Asataq soldadonkunapiwan Gerarkama qatirqanku, hinan Señor Diosqa paykunawan Etiopía soldadokunata wañuchirqan, manan ch'ullallapas qheparqanñachu. Chaymantataq Judá soldadokunaqa llat'anasqankuta askhata aparqanku.

¹⁴Señor Diosmi Gerar qayllapi kashaq llaqtakunapi runakunata sinchita llaksarqan, chaymi llaqtankuta thunirqanku. Chay llaqtakunapiqa askha kawsaykunan karqan, chaykunatan soldadokunaqa llat'anarqanku.

¹⁵Hinallataq phawaykurqanku uywa michiqkunaq karpankunamanpas, hinaspa aparqanku askha ovejakunata camellokunatawan. Chaymantataq Jerusalenman kutipurqanku.