Read Diospa Simin Qelqa 2 CRÓNICAS 15 Bible Online

2 CRÓNICAS 15 - Diospa Simin Qelqa bible

2 CRÓNICAS 15

¹Obedpa churin profeta Azariasmanmi Diospa Espiritun hunt'aykurqan,

²chaymi Asawan tupaq rispa, payta nirqan: — Uyariway rey Asa. Uyariwaychis Judá runakuna, Benjamín runakuna. Qankunachus Señor Diosta servishallankichis chayqa, paypas qankunawanpunin kashanqa. Maskhaspaykichispas tarinkichispunin, saqenkichistaqchus chayqa, paypas saqellasunkichistaqmi.

³Unay tiempokunan Israel runakunaqa karqan mana cheqaq Diosniyoq, mana ch'ulla sacerdoteqpas yachachisqan, mana kamachikuy simiyoq ima.

⁴Ichaqa llakikuyninkupin Israelpa Diosnin Señorman kutirikurqanku, payta maskhaspankutaq tarirqanku.

⁵Chay p'unchaykunapiqa lliw puriyninkupas sinchi manchakuymi karqan, llapan kay pachapi tiyaq runakunapas hatun ch'aqwaypin karqanku.

⁶Huk suyun suyumasinta saruncharqan, huk llaqtataq llaqtamasinta saruncharqan, Señor Diosmi paykunata tukuy t'aqa sasakunawan muchuchirqan.

⁷Qankuna ichaqa kallpachakuychis, servispaykichisqa ama sayk'uychischu, llank'asqaykichismantaqa kutichipusunkichismi, nispa.

⁸Hinan Asaqa Obedpa churin Azariaspa rimasqan simikunata uyarispa kallpachakurqan, hinaspa Judá ayllupi Benjamín ayllupi llapan millay wak'a idolokunata, Efraín orqo-orqopi munaychakusqan llaqtakunapi kashaq idolokunatapas wikch'urqan. Chaymantataq Señor Dios yupaychana wasiq ñawpaqenpi kashaq altarninta allicharqan.

⁹Hinaspa llapan Judá aylluta Benjamín ayllutawan huñurqan, hinallataq paykunawan tiyaq Efraín ayllu, Manasés ayllu, Simeón ayllu runakunatapas. Askha runakunan Israel suyumanta Judá suyuman hampurqanku, paykunawan Diosninku Señor Dios kasqanta yachaspa.

¹⁰Chaymi Asa chunka phisqayoqkaq watapi kamachikushaqtin kinsakaq killapi Jerusalén llaqtapi huñukurqanku.

¹¹Chay p'unchaymi Señor Diosman sacrificiota haywarqanku llat'anaspa apasqankumanta qanchis pachak torokunata qanchis waranqa ovejakunatawan.

¹²Hinaspataq rimanakurqanku ñawpa taytankuq Diosnin Señorta tukuy sonqo tukuy alma servinankupaq,

¹³pipas Israelpa Diosninta mana serviqqa erqepas machupas, warmipas qharipas wañuchisqa kananpaqwan.

¹⁴Chaytan kunkayoqta Señor Diosman jurarqanku, hinaspa kusikuymanta qaparirqanku, cornetata waqratapas tocallarqankutaq.

¹⁵Chaymi llapan Judá runakunaqa tukuy sonqowan juraspa prometekusqankumanta anchata kusikurqanku. Sonqopas-sonqon Señor Diosta maskharqanku, chaymi Señor Diosqa paykunawan tarichikurqan, sumaqtataq suyuntinpi kawsachirqan.

¹⁶Rey Asaqa hatun maman Maacatapas reina mama-kayninmanta wikch'urqanmi, Asera diosaq millay rikch'ayninta ruwachikusqanrayku. Chay rikch'aytataq ñut'uta p'akirqan, hinaspa Cedrón mayu wayq'opi ruphachirqan.

¹⁷Manaña Israel suyupi orqo patapi yupaychana cheqaskunata thunirqanchu chaypas, Asaqa Señor Diospaq hunt'aqllapunin karqan tukuy kawsasqan p'unchaykunapi.

¹⁸Hinallataq Señor Diospa wasinman churarqan paypas taytanpas Señor Diospaq t'aqasqanku qorita, qolqeta, serviciokunatawan.

¹⁹Awqa-tinkuyqa manan karqanchu kinsa chunka phisqayoq wata Asaq kamachikunankama.