Read Diospa Simin Qelqa 2 CRÓNICAS 16 Bible Online

2 CRÓNICAS 16 - Diospa Simin Qelqa bible

2 CRÓNICAS 16

¹Rey Asa kinsa chunka soqtayoqkaq watapiña Judapi kamachikushaqtinmi, Israel rey Baasaqa Judá contra rirqan, hinaspa Ramá llaqtata allinta perqachirqan rey Asaq suyunman haykuqtapas lloqsiqtapas hark'ananpaq.

²Hinan Asaqa Señor Dios yupaychana wasimanta paypa wasinmantawan qorita qolqeta horqospa Damascopi tiyaq Siria rey Ben-Hadadman apachirqan, willachirqantaq:

³Qanwan ñoqawan rimanakusun, imaynan taytanchis rimanakurqanku hinata. Kayqa sumaq sonqota apachimushayki qorita qolqetawan, Israel suyu rey Baasawan rimanakusqaykita saqepuy, ahinapi ñoqaq suyuymanta paykuna ripunqaku, nispa.

⁴Hinan Ben-Hadadqa Asaq valekusqanta uyakurqan, chaymi soldado umallikunata Israel llaqtakunaman phawaykunankupaq kacharqan. Hinan munaychakurqanku Ijón, Dan, Abel-maim llaqtakunata, hinallataq Neftalí aylluq hallp'anpi mikhuy taqena llaqtakunatapas.

⁵Chayta yacharqospanmi Baasaqa manaña Ramá llaqtata perqachirqanñachu, wikch'upurqantaq llank'asqanta.

⁶Rey Asataq llapan Judá runakunapiwan Ramata rirqanku, hinaspan Ramá llaqtata perqananpaq Baasaq apasqan rumikunata kurkukunatapas aparqanku, chaykunawantaq Gebata Mizpatawan sayarichirqanku.

⁷Chay tiempokunapin profeta Hananiqa Judá rey Asaman rispa nirqan: — Qanqa manan Diosniyki Señor Diosmanchu hap'ipakunki, aswanpas Siria reymanmi, ahinapin Siria soldadokunata kacharparinki atipanayki kashaqtin.

⁸¿Manachu Etiopía runakunaq Libia runakunaqpas aswan askha soldadonkuna, carretankuna, caballopi sillakuq soldadonkunapas karqan? Chaywanpas Señor Diosmi qanman hap'ichirqasunki, payman hap'ipakusqaykirayku.

⁹Señor Diosqa kay pachantintan qhawashan tukuy sonqo payta serviqkunarayku atiyninta rikuchinanpaq. ¡Mana allinta yuyaykuspaykin chayta ruwarqanki! Chayraykun kunanmantaqa astawan qan contra awqa-tinkuy kanqa, nispa.

¹⁰Hinan Asaqa k'arakta phiñakurqan profeta Hananipaq chaykunata willasqan hawa, chaymi carcelman wisq'aykurqan. Chay tiempopin Asaqa suyupi wakin runakunata sinchita muchuchirqan.

¹¹Asaq lliw ruwasqankunaqa Judá Reykunaq Israel Reykunaq Qelqanpin qelqasqa kashan.

¹²Kinsa chunka isqonniyoqkaq watapi kamachikushaspanmi Asaqa iskaynin chakinmanta sinchita onqoykurqan, ichaqa manan onqoshaspa Señor Diospa yanapaynintachu maskharqan, aswanpas hampiqkunallatan.

¹³Payqa tawa chunka hukniyoqkaq watapi kamachikushaspanmi wañukapurqan.

¹⁴Hinan tukuy rikch'aq sumaq q'apaq hawinakunawan hich'aykuspa tarimaman ayata chutaykurqanku, chay q'apaq hawinakunataqa allin yachaqmi wakichirqan. Chaymantataq Davidpa Llaqtan nisqapi p'ampapurqanku paypa ruwachikusqan p'ampanapi. Hinamantataq wañuqpa sutinpi askha q'apaq hawinakunata kanaykurqanku.