Read Diospa Simin Qelqa 2 CRÓNICAS 20 Bible Online

2 CRÓNICAS 20 - Diospa Simin Qelqa bible

2 CRÓNICAS 20

¹Chaykuna qhepatataq Moab runakuna, Amón runakuna, wakin Meún runakunapiwan huñuykusqa Josafat contra maqanakuq hamurqanku.

²Hinan wakin runakuna Josafatman willaq hamurqanku: Askha soldadokunan qan contra hamushan Kachi Qocha chimpa Edom suyumanta, Hazezon-tamar nisqa En-gadi cheqaspiñan kashanku, nispa.

³Chaymi Josafatqa sinchita mancharikuspa Señor Diosmanta mañakuyta yuyaykurqan, hinaspan Judapi llapan runakunata ayunanankupaq kamachirqan.

⁴Hinan Judá suyuntinpi llapa llaqtakunamanta Jerusalenman hamuspa huñukurqanku Señor Diosmanta mañakunankupaq.

⁵Josafat-taq Señor Dios yupaychana wasi mosoq patio qhawaypi llapan runakuna huñuykusqa qayllapi sayaykuspa mañakurqan:

⁶Ñawpa taytaykuq Diosnin Señorniyku, qanqa hanaq pachapi Diosmi kanki, tukuy kay pachapi suyukunatan kamachinki. Qanqa atiyniyoq kallpasapan kanki, manataq pipas tupapakusunkichu.

⁷Diosniyku, qanqa kay suyupi tiyaq runakunata Israel llaqtaykiq ñawpaqenmanta wikch'uspan, amigoyki Abrahampa mirayninman kay suyuta wiñaypaq qorqanki.

⁸Chaymi paykunaqa kay suyupi tiyasqaku, hinaspa huk wasita qanpaq sayarichispa nisqasunkiku:

⁹Ima mana allinpas ñoqayku ukhupi kanman onqoypas, yarqaypas, awqa-tinkuypas, ñak'ariypas chayqa, kay yupaychana wasiq ñawpaqenpi qanman qayllaykamusqaykiku, chaypi qan kashasqaykirayku. Ñak'ariypi muchushaspataq waqyakamusqaykiku, hinan qanqa uyariwankiku qespichiwankiku, nispanku.

¹⁰Señor Diosníy, qanqa manan munasqankichu Egipto suyumanta Israel llaqtayki lloqsimushaqtin Amón suyuman, Moab suyuman Seir orqo-orqomanpas haykunankuta, aswanpas kamachisqanki wakninta muyurinankupaqmi, ahinapi paykunata mana wañuchinankupaq.

¹¹Kunanqa qhawariyyá kay hina kutichishawasqankuta. Paykunaqa hap'ikapunaykupaq qowasqaykiku hallp'amanta wikch'uwanankupaqmi hamushanku.

¹²Diosnillayku, valekuykikun kay ruwasqankuta chaninchanaykipaq. Ñoqaykuqqa manan kallpayku kanchu, chay sinchi askha soldadokunawan tupanaykupaq. Paykunan ñoqayku contra hamun, manan imanayta atiykuchu, ichaqa qanllamanmi hap'ipakuykiku, nispa.

¹³Llapan Judá runakunan warmintin erqekunantin churikunantin ususikunantin Señor Diospa ñawpaqenpi sayasharqanku.

¹⁴Chay huñukuypin kasharqan huk Leví runa, Asafpa mirayninmanta Zacariaspa churin Jahaziel, paypa ñawpa taytankunan karqan Benaías, Jeiel, Mataniaspiwan. Paymanmi Señor Diospa Espiritun hunt'aykurqan,

¹⁵hinan nirqan: — Uyariychis Judá suyu llapan runakuna, Jerusalén llaqtapi tiyaq runakuna, qanpas rey Josafat uyariy. Señor Diosmi nin: Ama manchakuychischu, amataq pisi kallpayaychischu chay askha runakuna hawa, manan qankunachu maqanakunkichis, aswanpas ñoqan maqanakusaq.

¹⁶Paqarin paykuna contra riychis. Paykunan Sis Q'asata wichamunqaku, hinan Jeruel ch'inneq qaylla wayq'o tukukuypi tupankichis.

¹⁷Qankunaqa manan maqanakunkichischu. Ama maymanpas puririspa kikinpi allinta sayaykunkichis, hinaspa rikunkichis imaynatachus ñoqa qankunata qespichisqaykichis chayta. Chay hinaqa, Judá runakuna, Jerusalén runakunapas, ama manchakuychischu, amataq pisi kallpayaychispaschu, paykuna contra paqarin riychis, ñoqan qankunawan kashani, nispa.

¹⁸Hinan Josafatqa pampakama k'umuykukurqan, chaymantataq llapan Judá runakunapas, Señor Diospa ñawpaqenpi pampakama k'umuykukuspanku payta yupaycharqanku.

¹⁹Cohatpa miraynin, Corepa miraynin Leví runakunataq sayarispanku Israelpa Diosnin Señorta kunkayoqta yupaycharqanku.

²⁰Qhepantin p'unchaytaq tutallamanta Tecoa ch'inneqman lloqsirqanku. Lloqsishaqtinkutaq Josafatqa sayaykuspa nirqan: — Uyariwaychis Judá runakuna Jerusalenpi tiyaq runakuna: Diosninchis Señor Diosman hap'ipakuychis, paymi waqaychasunkichis. Iñiychis profetankunaq rimasqanpi, atipankichismi, nispa.

²¹Chaymantataq llapan runakunawan rimanakuspaña wakin takiqkunata ch'uya p'achawan p'achasqata churarqan, soldadokunaq ñawpaqenta rispa Señor Diosta takispa yupaychanankupaq: Señor Diosman graciasta qoychis, munakuyninqa wiñaypaqmi, nispa.

²²Takiyta, yupaychayta qallariqtinkutaq, Judá contra hamuq Amón soldadokunaman, Moab soldadokunaman, Seir orqo-orqo soldadokunaman ima kikin Señor Diospuni phawaykurqan, chaymi paykuna atipasqa karqanku.

²³Moab soldadokunawan Amón soldadokunapiwanmi Seir orqo-orqo soldadokuna contra sayarirqanku wañuchispa ch'usaqyachinankupaq, chaymantataq Seir orqo-orqo soldadokunata llapanta wañuchiyta tukuspa, sapanka soldadomasintin paykunapura wañuchinakurqanku.

²⁴Judá soldadokunataq ch'inneq urayta qhawarina cheqasman chayaspa, ancha askha soldadokunata qhawarirqanku, ichaqa pampapi wañusqa wikch'u-wikch'utan rikurqanku. Manan ch'ullapas kawsashaq ayqesqachu.

²⁵Chaymi Josafatqa soldadonkunapiwan llat'anaq phawarirqanku, hinaspan tarirqanku askha uywakunata, mikhuykunata, p'achakunata, sumaq illakunatawan. Sinchi askhan karqan mana apay atiyraq, chaymi kinsa p'unchay huñurqanku.

²⁶Tawakaq p'unchaypitaq Beraca wayq'opi huñukuspanku, Señor Diosta samincharqanku, chaymi chay cheqastaqa sutichapurqanku “Beraca[2] Wayq'o” nispa.

²⁷Chaymantataq llapa Judá runakuna Jerusalén llaqta runakunapas Josafatpa umallisqan Jerusalenman ancha kusisqa kutipurqanku, awqankumanta qespichispa Señor Dios paykunata kusichisqanrayku.

²⁸Jerusalenman chayaspataq Señor Dios yupaychana wasita rirqanku, arpata, tawtinkuta, cornetatawan tocaspanku.

²⁹Israelpa awqankunawan Señor Diospa maqanakusqanta uyarispataq llapa suyu reykunaqa Señor Diosta manchakurqanku.

³⁰Josafatpa kamachikusqan suyupiqa thak-nisqan kawsarqanku, Diosnin tukuy qorpankunawan sumaqta kawsachisqanrayku.

³¹Josafatqa Judá suyupi kamachikuyta qallarirqan kinsa chunka phisqayoq watayoq kashaspanmi, kamachikurqantaq Jerusalenmanta iskay chunka phisqayoq watata. Mamanqa Silhiq ususinmi karqan, Azuba sutiyoq.

³²Josafatqa taytan Asaq kawsasqanta hinan kawsarqan, Señor Diospa munayninman hinataq chaninta ruwarqan.

³³Chaywanpas wak'a dios yupaychana cheqaskunaqa manan thunisqachu karqan, Judá runakunapas manataq ñawpa taytankuq Diosninta tukuy sonqochu servirqanku.

³⁴Josafatpa wakin ruwasqankunaqa qallariypas tukukuypas Hananiq churin Jehupa Willakuynin Qelqapi qelqasqan kashan. Chaykunan Israel Reykunaq Willakuynin Qelqawan huñusqa karqan.

³⁵Chaykuna qhepatataq Judá rey Josafatqa Israel rey Ocoziaswan rimanakurqanku. Ocoziasqa millay mana chanin ruwaqmi karqan.

³⁶Rimanakurqankutaq lamar-qochanta Tarsisman puriq barcokunata ruwanankupaq. Ezión-geberpin chay barcokunataqa ruwarqanku.

³⁷Hinan Maseramanta Dodavaq churin Eliezerqa Josafat contra profetizarqan: Ocoziaswan sumaqta rimanakusqayki hawan, Señor Diosqa ruwasqaykikunata thuninqa, nispa. Hinan chay barco ruwasqanku p'akikapurqan, manataq lamar-qochanta ripurqankuchu.