Read Diospa Simin Qelqa 2 CRÓNICAS 22 Bible Online

2 CRÓNICAS 22 - Diospa Simin Qelqa bible

2 CRÓNICAS 22

¹Arabe runakunawan hamuq llat'anaqkunan Jorampa churinkunata karpa-karpapi kashaqta wañuchirqanku. Ocoziastataq mana wañuchirqankuchu. Chaymi Jerusalenpi tiyaq runakunaqa Ocoziasta taytanpa rantinpi reyta churakurqanku. Ahinapin Ocoziasqa rey kapurqan.

²Ocoziasqa kamachikuyta qallarishaspa iskay chunka iskayniyoq watayoqmi karqan, kamachikurqantaq Jerusalenmanta huk watata. Mamanqa Israel rey Omriq nietanmi karqan, Atalía sutiyoq.

³Ocoziaspas Ahabpa ayllun hinallataqmi ruwarqan, mamanmi mana chaninta ruwananpaq tanqarqan.

⁴Taytan wañukapusqan qhepataqa Ahabpa ayllun runakunan yuyaychaqnin karqan, chay yuyaychaqkunan Ocoziastaqa waqllichirqan. Chaymi payqa Ahabpa ayllun hina manapuni Señor Diospa munayninman hinachu ruwarqan.

⁵Ocoziasqa paykunaq yuyaychasqanta hap'ispan Ahabpa churin Israel rey Jorampiwan Galaadpi Ramot llaqtata rirqanku Siria rey Hazaelwan maqanakuq. Chaypin Joramtaqa Siria soldadokuna k'irirqan,

⁶chaymi payqa Jezreel llaqtata kutipurqan, Siria rey Hazaelwan Ramot llaqtapi maqanakuspa k'irichikusqanta hampikuq. Judá rey Ocoziastaq Jezreelta rirqan Ahabpa churin Joramta watukuq, chaypi pay onqosqa kasqanrayku.

⁷Diosmi unancharqan Joramman watukuq rispa chaypi Ocozías wañunanpaq. Chayraykun Ocoziasqa chayarqospa hina Jorampiwan Nimsiq churin Jehuwan tinkuq rirqanku. Jehutaqa Señor Diosmi akllasqa Ahabpa ayllunta lliwta wañuchinanpaq.

⁸Jehuqa Ahabpa ayllunta Diospa huchachasqanman hina muchuchishaspanmi, tarirqan Judá suyu umallikunata, Ocoziaspa ayllunkunaq churinkunata. Paykunan Ocoziasta servisharqanku, chaymi Jehuqa chaykunata llapanta wañuchirqan.

⁹Chaymantataq Ocoziasta maskharqan, hinan Jehupa runankunaqa Samaria llaqtapi pakakushaqta Ocoziasta tarispanku Jehuman aparqanku, hinaspataq wañuchirqanku. Paykunaqa yuyaykurqanku: Ñawpa taytan Josafatqa Señor Diosta tukuy sonqo serviqmi karqan, nispa, chaymi Ocoziastaqa p'ampapurqanku. Ocoziaspa ayllunpiqa manan pipas suyupi kamachikuy atiq qheparqanchu.

¹⁰Maman Atalian churin Ocoziaspa wañusqanta yachaspa, Judá suyu rey t'aqa aylluta llapanta wañuchirqan.

¹¹Ichaqa rey Jorampa ususin, Ocoziaspa panan Josabetmi Ocoziaspa churin Joasta t'aqarqan Ocoziaspa wakin wawankunata wañuchishaqtinku, hinaspan Ataliamanta pakarqan puñunan wasipi wawa amanitawan kuskata. Chay hinatan sacerdote Joiadaq warmin Josabetqa wawata pakarqan Ataliaq wañuchinanmanta, Ocoziaspa panan kasqanrayku.

¹²Hinan Joiadaqa Josabetwan chay wawata Diospa wasinpi soqta watata pakarqanku, chay tiempopin Ataliaqa suyupi kamachikusharqan.